Azərbaycan Mediasiya Şurasının İdarə Heyətinin sədri, dosent Nadir Adilovun rəhbərlik etdiyi nümayəndə heyəti Ankarada Türk dövlətlərinin mediatorlarının 1-ci qurultayına qatılıb.
AZƏRTAC xəbər verir ki, mövzu ilə bağlı dekabrın 2-də Türkiyənin “Hürriyyet” qəzeti “Ankara Türk dünyasının “mediatorluq bazasına” çevrilir” sərlövhəli məqalə dərc edib.
Məqalədə qeyd olunur ki, 10 ölkədən 135 mediator mediasiya sahəsində əməkdaşlıq yollarını müzakirə etmək üçün Ankarada bir araya gəlib. Xüsusən, Azərbaycanı 86 mediator, eləcə də İnsan Hüquqları üzrə Müvəkkil (Ombudsman) Səbinə Əliyeva təmsil edib.
“Bundan sonra, məsələn, Bakıda və Ankarada fəaliyyət göstərən şirkətlər arasında fikir ayrılığı olarsa, məsələlər Türk Dünyası Mediatorlar Birliyinin (TDAB) kanalları ilə həll olunacaq. Bu halda TDAB-ın barışdırıcı sənədləri hər iki ölkədə tanınacaq”, - deyə məqalədə deyilir.
Nəşr qeyd edir ki, Türk dövlətlərinin mediatorlarının 1-ci qurultayının əsas nəticəsi Şimali Kipr Türk Cümhuriyyəti (ŞKTC) də daxil olmaqla on ölkənin iştirakı ilə mediasiya sahəsində əməkdaşlıq haqqında protokolun imzalanması olub. Sənədə uyğun olaraq, mediasiya sahəsində müxtəlif treninqlərin, konfransların, simpoziumların, konfransların və birgə proqramların təşkili, hüquqi sahədə qanunvericiliyin təkmilləşdirilməsi üzrə səylərin dəstəklənməsi planlaşdırılır.
Türk dünyası məkanında fikir ayrılıqlarının ədalətli və operativ həllinin vacibliyini vurğulayan TDAB sədri, hüquqşünas Yakup Erikelin sözləri sitat gətirilir. “Bizim məqsədimiz mediatorluq sahəsində qlobal brendə çevrilməkdir”, - deyə Erikel vurğulayıb.
Məqalədə türk ölkələrinin notariat sənədlərinin qarşılıqlı tanınmasının əhəmiyyətindən də bəhs edilir.
