Ölkəmizin iqtisadi imkanları artdıqca, xüsusən kəndlərimizdə uzun illərdən bəri yığılıb qalmış problemlərin həlli sürətlənir. Bu hesaba Qazaxın Daş Salahlı kəndi də istisna deyil. Görülən genişmiqyaslı işlər kəndin simasını başdan-başa dəyişmişdir.
Daş Salahlı rayonun ən böyük kəndlərindən biridir. Kənd 2550 evdən və 3000-dək təsərrüfatdan ibarətdir. Bu gün kəndin ərazisində yerləşən müəssisələrdən dünyanın 9 ölkəsinə məhsul ixrac olunur və 10 mindən çox sakini olan kənd əhalisinin əksəriyyəti həmin müəssisələrdə işləyir.
Son illər kəndin abadlaşdırılması istiqamətində genişmiqyaslı tikinti və quruculuq işləri aparılır, işıq, qaz, su və rabitə sahələrində əsaslı dönüş yaradılır. Kəndin ərazisindəki 30 kilometr uzunluğunda olan yollara çınqıl tökülmüş və yollar hamarlanmışdır. Kəndin işıqlandırılması sahəsində də xeyli iş görülmüşdür. Köhnə elektrik dayaqları yenisi ilə əvəz edilmiş, sip kabellər çəkilmişdir. Kəndin mərkəzindən keçən 300 metrlik hissəyə yeni işıq dayaqları basdırılmışdır. Şəxsi evlərlə yanaşı, kənddə olan sahibkarlıq obyektlərinin əraziləri də abadlaşdırılaraq müasir görkəmə salınmışdır. Yol kənarlarına ağaclar əkilmiş, kənddəki poçt binası, eləcə də 2 və 3 saylı körpələr evi-uşaq bağçaları əsaslı şəkildə təmir olunmuşdur.
Dövlət başçısı dəfələrlə demişdir ki, siyasətimizin mərkəzində Azərbaycan vətəndaşı dayanır. Odur ki, hər bir rəhbər işçinin əsas vəzifəsi vətəndaşları narahat edən problemləri, qaldırdıqları məsələləri, səsləndirdikləri fikirləri dinləmək, onların həlli istiqamətində əməli işlər görməkdir. Bu baxımdan rayon rəhbərliyi kənd və qəsəbələrin, o cümlədən Daş Salahlının abadlaşdırılması istiqamətində çoxsaylı tədbirlər həyata keçirirlər. Məsələn, təkcə son vaxtlar kənddə su xətti çəkilmiş, subartezian quyusu qazılmış, arxlar təmizlənmiş, bankomat qoyulmuş, Şəhidlər xiyabanı təmir olunmuş və digər işlər görülmüşdür. Ümumilikdə ötən illər ərzində kənd sakinləri tərəfindən qaldırılmış 51 məsələnin 31-i müsbət həll edilmişdir.
Birinci Qarabağ müharibəsində, həmçinin 44 günlük Vətən savaşında Daş Salahlı kəndinin 23 igid oğlu şəhidlik zirvəsinə ucalmışdır. Yalnız 44 günlük Vətən müharibəsində 2 nəfər müharibə əlili olmuşdur. Ümumiyyətlə, 44 günlük Vətən müharibəsində Daş Salahlı kəndindən 162 nəfər iştirak etmişdir. 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror əməliyyatı zamanı qanları ilə tarix yazan qəhrəmanlarımız arasında da Daş Salahlıdan oğullar olmuşdur.
Son illər kənddə aqrar sahənin inkişafı, əkin sahələrinin genişləndirilməsi istiqamətində bir sıra işlər görülmüşdür. Nəticədə 2016-cı ildən indiyədək əkin sahəsi 1980,8 hektardan 2514,3 hektara çatmışdır. Əkin sahələrinin su təminatının yaxşılaşdırılması istiqamətində də məqsədyönlü işlər görülmüşdür. Yeri gəlmişkən, qeyd edək ki, Abbasbəyli kəndində yerləşən Coğazçay su anbarından Daş Salahlı kəndinə gələn köhnə dəmir borular istismar müddətini başa vurduğu üçün kənd əhalisinin məişət suyu ilə təminatında müəyyən çətinliklər yaranmışdı. Daş Salahlı kənd bələdiyyəsi tərəfindən sözügedən dəmir borular yeni polietilen borularla əvəzlənmişdir. Bundan başqa, kənddə 10 subartezian quyusu sakinlərin istifadəsinə verilmişdir.
Əhalinin məşğulluğunun təmin olunması istiqamətində də xeyli iş görülmüşdür. 97 nəfər özünüməşğulluq proqramına cəlb olunmuşdur. Onlardan 1 nəfəri şəhid ailəsi üzvü, 26 nəfəri Vətən müharibəsi əlili, 70 nəfəri aztəminatlıdır.
Sabir ƏLİYEV,
"Azərbaycan"
jpg_1773219548.jpg)
