Dövlət Sərhəd Xidmətinin “N” saylı hərbi hissəsində “Çevikçi” kursunu uğurla bitirmiş hərbi qulluqçulara beretlər təqdim olunub.
Xidmətin Mətbuat Mərkəzindən AZƏRTAC-a verilən məlumata görə, hərbi hissənin ərazisində şəhidlərimizin əziz xatirəsinə ucaldılmış abidə kompleksi ziyarət edilib, Dövlət Himni səsləndirilib, xalqımızın Ümummilli Lideri Heydəri Əliyevin və torpaqlarımızın azadlığı uğrunda şəhid olmuş vətən övladlarının əziz xatirəsi bir dəqiqəlik sükutla yad edilib.
Dövlət Sərhəd Xidmətinin rəisi general-polkovnik Elçin Quliyev çıxışında Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə ordu quruculuğu sahəsində həyata keçirilən ardıcıl və məqsədyönlü islahatların ölkənin müdafiə qüdrətini keyfiyyətcə yeni mərhələyə yüksəltdiyini xüsusi vurğulayıb. O bildirib ki, həmin strategiyanın tərkib hissəsi olaraq Dövlət Sərhəd Xidmətinin maddi-texniki bazası müasir tələblərə uyğun şəkildə gücləndirilib, şəxsi heyətin peşəkarlıq səviyyəsi daha da artırılıb və sərhəd mühafizəsi sistemi ən qabaqcıl texnologiyalar əsasında təkmilləşdirilib. Əldə olunan həmin uğurlar Dövlət Sərhəd Xidmətinin qarşısında duran vəzifələrin daha yüksək səviyyədə icrasına geniş imkanlar açıb, sərhədlərimizin toxunulmazlığının təmin edilməsində mühüm rol oynayıb.
Bildirilib ki, Dövlət Sərhəd Xidmətinin şəxsi heyəti müasir dövrün tələblərinə uyğun olaraq hazırlıqlı, vətənpərvər və yüksək intizamlı qüvvələr kimi formalaşır. Çevik Hərəkət Qüvvələrinin “Çevikçi” kursunu bitirmiş hərbi qulluqçulara bu gün təqdim edilən beretlər isə onların peşəkarlığının, döyüş hazırlığının və Vətənə sədaqətinin rəmzidir.
Beretləri böyük qürur hissi ilə qəbul edən hərbi qulluqçular göstərilən yüksək etimada görə Ali Baş Komandana dərin minnətdarlıqlarını ifadə edərək, Vətənə, millətə və Dövlət Bayrağına, eləcə də Ulu Öndər Heydər Əliyevin dövlətçilik ideyalarına daim sadiq qalacaqlarına, Vətənin müdafiəsinə hər an hazır olacaqlarına, bu müqəddəs amal uğrunda canlarını əsirgəməyəcəklərinə and içiblər.
jpg_1775827047.jpg)
jpg_1775472819.jpg)
