BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının - COP29-un başlamasına bir həftə qalmış nüfuzlu beynəlxalq təşkilatların diqqəti bu mühüm tədbirə yönəlib.
AZƏRTAC xəbər verir ki, Avropa Regionlar Komitəsi, BMT Fondu və Yaşıl İqlim Fondu kimi beynəlxalq qurumlar sosial media platformalarında COP29-un əhəmiyyətini vurğulayan paylaşımlar edərək, konfransın iqlim dəyişikliyi ilə qlobal mübarizə üçün önəmli bir platforma olduğunu qeyd ediblər.
Avropa Regionlar Komitəsinin üzvü Andries Grifroy COP29 konfransında regionlar və şəhərlərin rolunun vacibliyini vurğulayıb. O, iqlim danışıqlarında yerli və regional iştirakın əhəmiyyətini belə ifadə edib: “Biz, Avropa Regionlar Komitəsinin üzvləri olaraq, COP29 konfransında Yaşıl Sazişi gücləndirməyi planlaşdırırıq. Lakin bu, yalnız azaldılma (mitiqasiya) tədbirləri ilə məhdudlaşmamalıdır; uyğunlaşma (adaptasiya) tədbirləri də prioritet olaraq nəzərə alınmalıdır. Ümid edirəm ki, COP29-da qlobal Yaşıl Sazişdə yerli və regional rolumuzu daha da vurğulaya biləcəyik”.
BMT Fondu isə iqlim dəyişikliyinin təsirlərinin cəmiyyətləri uyğunlaşmağa məcbur etdiyini və mövcud maliyyələşmənin bu ehtiyacları qarşılamaqda yetərli olmadığını bildirir. Fondun mütəxəssisləri COP29-u dünya liderlərinin uyğunlaşma maliyyəsini artırmaq üçün mühüm bir fürsət olaraq görürlər. Onların fikrincə, bu konfrans iqlim dəyişikliyindən ən çox zərər çəkən inkişaf etməkdə olan ölkələr üçün tələb olunan maliyyənin təmin edilməsi baxımından dünya liderlərinin qarşısında duran ilk böyük imkanlardan biridir.
Yaşıl İqlim Fondu da COP29 öncəsi açıqlamalarında Paris Sazişi məqsədlərinə nail olmaq üçün davamlı sərmayələr qoyduğunu və iqlim maliyyələşdirilməsinin əsas platformalarından biri kimi çıxış etdiyini vurğulayıb. İnkişaf etməkdə olan ölkələrin ehtiyac və məqsədlərinə əsaslanan Yaşıl İqlim Fondu tərəfindən maliyyələşdirilən hər bir iqlim layihəsi hər kəs üçün davamlı və yaşana bilən bir planet yaratmağa yönəlib. Fond bu baxımdan COP29 konfransını əhəmiyyətli bir fürsət kimi dəyərləndirir.
Qeyd edək ki, COP29 noyabrın 11-dən 22-dək Bakı şəhərində keçiriləcək.
jpeg_1765955251.jpeg)
