Cəbrayıl şəhər Mehdi Mehdizadə adına tam orta məktəbdə 8 Noyabr - Zəfər Gününə həsr olunan bayram tədbiri keçirilib.
AZƏRTAC-ın bölgə müxbiri xəbər verir ki, bayram tədbiri Mehdi Mehdizadə adına tam orta məktəb və Novruz Aslanov adına Cocuq Mərcanlı kənd orta məktəbinin birgə əməkdaşlığı ilə gerçəkləşib. Tədbirdə hərbçilər, Cəbrayıl şəhər sakinləri, hər iki məktəbin müəllim və şagird kollektivi iştirak edib.
Əvvəlcə Dövlət Himni səsləndirilib, Ulu Öndər Heydər Əliyevin və şəhidlərin xatirəsi bir dəqiqəlik sükutla yad olunub.
Çıxış edən Mehdi Mehdizadə adına tam orta məktəbin direktoru Şəlalə Qasımlı və Novruz Aslanov adına Cocuq Mərcanlı kənd orta məktəbin direktoru Zamin Həziyev Vətən müharibəsində qazanılan Qələbədən və azad edilən ərazilərdə həyatın yenidən canlanmasından söhbət açıblar. Bildirilib ki, Azərbaycan Ordusunun Aprel Zəfərindən sonra Prezident İlham Əliyevin tapşırığına əsasən, Cocuq Mərcanlı kəndi qısa müddətdə yenidən qurulub və “Böyük Qayıdış” Proqramı çərçivəsində kəndin sakinləri doğma yurdlarına qayıdıblar. Azad olunan ərazilər üzrə təhsil də məhz Cocuq Mərcanlı kəndindən başlayıb. Aprel Zəfərindən 4 il sonra 44 günlük Zəfər yürüşü zamanı isə Müzəffər Ali Baş Komandan İlham Əliyevin rəhbərliyi ilə Azərbaycan Ordusu torpaqlarımızı işğaldan azad etdikdən sonra qısa zaman kəsiyində bu ərazilərdə də tikinti-quruculuq işləri görülərək, sakinlərin doğma yurdlarına qayıdışı təmin olunub, şagirdlərin yüksək səviyyədə təhsili üçün məktəb binaları inşa edilib.
Bildirilib ki, Mehdi Mehdizadə adına tam orta məktəb də azad olunan ərazilərdə tədrisin ilk başladığı təhsil ocaqlarından biridir.
Daha sonra şanlı Zəfərə həsr olunan videoçarx nümayiş etdirilib.
Hər iki məktəbin şagirdləri şeir söyləyib, musiqili kompozisiya ilə çıxış ediblər. Tədbir Cəbrayıl şəhər Mehdi Mehdizadə adına tam orta məktəbin müəllim kollektivinin ifasında “Azərbaycan sənsən mənim” mahnısı ilə sona çatıb.
jpg_1730754311.jpg)
