Gəncə Dövlət Universitetində  (GDU) "İnsan hüquqları aylığı" çərçivəsində səfərbərlik və hərbi xidmətə çağırış işinin təşkili ilə bağlı tələbələrlə görüş keçirilmişdir. 
Görüşdə Səfərbərlik və Hərbi Xidmətə Çağırış üzrə Dövlət Xidməti Gəncə şəhəri Kəpəz rayon şöbəsinin rəisi, mayor İlkin Məmmədov, xidmətin Gəncə şəhəri Nizami rayon şöbəsinin rəisi, polkovnik-leytenant Yusif  Əhmədov, Gəncə hərbi prokurorunun müavini  ədliyyə polkovnik-leytenantı Farid Seyidov, şəhər Baş Polis İdarəsinin İctimai təhlükəsizlik şöbəsinin inspektoru, polis mayoru Tural Eldarov  və buraxılış kurs tələbələri iştirak etmişlər.
Görüşdə rektorun baş müşaviri Asif Cavadov çıxış edərək universitetdə gənclər arasında vətənpərvərlik hisslərinin təbliği, onların həqiqi hərbi xidmətə mənəvi-psixoloji cəhətdən hazırlanması sahəsində görülən işlər, eləcə də  son illər Azərbaycan Ordusunun gücləndirilməsi istiqamətində Prezident, Ali Baş Komandan İlham Əliyevin həyata keçirdiyi tədbirlərdən danışıb.  Digər qonaqlar da çıxış edərək insan hüquqlarının təmin olunmasının Azərbaycanda dövlət siyasətinin prioritetlərindən olduğunu qeyd etmiş, respublikamızda elan olunmuş "İnsan Hüquqları aylığı" çərçivəsində keçirilən tədbirlərin çağırışçıların hüquqlarının izah edilməsində əhəmiyyətini vurğulamış, gənclərin hüquqi maarifləndirilməsinin, onlara hüquqlarının və vəzifələrinin izah edilməsinin böyük əhəmiyyət kəsb etdiyini diqqətə çatdırmışlar.   
Sonda tələbələrin sualları cavablandırılmışdır. 

S.ƏLİYEV,
"Azərbaycan"