Azərbaycana dünyada nüfuz və ehtiram gətirən səbəblərdən biri məhz budur
Beynəlxalq münasibətlər sistemi uzun müddətdir ki, dərin böhran içərisindədir. Dünyanın siyasi mənzərəsi təzadlarla, qeyri-müəyyənliklərlə, qarşıdurmalarla, gərginliklərlə doludur. Qlobal səviyyədə qəbul olunmuş hüquq prinsiplərinin və normaların kobud şəkildə tapdalanması, dövlətlərin ərazi bütövlüyünün pozulması, ənənəvi siyasi institutların sarsılması bu düzənin ayrı-ayrı elementləridir.
Müstəqil və çoxvektorlu
Siyasi və hərbi qütbləşmənin dərinləşdiyi belə bir dövrdə milli maraqları təmin edən siyasi kurs həyata keçirmək hər bir dövlətdən güclü səy, diplomatik məharət və xüsusi imkanlar tələb edir. Lakin heç də hər dövlət belə bir şəraitdə qlobal konyunkturanın çağırışlarına uyğun və ən əsası özünün mənafelərini qoruya bilən müstəqil siyasət yürütmək imkanına malik deyil. Çox uzağa getmədən xarici siyasəti müxtəlif siyasi mərkəzlərdən alınan direktivlər əsasında formalaşan Ermənistanı bu dövlətlərə misal göstərmək mümkündür.
Belə dövlətlərdən fərqli olaraq Azərbaycan üçün özünəməxsus reallıqlar hakimdir. Bu gün dünyada Azərbaycanın adı çəkiləndə ilk yada düşən məsələlərdən biri respublikamızın müstəqil, çoxvektorlu və ardıcıl siyasi kurs həyata keçirməsidir. Bununla bağlı çoxsaylı misallar göstərmək olar. Məsələn, hələ illər öncə Azərbaycanın Xəzərdən hasil etdiyi nefti alternativ marşrutla dünya bazarlarına çıxarması müstəqil enerji siyasətinin təcəssümü idi.
Bu siyasətin başqa bir göstəricisi Azərbaycanın dünyanın bütün siyasi qütbləri ilə bərabərhüquqlu əlaqələrinin olmasıdır. Prezident İlham Əliyevin ötən ay Çin Xalq Respublikasına etdiyi dövlət səfəri də bunu təsdiq etdi. Bu səfər zamanı "Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat"ın imzalanması göstərdi ki, Azərbaycanın müasir dünya nizamındakı yeri və rolu dünyanın aparıcı siyasi-iqtisadi gücləri tərəfindən böyük maraqla qarşılanır. O cümlədən Avropa İttifaqına üzv dövlətlərin üçdəbiri ilə Azərbaycan arasında strateji tərəfdaşlığa dair sənədlər imzalanıb. Ötən ay İran Prezidentinin Azərbaycana uğurlu səfəri və iki ölkə arasındakı münasibətlərdə yeni səhifənin açılması isə ondan xəbər verdi ki, İran dövləti də respublikamızın regiondakı roluna dəyər verir. Göründüyü kimi, Prezident İlham Əliyevin rəhbərliyi ilə Azərbaycanın xarici siyasətində həm Şərq, həm Qərb, həm də regionda böyük uğurlar əldə edilib və bu davamlıdır.
Torpaqlarımızın hərbi yolla azad olunması, Qarabağda erməni separatçılığına son qoyulması da Prezident İlham Əliyevin yürütdüyü müstəqil və qətiyyətli siyasətin təntənəsidir. İstər Vətən müharibəsində, istər antiterror əməliyyatında Azərbaycan dövləti ilk növbədə öz gücünə güvəndi. Bu baxımdan Azərbaycanın qətiyyətli siyasəti həm də Fransanın və Qərbin digər siyasi mərkəzlərinin bütün təhdid və təzyiqlərini qətiyyətlə dəf etdi, onların planlarını iflasa uğratdı. Eyni zamanda Azərbaycan təzadlarla dolu dünyada ədalətin yoluna qoyulmasının nümunəsini yaratdı. Azərbaycanın ərazi bütövlüyünü bərpa etməsi, beynəlxalq hüquqla təsbit olunmuş hüquqlarını döyüş meydanında yoluna qoyması ölkəmizin qlobal nüfuzunu daha da yüksəltdi. İndi Azərbaycan həm də müharibədə qalib gəlmiş dövlət kimi tanınır.
