Azərbaycanın xarici siyasət sahəsindəki uğurları ölkəmizin beynəlxalq mövqeyini daha da gücləndirir. Bu nailiyyətlərdə diplomatik korpusun fəaliyyəti müstəsna rol oynayır.
Diplomatlarımızın fəaliyyətini tənzimləyən əsas sənəd isə "Diplomatik xidmət haqqında" qanundur. Bu qanun diplomatik xidmət orqanlarının iş prinsiplərini, əməkdaşların hüquqi statusunu, eləcə də onların və ailə üzvlərinin sosial-maddi təminatını müəyyən edir. Məhz bu mənada, sözügedən qanuna təklif edilən yeni dəyişikliklər böyük əhəmiyyət kəsb edir. Dəyişikliklər diplomatların fəaliyyət səmərəliliyini artırmaqla yanaşı, onların sosial müdafiəsini də əhəmiyyətli dərəcədə gücləndirəcək. Qeyd edək ki, "Diplomatik xidmət haqqında" Azərbaycan Respublikasının Qanununda dəyişiklik edilməsi barədə qanun layihəsi Milli Məclisdə ikinci oxunuşdan keçib.
Milli Məclisin deputatı Günay ƏFƏNDİYEVA mövzu ilə bağlı "Azərbaycan" qəzetinə açıqlamasında "Diplomatik xidmət haqqında" qanun layihəsində nəzərdə tutulan dəyişikliklərin ciddi əhəmiyyət kəsb etdiyini bildirib. O qeyd edib ki, xarici siyasət Azərbaycanın dünyadakı mövqeyini formalaşdıran aparıcı istiqamətlərdəndir: "Prezident İlham Əliyevin rəhbərliyi ilə dövlətimiz bu gün mürəkkəb beynəlxalq şəraitdə öz müstəqil xarici siyasət kursunu güclü iradə ilə davam etdirir. Ölkəmiz dünyada beynəlxalq siyasi dialoqun, nəqliyyat və enerji əməkdaşlığının, mədəni və humanitar təşəbbüslərin mühüm mərkəzlərindən birinə çevrilib. Azərbaycan həm Avropa, həm türk dünyası, həm islam dünyası dövlətləri, həm də Mərkəzi Asiya və Qlobal Cənub ölkələri ilə əlaqələrini ardıcıl şəkildə gücləndirir".
Deputat dövlətimizin uzun illərdir peşəkarlıqla, uzaqgörənliklə yürütdüyü ardıcıl siyasi xəttin davamı kimi Azərbaycan Prezidentinin son dövrdə həyata keçirdiyi fəal diplomatik təmaslara diqqət çəkib: "Prezident İlham Əliyevin Gürcüstana dövlət səfəri, Türkiyədə, Antalya Diplomatiya Forumu çərçivəsində keçirdiyi çoxsaylı görüşlər, Latviya və Ukraynanın prezidentlərinin, Litva, Çexiya, İtaliyanın baş nazirlərinin ölkəmizə səfərləri, Slovakiyanın Baş naziri Robert Fitsonun dövlətimizin başçısının Avropa Parlamenti ilə bağlı fikirlərinə açıq dəstəyini ifadə etməsi ölkəmizin xarici siyasətinin uğurlarıdır. Eləcə də mayın 15-də Qazaxıstanın Türküstan şəhərində Türk Dövlətləri Təşkilatının Dövlət Başçıları Şurasının növbəti qeyri-rəsmi zirvə görüşündə Azərbaycanın iştirakı və nəhayət, mötəbər, qlobal əhəmiyyətli tədbirlərdən olan Ümumdünya Şəhərsalma Forumunun 13-cü sessiyasının Bakıda keçirilməsi Azərbaycanın dünya miqyasında qazandığı nüfuzu bir daha təsdiqləyir".
"Sözügedən proseslərə Azərbaycan diplomatlarının gündəlik, bəzən görünməyən, lakin son dərəcə məsuliyyətli xidməti də öz töhfəsini verir. Diplomatlarımız arxa cəbhənin peşəkar əsgərləridir. Mən bu sahədə uzun illər çalışmış bir insan kimi deyə bilərəm ki, diplomatlarımız çox vaxt qürbətdə - Azərbaycanın hüdudlarından kənarda, fərqli siyasi və ictimai mühitdə, beynəlxalq qeyri-sabitlik fonunda ölkəmizin milli maraqlarının qorunması üçün çalışırlar. Ona görə də peşə öhdəliklərindən irəli gələn, hər an hazırlıq və çeviklik tələb edən həyat tərzi diplomatlarımızın sosial müdafiəsinin daha da gücləndirilməsini zəruri edir. Bu baxımdan düşünürəm ki, diplomatların dəstəklənməsi yalnız sosial siyasət məsələsi deyil, bu dövlət strategiyası, Azərbaycanın qlobal mövqelərinin daha da möhkəmləndirilməsi məsələsidir. Ona görə də hesab edirəm ki, "Diplomatik xidmət haqqında" qanuna təklif olunan dəyişikliklər olduqca lazımi və gözlənilən bir addımdır", - deyə Günay Əfəndiyeva əlavə edib.
Təhminə VERDİYEVA,
"Azərbaycan"
