Prezident İlham Əliyevin hərbi qulluqçuların sosial rifahının yüksəldilməsi, xidmət və məişət şəraitinin yaxşılaşdırılması ilə bağlı göstərişlərinə əsasən Dövlət Sərhəd Xidmətinin (DSX) Sürücülük Mərkəzinin açılış mərasimi keçirilib.
Bu barədə AZƏRTAC-a DSX-nin mətbuat mərkəzindən məlumat verilib.
Bildirilib ki, Dövlət Himninin səsləndirilməsi ilə başlayan tədbirdə Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib.
Çıxış edənlər Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə DSX-də müasir hərbi infrastrukturun yaradılması istiqamətində görülən işlərin şəxsi heyətin peşəkarlığının artırılmasına, onların sosial rifahının yaxşılaşdırılmasına və xidmət fəaliyyətinin daha səmərəli təşkilinə mühüm töhfə verdiyini vurğulayıblar.
Bildirilib ki, Sürücülük Mərkəzində inzibati və tədris binaları müasir standartlara uyğun yenidən qurulub, sürücülərin nəzəri və praktiki hazırlığının təşkili üçün zəruri tədris bazası yaradılıb, müasir avadanlıqlarla təchiz edilmiş sinif otaqları, təlim meydançaları, texniki xidmət sahələri və nəqliyyat vasitələrinin saxlanılması üçün qarajlar istifadəyə verilib.
Mərkəzdə yaradılan müasir infrastruktur təlim prosesinin səmərəliliyinin artırılmasına, sürücülərin peşə hazırlığının daha yüksək səviyyədə təşkilinə və DSX-nin nəqliyyat təminatı imkanlarının gücləndirilməsinə xidmət edəcək.
Tədbirin rəsmi hissəsindən sonra DSX-nin rəhbərliyi mərkəzdə yaradılmış şəraitlə tanış olub, müasir qərargah binası, sürücülərin nəzəri-praktiki hazırlığının təşkilində zəruri infrastruktur, geniş və tam təchiz olunmuş tədris sinifləri, yataqxana, yeməkxana, eləcə də zabit evlərinə baxış keçirib.
jpg_1782824423.jpg)
