"Sülh müqaviləsi ilə bağlı təqdim etdiyimiz şərtlərin hamısının Ermənistan tərəfindən qəbul edilməsinin elan olunması növbəti uğurumuzdur. Bu, Azərbaycanın döyüş meydanında yaratdığı reallığın Ermənistan tərəfindən də qəbul olunması deməkdir. Amma Ermənistan tərəfindən şərtlərin qəbulu hələ bu ölkənin sülh müqaviləsinin imzalanması üçün tam hazır olması kimi başa düşülməməlidir".
Bu fikirləri "Azərbaycan" qəzetinə Milli Məclisin deputatı Azər Badamov deyib. O bildirib ki, şərtlərin qəbul olunması ilə şərtlərin icrası arasında böyük fərq var. Əgər Ermənistan sülh müqaviləsi ilə bağlı bütün şərtləri qəbul edibsə, onda Konstitusiyada dəyişikliklərin edilməsi ilə bağlı referenduma getməlidir. "Yəni Ermənistan şərtləri qəbul etmişik deməklə kifayətlənirsə, bu heç də sülh demək deyil. Azərbaycan qətiyyətli şəkildə deyib ki, biz ancaq Paşinyanla yox, Ermənistan xalqı ilə sülh bağlamaq istəyirik. Bu baxımdan referendum yolu ilə Konstitusiyada ölkəmizə qarşı olan ərazi iddialarından əl çəkilməsi istiqamətində hərəkətlilik müşahidə olunarsa, onda Azərbaycan həqiqətən Ermənistanın sülh niyyətində olduğunu görər. Digər məsələ isə keçmişin qalığı olan Minsk qrupunun ləğv edilməsi ilə bağlı ATƏT-ə birgə müraciətin ünvanlanması üçün razılığın alınmasıdır. Bu iki məsələ həll olunarsa, uzun illər düşmənçilk münasibətlərində olmuş iki ölkə arasında dayanıqlı sülh əldə olunar", - deyə siyasətçi əlavə edib.
Deputat qeyd edib ki, bu həm də dünyada davam edən münaqişələrlə münasibətdə yeni bir nümunəyə imzanın atılması olardı. Digər məsələləri isə ikitərəfli danışıqlar yolu ilə həll etmək mümkündür. Bu da regionda əməkdaşlıq mühitinin möhkəmlənməsinə səbəb olar. Amma təəssüf ki, Ermənistanda sülhün əksinə olan hərəkətləri müşahidə edirik. Birincisi, Ermənistanın sürətlə silahlanmasını xatırlada bilərik. Ermənistan hərbi büdcəsini bir neçə dəfə artırıb silah arsenalını çoxaltmaqla məşğuldur. Bu ölkə Hindistandan "Akash" tipli raket kompleksləri, Fransadan "Caesar" özüyeriyən artilleriya qurğuları, zirehli avtomobillər və digər silahlar alır. Başqa ölkələrdən də ölümcül döyüş silahları almaqda davam edir. Bununla yanaşı, şərti sərhədimizdə 10-dan çox dayaq nöqtələri yaradıb. Son vaxtlar Avropa İttifaqının kəşfiyyatçıları şərti sərhədimizdə kəşfiyyat məlumatlarının toplanılmasını da intensivləşdiriblər. Bütün bunlar Ermənistanın sülh niyyətində olmadığını sübut edir.
Deputat vurğulayıb ki, Paşinyan hakimiyyətinin sülhlə bağlı şərtləri qəbul etməsi barədə açıqlama verməsi sadəcə özlərini sülhsevər kimi təqdim etmək məqsədi daşıyır: "Amma reallıqda Ermənistan çox ciddi şəkildə müharibəyə hazırlaşır. Yaxşı olar ki, Ermənistanın dövlət rəhbərləri ağıllarını başlarına yığıb şərtlərimizi qəbul etdiklərini bildirdiyi kimi, digər məsələlərin də real həlli üçün hərəkətə keçsinlər. Onda regionumuza əsl sülh və əməkdaşlıq gələr. Azərbaycanın niyyəti yenidən müharibə etmək deyil. Ona görə də 44 günlük Vətən müharibəsi başa çatan kimi Prezident İlham Əliyev Ermənistana köhnə düşmənçilik səhifəsini bağlamağı və münasibətlərə təmiz vərəqdən başlamağı təklif edib. Amma beşinci ildir ki, münasibətlərimizin təmiz səhifədən başlanması istiqamətində Ermənistandan bir hərəkətlilik yoxdur".
A.Badamov bildirib ki, dövlətimizin qəti mövqeyi hakimdir və Ermənistan da reallıqda bunu qəbul etməyə məcbur olacaq. Əks halda bundan sonra bataqlıqda qalmaqda davam edəcək. Ermənistanın yenidən müharibəyə hazırlaşması onların yanlış yolda olduğunun göstəricisidir. Çünki onlar nə qədər müharibəyə hazırlaşsalar da, Azərbaycan Ordusundan güclü ordu yarada bilməyəcəklər. Biz də ordumuzu gücləndiririk, çünki ordumuz suverenliyimizin təminatçısıdır. Əgər Ermənistan yenidən revanşist niyyətə düşüb hərbi əməliyyatlara başlayarsa, cavabımız çox ciddi olacaq. İrəvan yenidən çoxlu sayda tabutları qarşılayacaq. O cümlədən Hərbi Qənimətlər Parkının boş qalmış yerlərini "Caesar" və "Akash" raket kompleksləri və "Bastion" zirehli avtomobilləri ilə doldurmalı olacağıq.
Əsmər QARDAŞXANOVA,
"Azərbaycan"
jpg_1766048684.jpg)
