Cənab Prezident İlham Əliyevin 21 avqust 2025-ci ildə Kəlbəcərə səfəri və səsləndirdiyi fikirlər bir daha göstərdi ki, Azərbaycan xalqının milli iradəsi, dövlətimizin gücü və Ali Baş Komandanımızın siyasi qətiyyəti sayəsində bu gün doğma torpaqlarımıza həyat qayıdır. Kəlbəcərlilərin 32 ildən sonra öz doğma yurdlarına dönməsi sadəcə qayıdış deyil, milli ədalətin bərpasıdır. Azərbaycan xalqı işğal illərində bütün çətinliklərə baxmayaraq, inamını itirmədi və bu müqəddəs günü yaxınlaşdırmaq üçün həm siyasi, həm də iqtisadi müstəvidə əzmlə çalışdı.
Bu fikirləri «Azərbaycan» qəzetinə açıqlamasında Milli Məclisin deputatı Fatma Yıldırım deyib. Onun sözlərinə görə bu gün Kəlbəcərdə həyata keçirilən genişmiqyaslı bərpa və quruculuq işləri dövlətimizin gücünü və vətəndaşına qayğısını nümayiş etdirir: «Yeni yaşayış kompleksləri, məktəblər, yollar, işıq, su və qaz təminatı – bütün bunlar dövlətimizin Kəlbəcəri müasir şəhərsalma nümunəsinə çevirmək iradəsindən xəbər verir. Uzun illər ağır şəraitdə yaşamış soydaşlarımız artıq doğma torpaqlarında ən gözəl şəraitdə məskunlaşırlar ki, bu da milli dirçəlişin ən bariz göstəricisidir».
Deputat həmçinin bildirib ki, tarixi faktlar da unudulmamalıdır: 1990-cı illərin əvvəllərində Şuşa, Laçın və Kəlbəcərin işğalı xəyanətkar qüvvələrin satqın siyasətinin nəticəsi idi. Həmin faciələr Azərbaycan üçün həm strateji, həm də mənəvi baxımdan ağır nəticələr yaratdı. «Lakin cənab Prezident İlham Əliyevin dediyi kimi, Azərbaycan xalqı bu taleylə heç vaxt barışmadı. 44 günlük Vətən müharibəsi və 2023-cü ilin antiterror əməliyyatı nəticəsində Azərbaycan Ordusu düşməni kapitulyasiya aktına imza atmağa məcbur etdi, ərazi bütövlüyümüz tam bərpa olundu. Kəlbəcərin bir güllə atılmadan azad edilməsi isə bu tarixi qələbənin ən parlaq səhifələrindən biridir. Cənab Prezident İlham Əliyevin vurğuladığı kimi, Azərbaycan sülhün tərəfdarıdır, lakin tarixi dərslər heç vaxt unudulmamalıdır. Biz qonşularımızla normal münasibətlərin tərəfdarıyıq, amma hər hansı təhlükə yaranacağı təqdirdə “dəmir yumruq” iradəsi yenidən öz sözünü deyəcək. Bu gün güclü ordumuz, ən müasir silahlarla təchiz olunmuş Silahlı Qüvvələrimiz və milli birliyimiz Azərbaycanın təhlükəsizliyinin əsas qarantıdır» - deyə Fatma Yıldırım qeyd edib.
Deputat vurğulayıb ki, beynəlxalq müstəvidə də Azərbaycanın mövqeyi tamamilə qəbul olunmuşdur: «Dünya birliyi artıq ölkəmizin yaratdığı yeni reallıqları qəbul edir, çünki biz heç bir dövlətin torpağına göz dikmədik, öz ərazilərimizi azad etdik və bunu beynəlxalq hüququn norma və prinsiplərinə əsaslanaraq etdik. Ermənistanın havadarlarının bütün cəhdlərinə baxmayaraq, Azərbaycan haqlı mövqeyini qəbul etdirdi. Ermənistanla sülh müqaviləsinin paraflanması isə regionda yeni mərhələnin başlanğıcıdır. Xüsusilə Naxçıvanla quru bağlantısının təmin edilməsi tarixi qələbəmizin mühüm strateji uğurlarından biridir və Azərbaycanın beynəlxalq nəqliyyat dəhlizlərində rolunu daha da artırır».
Fatma Yıldırımın sözlərinə görə, Prezident İlham Əliyevin Kəlbəcərdəki çıxışı bir daha göstərdi ki, Azərbaycan bu gün qalib xalq və qalib dövlət kimi yaşayır: «Cənab Prezidentin vurğuladı kimi, son 80 il ərzində dünyada Azərbaycan qədər tam və mütləq qələbə qazanan ikinci ölkə olmamışdır. Bu qələbə yalnız hərbi uğur deyil, həm də siyasi iradənin, xalq birliyinin və strateji diplomatiyanın nəticəsidir. 30 ilə yaxın işğal altında olan ərazilərin azad edilməsi, ərazi bütövlüyünün bərpa olunması və beynəlxalq səviyyədə tanınmış sərhədlərin təmin olunması tarixi ədalətin bərpası deməkdir. Məhz bu səbəbdən Azərbaycanın qazandığı Qələbə bənzərsizdir və çağdaş dövrün ən parlaq nümunələrindən biri kimi tarixə düşüb. Ermənistanın törətdiyi vəhşiliklər, Kəlbəcərdə və digər bölgələrdə törədilmiş dağıntılar heç vaxt yaddaşımızdan silinməyəcək, lakin Azərbaycan düşməndən qisasını döyüş meydanında aldı və indi quruculuq, inkişaf, sülh yaratmaqla fərqlənir. Bu gün Kəlbəcərin dağlarında dalğalanan üçrəngli bayrağımız həm Zəfərin, həm də yeni həyatın simvoludur».
Rəşad CƏFƏRLİ,
«Azərbaycan»
