Türkiyə ilə Azərbaycanın enerji sahəsindəki əməkdaşlıq əlaqələri yalnız neft və qaz tranziti ilə yekunlaşmamalıdır. Bu günə kimi iki ölkə arasında mövcud olan Bakı-Tbilisi-Ceyhan neft kəməri, Bakı-Tbilisi-Ərzurum və TANAP təbii qaz boru kəmərləri kimi regionumuzun və Avropanın enerji təchizatı təhlükəsizliyinə mühüm töhfələr verən böyük infrastruktur layihələrini yeni dövrdə bərpaolunan enerji, elektrik interkonnektor layihələri, mədənçilik kimi müxtəlif sahələrdə də inkişaf etdirmək istəyirik.
Bu sözləri AZƏRTAC-a açıqlaması zamanı Türkiyənin Kırıkkale Universitetinin dosent-doktoru, beynəlxalq iqtisadi münasibətlər üzrə mütəxəssis Merve Suna Özel Özcan deyib.
O bildirib ki, hər iki ölkənin yaşıl enerji, kənd təsərrüfatı, sənaye, nəqliyyat, logistika, rəqəmsallaşma və turizm kimi sahələrdə birgə layihələr həyata keçirilməsi zəruridir.
“Bunun üçün dövlətlərimizin böyük potensialı var. Azərbaycanın artan nəqliyyat-tranzit imkanları, təşəbbüskar və iştirakçı olduğu regional, qlobal layihələr, o cümlədən Orta Dəhlizin təqdim etdiyi logistik potensial Türkiyə ilə qarşılıqlı faydalı əməkdaşlıq üçün əlavə imkanlar yaradır. Orta Dəhlizin rəqəmsal həllərlə gücləndirilməsi və ticarətin asanlaşdırılması üzrə atılan addımlar həm ölkələr, həm də region üzrə tranzit imkanlarını genişləndirir. Ən böyük investisiya layihəsi olan TANAP Cənub Qaz Dəhlizinin mühüm hissəsidir və Azərbaycanın “Şahdəniz 2” yatağından çıxarılan təbii qazı Türkiyə vasitəsilə Avropaya nəql edir. Bu layihə enerji təchizatı təhlükəsizliyi baxımından strateji əhəmiyyətə malikdir və iki ölkə arasında ən böyük enerji sərmayəsi hesab edilir”, - deyə Merve Suna Özel Özcan vurğulayıb.
Mütəxəssis qeyd edib ki, Azərbaycanda bərpaolunan enerji layihələrinə böyük maraq göstərən Türkiyə şirkətləri bu sahədə əldə etdikləri təcrübəni qardaş ölkə ilə bölüşmək niyyətindədirlər: “Onlar xüsusilə Qarabağın yaşıl enerji regionuna çevrilməsi prosesində fəal rol oynamağı hədəfləyirlər. Türkiyənin enerji şirkətlərinin Azərbaycanda Günəş və külək enerjisi layihələrində iştirakı artıq gündəmdədir”.
