Azərbaycan Hərbi Dəniz Qüvvələri ölkəmizə qarşı yönələ biləcək hər hansı bir həmləni dəf etməyə qadirdir
Bəlkə də min illər öncə deyilib bu məhşur kəlam. Kim bilir, bəlkə də elə yurdumuzun ömrü qədərdir bu sözlərin ömrü. Babalarımız elə bu torpaqları Vətən edəndə deyiblər: "Ordun varsa, yurdun var"...
Hər halda xalqın qan yaddaşından süzülüb gəlib, sınaqdan çıxıb, təsdiq olunub, özünə əbədiyaşarlıq qazanıb. Müstəqil dövlətin əsas atributlarındandır ordu. Xalqımızın böyük oğlu, Ulu Öndər Heydər Əliyev deyirdi: "Azərbaycan Ordusu dövlətin dayağı, xalqın güvənc yeri və qürur mənbəyidir". Şübhəsiz ki, güclü ordu ilə güclü dövlət anlayışı vəhdət təşkil edir. Dövlətin nüfuzu iqtisadi, siyasi və elmi potensialı ilə yanaşı, onun malik olduğu ordusunun qüdrəti ilə də ölçülür.
Azərbaycan Silahlı Qüvvələrinin yüksəliş tarixi bütün ömrünü xalqının xoşbəxt gələcəyi, azadlığı və müstəqilliyi uğrunda mübarizəyə həsr etmiş Ümummili Lider Heydər Əliyevin adı ilə sıx bağlıdır. Bu gün qürurla deyə bilərik ki, ölkəmiz iqtisadi və siyasi nailiyyətlərə imza atmaqla yanaşı, ordu quruculuğu prosesində də böyük uğurlar əldə edib. Bir həqiqətdir ki, bu gün Azərbaycanın Silahlı Qüvvələri Cənubi Qafqazın ən güclü ordusudur.
Şərqdə ilk demokratik respublika olan Azərbaycan Xalq Cümhuriyyəti xalqımızın dövlətçilik tarixində özünəməxsus rolu və miras qoyduğu yeni milli dəyərlərlə tarixiləşmişdir. 1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə Əlahiddə Azərbaycan Korpusu yaradılmışdır. Bu qərar Şərqin ilk demokratik hökumətinin öz ordusunu yaratmasına hüquqi əsas vermişdir.
Azərbaycanın Hərbi Dəniz Qüvvələri isə 1919-cu ilin avqustunda ingilislər ölkəmizi tərk etdikdən sonra formalaşmağa başladı. 1920-ci ildə Azərbaycan Xalq Cümhuriyyətinin süqutu bütün sahələrdə olduğu kimi, ordu quruculuğunda da işləri başa çatdıra bilmədi. Xalq Cümhuriyyətinin donanması Sovet Azərbaycanının Qırmızı donanması adlandırıldı və 1920-ci ilin yayında bu donanma Xəzər Dəniz Qüvvələrinin tərkibinə daxil edildi.
Müstəqillik bərpa olunduqdan sonra parlamentin 1991-ci il oktyabrın 9-da qəbul etdiyi "Azərbaycan Respublikası Silahlı Qüvvələri haqqında" qanuna əsasən, Silahlı Qüvvələrin tərkib hissəsi kimi Hərbi Dəniz Qüvvələrinin yaranmasının hüquqi bazası müəyyən edildi. Keçmiş SSRİ-nin tərkibində olmuş Xəzəryanı dövlətlər arasında əldə olunan razılığa əsasən, Azərbaycan onun ərazisində yerləşən sabiq Xəzər hərbi donanmasının bütün bazalarına və 25 faiz hərbi gəmilərinə sahib oldu.
Xatırladaq ki, 1990-cı illərin əvvəllərində Qarabağ uğrunda gedən döyüşlərdə iştirak etmək üçün Hərbi Dəniz Qüvvələrinin gəmi və sahil bölmələrinin heyətindən qısa müddətdə Dəniz Piyadası Taboru formalaşdırıldı. Ağdam-Tərtər istiqamətində düşmən hücumunun qarşısının alınması üçün 1994-cü il aprelin 19-da cəbhə bölgəsinə göndərildi və 1994-cü il iyulun 25-də vəzifə borclarını yerinə yetirdikdən sonra hərbi hissəyə döndü.
Və nəhayət, Ümummilli Lider Heydər Əliyevin 1996-cı ildə imzaladığı sərəncamla hər il avqustun 5-i ölkəmizdə Hərbi Dəniz Qüvvələri Günü kimi qeyd edilməyə başladı.
