Prezident İlham Əliyevin və birinci xanım Mehriban Əliyevanın Naxçıvan Muxtar Respublikasına tarixi səfəri zamanı bir sıra strateji əhəmiyyətli layihələrin, o cümlədən Naxçıvan Sənaye Parkının təməlinin qoyulması regionun iqtisadi potensialının reallaşdırılması baxımından mühüm addımdır.
Bu fikirləri AZƏRTAC-ın bölgə müxbirinə açıqlamasında Naxçıvan Dövlət Universitetinin dosenti, iqtisad üzrə fəlsəfə doktoru Cavadxan Qasımov bildirib.
Ekspert qeyd edib ki, 310 hektar ərazini əhatə edəcək Naxçıvan Sənaye Parkı muxtar respublikada sənayeləşmənin daha sistemli və kompleks şəkildə aparılmasına, yeni iqtisadi imkanların formalaşmasına şərait yaradacaq: “Sənaye parkının yaradılması kənd təsərrüfatı, emal və sənaye sahələrinin vahid istehsal zəncirində birləşdirilməsi baxımından xüsusi əhəmiyyət daşıyır. Belə bir yanaşma yerli xammalın ilkin formada deyil, emal olunmuş və daha yüksək əlavə dəyər yaradan məhsul kimi dövriyyəyə daxil edilməsinə imkan verəcək. Bu isə istehsalın həcminin artmasına və yerli məhsulların rəqabət qabiliyyətinin yüksəlməsinə birbaşa təsir göstərəcək”.
C.Qasımovun sözlərinə görə, modern infrastruktura malik belə zonalar kiçik və orta sahibkarlığın inkişafına, investisiya imkanlarının genişlənməsinə yeni stimul verir. Parkın tam gücü ilə fəaliyyət göstərməsi nəticəsində minlərlə iş yerinin yaradılması nəzərdə tutulur ki, bu da layihənin sosial əhəmiyyətini artıran əsas amillərdəndir.
Layihənin digər üstünlüyü iqtisadiyyatın şaxələndirilməsinə xidmət etməsidir. İstehsal və emal müəssisələrinin artması daxili bazarın təminatını yaxşılaşdırmaqla yanaşı, ixrac imkanlarını da genişləndirəcək.
Dünya təcrübəsinə toxunan ekspert bildirib ki, Çində sənaye parkları xarici investisiya və texnologiya transferi, Cənubi Koreyada elmi-tədqiqat əlaqələri, Sinqapurda müasir logistika, Almaniyada yaşıl sənaye və dairəvi iqtisadiyyat, Yaponiyada isə sənaye-universitet əməkdaşlığı üzərində qurulub. Bu qabaqcıl modellərin Naxçıvanın yerli xüsusiyyətləri, coğrafi mövqeyi, kənd təsərrüfatı və enerji potensialı nəzərə alınmaqla tətbiqi böyük effekt yarada bilər.
“Şərur Sənaye Məhəlləsinin fəaliyyəti ilə yanaşı, Naxçıvan Sənaye Parkının yaradılması muxtar respublikada sənayeləşmə prosesinin miqyasının genişləndiyini göstərir. Bu layihə yerli xammalın emalından hazır məhsul istehsalına, məşğulluğun artırılmasından innovasiyaların tətbiqinə qədər bir sıra istiqamətləri özündə birləşdirən kompleks iqtisadi platformadır. Bu baxımdan sənaye parkı Naxçıvanın dayanıqlı inkişafının təmin olunması və ölkənin ümumi sənaye potensialındakı payının artırılması baxımından strateji əhəmiyyət kəsb edir”, – deyə Cavadxan Qasımov fikrini yekunlaşdırıb.