"Bu siyasət Azərbaycan xalqının maraqlarına xidmət edir"
Müstəqil siyasət milli maraqlarımızı uğurla təmin etməklə, Azərbaycana ərazi bütövlüyünü və suverenliyini bərpa etməyə imkan verməklə yanaşı, ölkəmizin beynəlxalq münasibətlər sistemindəki rolunu da əhəmiyyətli dərəcədə artırıb. Respublikamızı sayılıb-seçilən, hörmət olunan, etimad göstərilən dövlətə çevirən bu siyasət həm də regionda və dünyada sülhün təşviq olunmasına, dövlətlərarası əməkdaşlıq imkanlarının dərinləşdirilməsinə, mədəniyyətlər və sivilizasiyalar arasında dialoqun inkişaf etdirilməsinə xidmət edir. Eyni zamanda bu siyasət dost dövlətlərin maraqlarını təmin edir. "Bu gün, sözün əsl mənasında, Azərbaycan müstəqil siyasət aparır. Bu siyasət Azərbaycan xalqının maraqlarına xidmət edir. Bu siyasət xoşniyyətli siyasətdir. Bu siyasət heç kimə qarşı deyildir. Bu siyasət əməkdaşlığı, o cümlədən regional əməkdaşlığı gücləndirən bir siyasətdir", - deyə Prezident İlham Əliyev bildirib.
Milli Məclisin Beynəlxalq münasibətlər və parlamentlərarası əlaqələr komitəsinin mayın 14-də keçirilmiş genişləndirilmiş iclasında da bu istiqamətdə müzakirələr aparılıb. Komitənin sədri Səməd Seyidovun qeyd etdiyi kimi, Azərbaycanın xarici siyasəti hər zaman obyektivlik, etibarlılıq, qarşılıqlı hörmət, suverenliyə sayğı və daxili işlərə qarışmamaq kimi prinsiplər əsasında qurulub. Bu gün beynəlxalq münasibətlərin tənzimlənməsinin daha da çətinləşdiyi, "Şimal-Cənub" probleminin daha da mürəkkəbləşdiyi bu çətin dövrdə ölkəmiz öz potensialını əminliklə nümayiş etdirir.
Xüsusilə qeyd edilməlidir ki, son illərdə Azərbaycanın Qlobal Cənubda nüfuzu sürətlə yüksəlməkdədir. Bunun da əsas səbəbi Bakının qlobal qeyri-bərabərliyin azaldılmasına verdiyi töhfələrdir. Həm Qoşulmama Hərəkatına, həm də COP29-a sədrliyi dövründə respublikamız bu istiqamətdə nümunəyə çevrilən fəaliyyət ortaya qoyub. Məhz Azərbaycanın qətiyyətli siyasəti nəticəsində inkişaf etməkdə olan dövlətlərin səsi, onların üzləşdikləri problemlər mötəbər platformalardan dünyanın diqqətinə çatdırılıb. Respublikamızın strateji təşəbbüsləri ona Qlobal Cənub və Qərb arasında mühüm körpü rolunda çıxış etməyə imkan verir.
Azərbaycanın həyata keçirdiyi müstəqil siyasət ilk növbədə milli maraqlara, ədalət və beynəlxalq hüquq prinsiplərinə əsasalanır. Respublikamıza dünyada yüksək nüfuz və ehtiram gətirən səbəblərdən biri də məhz budur.
Rəşad CƏFƏRLİ,
"Azərbaycan"
jpeg_1765897678.jpeg)
