Bakı Şəhər Mədəniyyət Baş İdarəsinin Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasının təşkilatçılığı ilə  Heydər Əliyev Mərkəzində görkəmli yazıçı, pedaqoq, dramaturq, ictimai-siyasi xadim, Xalq yazıçısı İsmayıl Şıxlının 105 illik yubileyinə həsr olunmuş tədbir keçirilib.
Əvvəlcə Ulu Öndər Heydər Əliyevin və Vətən torpaqlarının azadlığı uğrunda gedən döyüşlərdə şəhid olanların əziz xatirəsi birdəqiqəlik sükutla yad edilib.
Sonra Yasamal rayon Mərkəzləşdirilmiş Kitabxana Sisteminin direktoru, tarix üzrə fəlsəfə doktoru, Fəxri mədəniyyət işçisi Lətifə Məmmədova tədbiri açıq elan edərək yazıçının həyat və yaradıcılığından ətraflı danışıb. Onun Azərbaycan ədəbiyyatında böyük xidmətlərinin olduğunu vurğulayıb. İsmayıl Şıxlının "Dəli Kür" romanının onun yaradıcılığının ana xətti olduğunu bildirib. Ulu Öndər Heydər Əliyevin İsmayıl Şıxlı haqqında söylədiyi dəyərli fikirləri tədbir iştirakçılarının diqqətinə çatdırıb.
Milli Məclisin deputatı Aydın Mirzəzadə İsmayıl Şıxlının yaradıcılığından söz açıb. Vurğulayıb ki, yazıçı "Dəli Kür" romanı üzərində 10 il çalışıb. Sonda adı Azərbaycan ədəbiyyatı tarixinə  böyük hərflərlə yazılmış əsər yaradıb. 
Moldova Respublikasının ölkəmizdəki fövqəladə və səlahiyyətli səfiri Aleksandr Esaulenko tədbirə dəvətə görə təşkilatçılara öz təşəkkürünü bildirib. Çıxışında yazıçının Azərbaycan ədəbiyyatında neorealizmin yaradıcısı kimi tanındığını söyləyib. 
Əməkdar jurnalist, filologiya elmləri doktoru, professor Qulu Məhərrəmli İsmayıl Şıxlının Azərbaycan ədəbiyyatına verdiyi dəyərli töhfələrdən danışıb. Professor yazıçının sonuncu əsəri olan "Ölən dünyam" romanı haqqında ətraflı söz açaraq onun müəllifin ömrünün son akkordu olduğunu nəzərə çatdırıb. 
"Qazax" Xeyriyyə Cəmiyyətinin sədri, professor İlham Pirməmmədov tədbirin təşkilatçılarına təşəkkürünü bildirib, İsmayıl Şıxlı ilə bağlı xatirələrini bölüşüb.
Qarabağ Əlillərinə Qayğı İctimai Birliyinin sədr müavini Vidadi Şabanov, "Altun kitab" nəşriyyatının rəhbəri Rafiq İsmayılov, şair Zərəngiz Mansurova, dosent Cəmilə Qacarlı, yazıçılar Səbinə Yusif, Qaysın Quliyev, Sevinc Ağa Xəlilqızı, "Dədə Qorqud" vəqfinin rəhbəri, "Azərbaycan dünyası" jurnalının təsisçisi və baş redaktoru Eldar İsmayıl çıxışlarında İsmayıl Şıxlının yaradıcılığını yüksək qiymətləndiriblər.
Tədbirin bədii hissəsində muğam müsabiqələrinin iştirakçıları Oksana Aslanova "Segah",  Mətin Cəfərov  "Qatar" təsnifini oxuyublar. Sənətşünaslıq üzrə fəlsəfə doktoru, bədii qiraətçi Zülfiyyə Eldarqızı yazıçının "Ölən dünyam" romanından bir parçanı səsləndirib.
Ədibin oğlu, Azərbaycan Jurnalistlər Birliyinin sədri Elçin Şıxlı çıxış edərək tədbirin təşkilatçı və iştirakçılarına atasının xatirəsini andıqlarına görə  minnətdarlığını bildirib.

V.MƏHƏRRƏMOV,
"Azərbaycan"