İşğaldan azad olunmuş ərazilərimizdə dövlətimizin öz gücü hesabına həyata keçirdiyi irimiqyaslı bərpa-quruculuq işləri sürətlə davam edir. Gündən-günə abadlaşan, gözəlləşən Qarabağ və Şərqi Zəngəzur mərhələli olaraq sakinlərinə qovuşur.
İşğaldan azad edilmiş digər şəhər və kəndlərimizlə yanaşı, el-obalarından didərgin salınmış cəbrayıllılar da dədə-baba yurdlarına qayıdırlar. Bu qayıdış karvanları həyatın ən çətin, ən ağır üzünü görmüş insanları əzəli torpaqlarına qovuşdurur.
Dünən Cəbrayıl şəhərinə növbəti köç karvanı yola salınıb. Bu mərhələdə şəhərə daha 32 ailə - 153 nəfər köçürülüb. Bununla da indiyədək Cəbrayıl şəhərində 358 ailənin, yəni 1487 nəfərin daimi məskunlaşması təmin edilib.
"Dövlət başçımıza həmişə güvənmişik"
Uzun illərin həsrətindən sonra torpaqlarına qovuşan cəbrayıllıların sevinci üz-gözlərindən duyulur. Bir daha Cəbrayılı görməyəcəyini düşündüyünü söyləyən keçmiş məcburi köçkün Çərkəz Quliyev deyib ki, bu gün onun həyatının ən sevincli günüdür: "Belə gözəl günləri yaşadığım üçün özümü çox qürurlu hiss edirəm. Dövlət başçımıza həmişə güvənmişik, düz də etmişik. Həmişə də onun yanında olacağıq. Başda Ali Baş Komandan olmaqla, Milli Ordumuzun hər bir üzvünə, hər bir zabit və əsgərinə bizə bu günləri yaşatdığı üçün öz minnətdarlığımı bildirirəm. Torpaqlarımız uğrunda həyatlarını qurban vermiş şəhidlərimizə rəhmət diləyirəm. Mən öz rəhbərliyimizlə, xalqımızla, ordumuzla, mübariz oğullarımızla fəxr edirəm".
30 ildən çoxdur bu günün xəyalı ilə yaşadığını deyən Məhəmmədəli İsayev ömrünün ən gözəl çağlarını yaşadığını dilə gətirir. Keçmiş məcburi köçkünün sözlərinə görə, Cəbrayıla qayıtmaq həmişə onun namazlarında, dualarında, arzularında, xəyallarında olub: "Bu gün bütün dualarımızın qəbul olunduğu gündür. Sevincimizi sözlərlə ifadə etmək mümkün deyil. Cəbrayıla köçəndən sonra Allah ömür versə, yaşayacağam, verməsə də, bu dünyadan gözüaçıq getməyəcəyəm. Ölsəm də, dərdim olmaz, dünyadan arxayın gedərəm".
Böyük sevinc və qürurla evinə, doğma ocağına qayıtdığını deyən cəbrayıllı Şərqiyyə Abbasovanın sözlərinə görə, bu hissləri sözlərlə izah etmək mümkün deyil: "44 günlük müharibədə biz xalq olaraq "dəmir yumruq" kimi birləşməyi öyrəndik. Allah bizim xalqımızın birliyini qorusun! Azərbaycan ərazi bütövlüyünü öz gücü, qüdrəti hesabına təmin etmiş suveren, qüdrətli dövlətdir. Azərbaycanlı olduğumuz üçün qürur duyuruq. 33 yaşımda çıxmışdım Cəbrayıldan. Yoldaşımı itirdim, dörd yetimlə 30 il köçkün həyatı yaşadım. Amma bu yaşadığım çətinlik bu qələbə sayəsində gözümdə heçə döndü. Doğma torpağımıza - Cəbrayılımıza qızım və nəvələrimlə gəldim. İgid oğullarımız sıldırım qayaları, aşılmaz sədləri aşaraq adlarını tarixə yazdılar. Bundan sonra minillər keçsə də, bizim bu şanlı tariximizi heç bir qüvvə silə bilməz".
10 min nəfərdən çox keçmiş məcburi köçkün yurduna qovuşub
Məqsədyönlü və genişmiqyaslı işlər sayəsində Qarabağ və Şərqi Zəngəzurda əhalinin məskunlaşması təmin edilir. Keçmiş məcburi köçkünlərin doğma yurda qayıdışı ilə bağlı qarşıya qoyulan vəzifələr uğurla həyata keçirilir. Ermənilərin xarabalığa çevirdiyi məkanlarımızda yeni yollar çəkilir, infrastruktur layihələri həyata keçirilir, tarixi-mədəniyyət və dini abidələr bərpa olunur.
Böyük qayıdış proqramına əsasən, ilk beşillikdə 34 min 500 ailə azad edilmiş ərazilərə köçürüləcək. Bu istiqamətdə davamlı məqsədyönlü tədbirlər həyata keçirilir. İndiyədək 175 ailə (871 nəfər) Zəngilan rayonunun Ağalı kəndində, 20 ailə (90 nəfər) Tərtər rayonunun Talış kəndində, 570 ailə (2090 nəfər) Laçın şəhərində, 823 ailə (3136 nəfər) Füzuli şəhərində, 217 ailə (823 nəfər) Laçın rayonunun Zabux kəndində, 59 ailə (215 nəfər) Laçın rayonunun Sus kəndində, 371 ailə (1396 nəfər) Şuşa şəhərində, 52 ailə (204 nəfər) Xocalı şəhərində, 358 ailə (1487 nəfər) Cəbrayıl şəhərində, Xocalı rayonunun Ballıca kəndində 68 ailə (373 nəfər) məskunlaşıb. Ümumilikdə 2713 ailə - 10685 nəfər ocağına geri dönüb. Həyata keçirilən davamlı tədbirlər sayəsində tezliklə bütün işğaldan azad edilmiş şəhər və kəndlərdə həyat yenidən öz axarına qayıdacaq.
Ülkər XASPOLADOVA,
"Azərbaycan"
