Martın 12-də Milli Məclisin Hüquq siyasəti və dövlət quruculuğu komitəsinin İnsan hüquqları komitəsi ilə birgə videokonfrans formatında iclası keçirilib. İclasın gündəliyinə 4 məsələ daxil edilib.
AZƏRTAC xəbər verir ki, Hüquq siyasəti və dövlət quruculuğu komitəsinin sədri Əli Hüseynli əvvəlcə Cinayət Məcəlləsində, Cinayət-Prosessual Məcəlləsində, “İnformasiya, informasiyalaşdırma və informasiyanın mühafizəsi haqqında” və “Media haqqında” qanunlarda dəyişiklik edilməsi barədə qanun layihəsini (birinci oxunuş) təqdim edib.
O bildirib ki, rəqəmsal texnologiyaların sürətli inkişafı və süni intellekt texnologiyalarının müxtəlif sahələrdə geniş tətbiqi informasiya mühitinin transformasiyasına və yeni innovativ imkanların yaranmasına şərait yaradır. Bununla yanaşı, bu texnologiyalardan qanunsuz və zərərli məqsədlərlə istifadə hallarının artması şəxsi həyatın toxunulmazlığına müdaxilə, ictimai rəyin manipulyasiyası və cəmiyyətdə çaşqınlıq yaradılması kimi problemlərin ortaya çıxmasına səbəb olur. Bu baxımdan qeyd olunan sahədə müvafiq hüquqi mexanizmlərin formalaşdırılması zəruri hesab edilir.
Milli Məclisin İnsan hüquqları komitəsinin sədri Zahid Oruc müasir dövrdə geniş tətbiq edilən süni intellekt texnologiyalarının müsbət tərəfləri ilə yanaşı, yaratdığı risklər barədə fikirlərini bölüşüb. O, sənəddə təklif olunan dəyişikliklərin mühüm əhəmiyyət kəsb etdiyini bildirərək, qanun layihəsinin milli və rəqəmsal təhlükəsizliyin, eləcə də texnoloji suverenliyin qorunmasına xidmət etdiyini vurğulayıb.
Sonra iclasda Cinayət Məcəlləsində dəyişiklik edilməsi haqqında qanun layihəsi (birinci oxunuş) barədə məlumat verilib. Qeyd olunub ki, layihədə təklif olunan dəyişikliklərin əsas məqsədi dövlət vəsaitlərindən istifadə ilə bağlı məsuliyyət mexanizminin təkmilləşdirilməsi, sanksiyaların fərdiləşdirilməsi və hüquqi tənzimləmənin dəqiqləşdirilməsidir.
Daha sonra iclasda İnzibati Xətalar Məcəlləsində dəyişiklik edilməsi haqqında qanun layihəsinə (birinci oxunuş) baxılıb.
Diqqətə çatdırılıb ki, layihəyə əsasən “İCMAL” informasiya sistemi “Rəqəmsal dövlət maliyyəsi” informasiya sisteminin tərkibində “İnzibati cərimələrin mərkəzi avtomatlaşdırılmış lövhəsi” altsistemi – “İCMAL” altsistemi kimi yenidən təşkil edilir və buna uyğun olaraq Məcəllənin müvafiq maddələrində dəyişikliklər edilir.
İclasda, həmçinin “Yol hərəkəti haqqında” Qanunda dəyişiklik edilməsi barədə qanun layihəsi təqdim olunub. Bildirilib ki, qanunun 27, 30 və 35-ci maddələrinə təklif olunan dəyişiklik İnzibati Xətalar Məcəlləsinin 57.6.3-cü maddəsində nəzərdə tutulan dəyişikliklərlə əlaqədardır və həmin maddədə müəyyən edilmiş qaydada tənzimlənməni ehtiva edir. Bununla yanaşı, layihədə sənədlərin elektron tərtib edilməsi ilə əlaqədar müvafiq dəyişikliklərin edilməsi də təklif olunur.
Onlayn iclasda təqdim olunan məsələlərlə bağlı geniş fikir mübadiləsi aparılıb. Çıxış edənlər öz fikirlərini, qeyd və təkliflərini səsləndiriblər.
Müzakirələrin sonunda gündəlikdəki bütün qanun layihələri Milli Məclisin plenar iclasına tövsiyə olunub.
