"Bilirsiniz, mən dəfələrlə Ermənistanı güclü şəkildə dəstəkləyən və daim Ermənistan üçün geosiyasi baxımdan çətinliklərdən, guya bəzi ölkələrin onun maraqlarına zərər vurmaq istəməsindən şikayət edən bir qrup ölkənin liderləri ilə görüşərkən həmişə deyirəm: "ÜDM-ə baxın və Rusiya ilə ticarət dövriyyəsinə baxın". Rusiya-Ukrayna müharibəsi başlayanda Ermənistanla Rusiya arasında ticarət dövriyyəsi təxminən 2 milyard ABŞ dolları idi. İki il sonra isə bu rəqəm 12 milyard dollara çatdı. Bu, artıq hər şeyi açıq şəkildə göstərir".
Bu fikirləri Prezident İlham Əliyev yanvarın 5-də yerli televiziya kanallarına müsahibəsində bildirib. Dövlət başçısı qeyd edib ki, bu, sanksiyalardan yayınma mexanizmidir - onların dediyi kimi, paralel idxal və ya "boz zona" idxalıdır. Lakin nə Avropa Komissiyası, nə Avropa Parlamenti, nə də Avropa Şurası Parlament Assambleyasında heç kim bu barədə bir söz belə demədi, nə Ermənistanı qınadı, nə də ümumiyyətlə, sanksiyalar mövzusuna toxundu. Çünki onlar üçün sanksiyalardan yayınma kanalı olmaq qəbulediləndir.
Əslində, Qərbin bu addımı heç də təəccüblü deyil. Ermənistanın etdiklərini görməzdən gəlmək, ona daim arxa-dayaq durmaq Avropanın ən ümdə "vəzifə"lərindəndir. Amma hər kəsə də bəllidir ki, Ermənistan iqtisadiyyatı real şərtlərlə ticarət dövriyyəsini bu həddə çatdıra bilmək iqtidarında deyil.
İqtisadçı ekspert Eldəniz Əmirov qəzetimizə açıqlamasında bildirib ki, Rusiya və Ukrayna arasında münaqişə başlayana qədər Ermənistan və Rusiya arasında ticarət dövriyyəsi Azərbaycanla Rusiya arasında olan ticarət dövriyyəsinin yarısına bərabər olub: "Ukrayna-Rusiya müharibəsi başlayandan, Qərbin Rusiyaya sanksiyalar tətbiq etdiyi dövrdən etibarən Rusiya və Ermənistan arasında ticarət dövriyyəsi kəskin artmağa başladı. Bu artım o həddə çatdı ki, Azərbaycan və Rusiya arasında olan ticarət dövriyyəsini 5 dəfəyə qədər üstələdi. Beləliklə, 2024-cü ildə ticarət dövriyyəsi 15,4 milyard dollara çatdı. Bu, Ermənistan kimi ölkə üçün fantastik göstəricidir".
E.Əmirov qeyd edib ki, ticarət dövriyyəsinin bu qədər yüksəlməsinə əsas səbəb Ermənistanın Rusiyanın sanksiyalardan yayınmasına xidmət etməsidir. Bu xidmətin isə Ermənistan iqtisadiyyatına müsbət təsirləri olub, çünki rəsmi İrəvan bilavasitə üçüncü ölkə olaraq "reexport" edib.
Ekspert vurğulayıb ki, 2022-ci ildən bəri Avropa İttifaqı üçün vacib məsələlər enerji təhlükəsizliyi, hərbi təhlükəsizlik, sosial problemlər, demokratik göstəricilər olduğundan Ermənistanın bu əməli arxa plana keçib: "Bu kontekstdə Ermənistanın Rusiyanın sanksiyalardan yayınmasına xidmət etməsi Qərbin diqqətindən kənarda qalıb. Son dövrlər bir çox ölkəyə, o cümlədən Ermənistana konkret maneələr formalaşdırılıb. Bunun da məntiqi nəticəsi olaraq 2025-ci ildən Ermənistan və Rusiya arasında ticarət dövriyyəsi azalır".
E.Əmirov düşünür ki, qarşıdakı dönəmdə bu göstərici azalma istiqamətində davam edərək 5 milyard dollara qədər enəcək.
Əsmər QARDAŞXANOVA,
"Azərbaycan"
