Azərbaycanın Şanxay Əməkdaşlıq Təşkilatı (ŞƏT) ilə əlaqəsi Cənubi Qafqaz və Mərkəzi Asiyanın strateji yaxınlaşmasını təmsil edir. Prezident İlham Əliyevin son sammitlərdə, o cümlədən Tiencin sammitində fəal iştirakı Bakının bu platformaya güclü sadiqliyini göstərir.
Bu fikirləri AZƏRTAC-a məxsusi açıqlamasında “China Briefing” nəşrinin təsisçisi, siyasi şərhçi Şen Şivey deyib.
Çinin Azərbaycanın böyük potensialını qəbul edərək, onun ŞƏT daxilində statusunun yüksəldilməsinə dəstəyini dəfələrlə ifadə etdiyini bildirən ekspert əlavə edib ki, ilk növbədə Azərbaycan Orta Dəhliz üçün əsas dayaq nöqtəsidir. Qlobal təchizat zəncirləri şaxələndirildikcə bu marşrut Çin və Mərkəzi Asiyanı Avropa bazarlarına birləşdirən Avrasiya qarşılıqlı əlaqəsi üçün həyati əhəmiyyət kəsb edir. Azərbaycanın iştirakı ŞƏT-in nəqliyyat əlaqələrinin gücləndirilməsi məqsədinə birbaşa dəstək verir. İkincisi, Azərbaycan əsas enerji oyunçusudur. Etibarlı neft və qaz təchizatçısı olmaqla yanaşı, Bakı sürətli şəkildə yaşıl enerjiyə doğru irəliləyir. Mərkəzi Asiya, Qafqaz və Avropanı birləşdirən "Yaşıl Enerji Dəhlizi" konsepsiyası ŞƏT-in enerji təhlükəsizliyi gündəliyinə yeni bir ölçü təqdim edir və təşkilatın yaşıl sənayeləşmə səyləri ilə mükəmməl şəkildə uyğunlaşır.
“Nəticə olaraq, Azərbaycanın töhfəsi onun bağlantıları həyata keçirmək qabiliyyətindən ibarətdir. Azərbaycan nəqliyyat və enerji infrastrukturunu daha geniş ŞƏT çərçivəsi ilə inteqrasiya etməklə təşkilatı Sakit okeandan Xəzər dənizinə və ondan kənara qədər uzanan funksional iqtisadi bloka çevirməyə kömək edə bilər.
ŞƏT-in Bişkek zirvə toplantısına toxunan Şen Şivey sürətlə dəyişən dünyada ŞƏT daxilində dialoq və əməkdaşlıq imkanlarının yalnız əhəmiyyətli deyil, həm də vacib olduğunu bildirib.
“Keçən ilki Tiencin zirvə görüşündə bu impulsu birbaşa müşahidə edərək, deyə bilərəm ki, Bişkek strateji konsensusdan konkret icraya keçidin vacib bir mərhələsidir. Tiencin zirvə görüşü 2035-ci ilə qədər ŞƏT İnkişaf Strategiyasının əsasını qoyub və Bişkek indi sınaq meydançasıdır. İqtisadi cəhətdən imkanlar ənənəvi ticarətdən "yeni böyümə mühərriklərinə" keçir. Biz infrastruktur üçün uzunmüddətli maliyyələşdirmə boşluqlarını həll edəcək ŞƏT İnkişaf Bankı layihəsi üzərində sürətli irəliləyiş görürük. Bundan əlavə, əməkdaşlıq rəqəmsal iqtisadiyyata və yaşıl enerjiyə doğru aqressiv şəkildə genişlənir. "İpək Yolu Elektron Ticarəti”ndən Mərkəzi Asiyada birgə bərpaolunan enerji layihələrinə qədər təşkilat fəal şəkildə möhkəm təchizat zənciri və ortaq rəqəmsal gələcək qurur. Bir sözlə, ŞƏT təhlükəsizliyə yönəlmiş mexanizmdən qlobal idarəetmə və iqtisadi inkişaf üçün hərtərəfli platformaya çevrilir və parçalanmaya güclü alternativ təklif edir”, - deyə çinli ekspert deyib.
