"Cəbrayıl rayonu coğrafi cəhətdən Azərbaycan üçün çox əhəmiyyətli ərazidə yerləşir. Eyni zamanda, rayon yeraltı, yerüstü sərvətlərlə zəngindir".
Bu sözləri qəzetimizə açıqlamasında Milli Məclisin deputatı Kamilə Əliyeva deyib. O bildirib ki, Cəbrayılın torpağı olduqca münbit olduğundan əhali üzümçülük, baramaçılıq, heyvandarlıq ilə məşğul olub.
İşğaldan əvvəl rayonunun əhalisinin 52 min nəfər oldugunu qeyd edən deputat bildirib ki, Cəbrayıl 1993-cü il avqustun 23-də Ermənistan silahlı qüvvələri tərəfindən işğal edilib. "Cəbrayıllılar Azərbaycan əsgərləri ilə birlikdə öz ata yurdları uğrunda mərdliklə vuruşdular. 362 şəhid, 191 nəfər əlil oldu, 6 cəbrayıllı Milli Qəhrəman adına layiq görüldü. Məcburi köçkün düşən cəbrayıllılar respublikamızın 58 rayonunda məskunlaşdırıldı. Hər birimiz kimi cəbrayıllılar da inanırdılar ki, Ali Baş Komandan cənab İlham Əliyev işğal altında olan torpaqlarımızı işğaldan azad edəcək”, - deyə o əlavə edib.
Müzəffər Ali Baş Komandan İlham Əliyevin komandanlığı ilə Azərbaycan Ordusunun 2020-ci il sentyabrın 27-də Ermənistan silahlı qüvvələrinin hərbi təxribatının qarşısını almaq üçün əks-hücum əməliyyatlarına başladığını xatırladan K.Əliyeva vurğulayıb ki, Vətən müharibəsi kimi tarixə düşən bu savaşın elə ilk günündən Azərbaycan oğulları böyük igidlik, qəhrəmanlıq göstərib: "Müharibənin ilk günü ordumuz Cəbrayıl rayonunun Böyük Mərcanlı və Nüzgar kəndlərini, 3 oktyabrda 5 kəndi işğaldan azad etdi. Oktyabrın 4-də isə rəşadətli ordumuz cəbrayıllılara, o cümlədən, bütün xalqımıza böyük sevinc bəxş etdi. Cəbrayıl şəhəri də daxil olmaqla rayonun daha 9 kəndi erməni işğalından azad edildi. Cəbrayıl rayonu ərazisində həyata keçirilən uğurlu hərbi əməliyyatlar nəticəsində bir şəhər, 80 kənd erməni işğalından azad edildi. Bununla da Cəbrayıl rayonu 27 illik işğaldan sonra azad edildi".
Deputat qeyd edib ki, "Cəbrayılın azad olunmasına görə" medalı təsis edildikdən sonra Cəbrayıl rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət göstərmiş Silahlı Qüvvələrin 22775 hərbi qulluqçusu bu medalla təltif edilib.
Ölkə başçısı İlham Əliyevin Cəbrayıl rayonu ərazisində yerləşən Xudafərin körpüsündə Azərbaycan bayrağını dalğalandırması böyük tarixi və siyasi əhəmiyyət kəsb etdi. Azərbaycan Ordusunun cəsur əsgər və zabitləri böyük qəhrəmanlıq və şücaət göstərərək Ermənistan ordusunun Cəbrayıl ərazisində bir neçə xətdən ibarət müdafiə istehkamlarını darmadağın etdi. Cəbrayılın işğaldan azad edilməsi ordumuzda böyük ruh yüksəkliyi yaratdı. Cəbrayılın ardınca Xocavənd rayonunun cənub kəndləri işğaldan azad edildi və strateji əhəmiyyətə malik Hadrut qəsəbəsi istiqamətində irəlilədik. Üstəlik, Zəngilan, daha sonra Qubadlı və Laçın rayonlarının cənub hissəsi işğaldan azad edildi, Laçın dəhlizi Azərbaycanın nəzarətinə götürüldü.
Cəbrayılda böyük quruculuq işlərinin davam etdiyini qeyd edən K.Əliyeva deyib ki, rayona müasir standartlara cavab verən 4-5 zolaqdan ibarət yollar çəkilir. Böyük infrastruktur layihələr həyata keçirilir. "Qeyd edim ki, Prezident cənab İlham Əliyevin 31 iyul 2023-cü il tarixli Sərəncamı ilə İşğaldan azad edilmiş ərazilər üzrə şəhər günü təsis edilib. Həmin Sərəncama əsasən, 4 oktyabr Cəbrayıl şəhəri günü kimi qeyd edilib. Müharibə başa çatdıqdan sonra dövlət başçısı 7 dəfə Cəbrayıl rayonuna səfər edib. Ölkə rəhbəri bu səfərlər zamanı çoxlu sayda sosial obyektlərin, yeni müəssisələrin, yaşayış binalarının təməlqoyma mərasimlərində iştirak edib.Artıq cəbrayıllılar daha gözəl, müasir Cəbrayıla, öz ata yurdlarına dönürlər",- deyə deputat əlavə edib.
Əsmər QARDAŞXANOVA,
"Azərbaycan"
jpg_1766048684.jpg)
