Cəmiyyətdə dini biliklərin formalaşdığı əsas mənbələrin - ailə, kütləvi informasiya vasitələri və ibadət ocaqlarının hər birinin etibarlılıq səviyyəsi eyni deyil və mövcud boşluqlar dini radikalizmə, xurafata və yanlış təsəvvürlərin yayılmasına şərait yarada bilər. Bu səbəbdən ardıcıl, sistemli və etibarlı maarifləndirmənin həyata keçirilməsi üçün ən effektiv platforma məhz təhsil müəssisələridir.
AZƏRTAC xəbər verir ki, bunu dekabrın 15-də Elm və Təhsil Nazirliyi və Dini Qurumlarla İş üzrə Dövlət Komitəsinin birgə təşkilatçılığı ilə “Dini düşüncə mədəniyyəti: pedaqoji perspektivlər” mövzusunda keçirilən konfransda Dini Qurumlarla İş üzrə Dövlət Komitəsinin sədr müavini Gündüz İsmayılov bildirib.
O, dini məlumatların ən çox üç mənbədən əldə olunduğunu söyləyib: ailə, media və sosial şəbəkələr, habelə din xadimləri. Gündüz İsmayılov qeyd edib ki, bu üç mənbənin heç biri tam etibarlı deyil: “Bütün ailələrin dini bilikləri eyni səviyyədə deyil. Bəzi ailələrdə dini biliklər natamam, bəzilərində isə hətta yanlış ola bilər. Sosial şəbəkələr və təsadüfi internet mənbələri isə çox zaman etibarsızdır və burada dinlə bağlı yanlış məlumatların yayılması daha intensivdir. Üçüncü mənbə olan ibadət evlərində də mövcud vəziyyət tam qənaətbəxş deyil. Dini və dünyəvi bilgiləri geniş olan din xadimlərimiz artsa da, dini ayin və mərasimləri icra edənlərin bir qismi kifayət qədər savadlı deyil”.
Komitə sədrinin müavini bildirib ki, bu reallıq fonunda cəmiyyətin dini biliklərə dair ardıcıl və etibarlı mənbəyə ehtiyacı yaranır: “Bu sualın cavabı aydındır: məktəb və təhsil sistemi. Təkcə Azərbaycanda deyil, digər ölkələrdə də dini radikalizm, xurafat və məzhəbçiliklə mübarizədə, milli-mənəvi dəyərlərin möhkəmləndirilməsində ən ardıcıl maarifləndirici platforma məhz təhsil müəssisələridir”.
Gündüz İsmayılov vurğulayıb ki, müəllimlərlə aparılan müzakirələr bu istiqamətdə görüləcək işlərə fokuslanmalı, şagirdlərə sağlam dini dünyagörüşün formalaşdırılması üçün metodik və pedaqoji yanaşmalar gücləndirilməlidir: “Əsas məsələ odur ki, dini biliklər təhrif olunmuş şəkildə deyil, doğru və elmi-praktiki çərçivədə, milli-mənəvi dəyərlərə uyğun şəkildə məktəblərdə ardıcıl təbliğ olunsun”.
jpg_1767211798.jpg)
