Prezident İlham Əliyevin fəaliyyəti ilə bağlı keçirilən ictimai rəy sorğusunun nəticələri xalqımızın öz liderinə olan yüksək etimadının və inamının bariz nümunəsidir. Prezident seçildiyi ilk gündən İlham Əliyevin həyata keçirdiyi daxili və xarici siyasət Azərbaycan dövlətinin və xalqının milli maraqlarını layiqincə təmin edib. Bu gün Azərbaycan dünyanın azsaylı ölkələrindəndir ki, müstəqil, milli maraqlarına söykənən xarici siyasət həyata keçirir.
Bakı Dövlət Universitetinin kafedra müdiri, professor Kamilə ƏLİYEVA qəzetimizə açıqlamasında deyib ki, Prezident İlham Əliyevin 23 illik fəaliyyəti onun böyük şəxsiyyət olmasından xəbər verir: "2020-ci ildə Dünya İqtisadi Forumunun panel iclasında moderatorun "Avrasiyada böyük dövlətlər mövcuddur - bir tərəfdə Rusiya, digər tərəfdə Çin. Azərbaycan Prezidenti olaraq kimə zəng edərsiniz? Moskvaya, yoxsa Pekinə?" sualına Prezidentimizin "Bakıya" cavabı cənab İlham Əliyevin yalnız öz xalqına güvəndiyinin nümunəsidir. Xalqımız da öz Prezidentinə inanır, güvənir və onun ətrafında sıx birləşir".
Ekspert qeyd edib ki, Ulu Öndər Heydər Əliyev siyasi kursuna və irsinə sadiq qalaraq onu inkişaf etdirən Prezident İlham Əliyev Azərbaycanı dünyada nüfuzlu bir dövlətə çevirib: "Dövlət başçısının müdrik, qətiyyətli, eləcə də uzaqgörən siyasəti sayəsində Azərbaycan bu gün qlobal səviyyədə söz sahibidir. Ölkəmiz nəinki regionda, dünyada gedən siyasi proseslərə təsir edən bir güc mərkəzidir. Dünyanın ən böyük və qüdrətli ölkələrinin dövlət başçıları İlham Əliyevin böyük siyasi lider olduğunu dəfələrlə vurğulayıblar. Məhz İlham Əliyevin rəhbərliyi ilə Azərbaycan iqtisadiyyatı sürətlə inkişaf edir. Prezident, Ali Baş Komandan İlham Əliyev tək regionun deyil, dünyanın ən güclü orduları sırasında yer alan bir ordu qurub. Azərbaycan Ordusu 30 ilə yaxın düşmən tapdağında qalan torpaqlarımızı işğaldan azad edib. Prezident İlham Əliyevin böyük sərkərdəlik və siyasi bacarığı sayəsində Azərbaycan öz müstəqilliyini və suverenliyini tam bərpa edib. Ordumuzun göstərdiyi döyüş taktikası və peşəkarlığı dünyanın hərb tarixinə yazılıb".
K.Əliyeva vurğulayıb ki, işğaldan azad olunmuş ərazilərimizdə aparılan yenidənqurma və bərpa işləri Azərbaycanın iqtisadi cəhətdən qüdrətli dövlət olduğuna bir nümunədir: "Dağıdılmış, viran qoyulmuş şəhər və kəndlərin yenidən qurulması xarici qonaqları, diplomatları heyrətə gətirir. Bütün bu işləri Azərbaycan heç bir təşkilatdan və ölkədən maliyyə yardımı almadan, kredit götürmədən təkbaşına edir".
Prezident İlham Əliyevin Azərbaycanı Avrasiyanın ən önəmli bir dövlətinə çevirdiyini deyən K.Əliyeva bildirib ki, ölkəmizin yaratdığı böyük nəqliyyat-logistika infrastrukturu sayəsində Şərqlə Qərb, Şimalla Cənub arasında olduqca səmərəli bir iqtisadi bağlantılar yaranıb: "Bu marşrutlar üzrə Azərbaycandan keçməklə daşınan yüklərin həcmi hər il artmaqdadır. Bu, Azərbaycanla yanaşı, Avrasiya məkanında yerləşən bütün dövlətlərin iqtisadiyyatına böyük töhfələr verir. Ölkəmiz Avropanın enerji təhlükəsizliyində də olduqca mühüm rol oynayır. Müasir dünyada enerji təhlükəsizliyi milli təhlükəsizliyə bərabər tutulur. Prezident İlham Əliyevin həyata keçirdiyi enerji siyasəti sayəsində ölkəmiz bir sıra Avropa dövlətlərinin enerji təhlükəsizliyinin təminatında iştirak edir. Azərbaycanın şimalında və cənubunda müharibələr və münaqişələr hökm sürür. Bu gərgin geosiyasi vəziyyətə rəğmən Azərbaycanda sabitlikdir. Bu, Prezidentimizin uğurlu siyasətinin nəticəsidir".
Əsmər QARDAŞXANOVA,
"Azərbaycan"