Müasir Azərbaycan dövlətinin qurtuluş və inkişaf dövrü xalqımızın Ümummilli Lideri Heydər Əliyevin adı ilə bağlıdır. Ulu Öndər Azərbaycanın hərtərəfli inkişafına, qüdrətlənməsinə öz töhfəsini verərək, onun gələcəyinin inkişaf strategiyasını müəyyən edib, ordu quruculuğu ilə bağlı genişmiqyaslı islahatlar aparıb. Və qısa müddətdə hərbi hissələrin, ayrı-ayrı qoşun növlərinin formalaşdırılması başa çatdırılıb. Ordunun mərkəzləşdirilmiş maddi-texniki təminatı əhəmiyyətli dərəcədə yaxşılaşdırılıb. Silahlı Qüvvələrin mükəmməl qanunvericilik bazası yaradılıb.
Ordumuzun qüdrətini vaxtında dəyərləndirən Ulu Öndər deyirdi: "Bizim ordumuz güclüdür. Ordumuzun gücü gündən-günə artır. Ölkəmizin gözəl gələcəyi var. Azərbaycan xalqı, Azərbaycan dövləti işğal olunmuş torpaqları mütləq azad edəcəkdir. Onu biz azad edəcəyik, biz! Biz bunu sülh yolu ilə həll etmək istəyirik. Bu barədə çoxlu səylər etmişik və bundan sonra da edəcəyik. Ancaq bizim bu səylər sonsuz olmayacaqdır. Biz bütün səylərimizi qoyub məsələni sülh yolu ilə həll etməyə çalışacağıq. Əgər bu, mümkün olmasa, bizim əziz zabitlərimiz, əziz Silahlı Qüvvələrimiz, siz torpaqlarımızın azad olunması üçün hər gün hazır olmalısınız! Torpaqlarımız azad olacaq, ordumuz inkişaf edəcək, respublikamızın iqtisadiyyatı yüksələcək və ən yaxın illərdə Azərbaycan böyük inkişaf yoluna qədəm qoyacaqdır. Buna əmin ola bilərsiniz".
Bütün sahələrdə Ulu Öndərin siyasi kursunu davam etdirən Prezident İlham Əliyev ordu quruculuğu sahəsində də ənənəyə sadiqlik nümunəsi göstərdi. Silahlı Qüvvələrimizin Ali Baş Komandanı İlham Əliyevin ciddi nəzarəti altında qısa müddət ərzində Azərbaycan Ordusu böyük inkişaf yolu keçdi və bölgənin ən güclü qüvvəsinə çevrildi. Ölkənin iqtisadi cəhətdən yüksəlişi hesabına Azərbaycan Ordusunun arsenalı ən müasir silah və hərbi texnika ilə gücləndirildi, hərbçilərin bilik və bacarıqları artırıldı, onların sosial müdafiəsinin, iş şəraitinin yaxşılaşdırılması istiqamətində mühüm addımlar atıldı. 2020-ci il sentyabrın 27-də Ermənistanın növbəti irimiqyaslı hərbi əməliyyatlara başlamasına, Azərbaycan Ordusunun mövqelərinə və mülki yaşayış məntəqələrinə atəş zərbələri endirməsinə cavab olaraq əks-hücum əməliyyatı işə düşdü, sonradan "Dəmir Yumruq" adını alan bu əməliyyat Vətən müharibəsinə çevrildi.
2020-ci il sentyabrın 27-də başlayan Vətən müharibəsi zamanı Hərbi Dəniz Qüvvələrinin Xüsusi Təyinatlıları döyüşlərdə fədakarlıq, əzmkarlıq, dözümlülük və qəhrəmanlıq göstərərək Zəngilan, Cəbrayıl, Füzuli, Qubadlı rayonlarının və Şuşa şəhərinin azad olunmasında fəal iştirak etdilər. İşğalçılarla mübarizədə Hərbi Dəniz Qüvvələrinin 9 hərbi qulluqçusu Vətən uğrunda şəhid oldu, 50 nəfər yaralandı. Prezidentin sərəncamlarına əsasən, Vətən müharibəsində xüsusi xidmətlərinə görə fərqlənmiş şəhid kiçik miçman Zalov Fəqan Amil oğluna ölümündən sonra və daha 2 hərbi qulluqçuya Vətən Müharibəsi Qəhrəmanı adı verildi, digərləri isə müxtəlif orden və medallarla təltif olundular.
Ulu Öndər deyirdi: "Sülh danışıqlarını cəsarətlə apara bilmək üçün güclü orduya malik olmaq lazımdır". Artıq zaman o zamandır. Azərbaycan 2020-ci ildə qazandığı böyük qələbədən sonra ədalətli şərtlərlə sülh müqaviləsini imzalamağa hazırlaşır. Qürurla qeyd edə bilərik ki, gündən-günə qüdrətlənən Azərbaycan Ordusu və onun Hərbi Dəniz Qüvvələri ölkəmizə qarşı yönələ biləcək hər hansı bir həmləni dəf etməyə hazır və qadirdir.
Elşən QƏNİYEV,
"Azərbaycan"
