Sinqapur Milli Universitetinin Rəqəmsal Təbabət İnstitutunun direktoru, professor Din Ho uzunömürlülük sahəsində diqqətçəkən elmi tədqiqata imza atıb. O, təkbaşına iştirakçısı olduğu “DELTA” adlı təcrübə sayəsində bioloji yaşını 15 il azaldaraq 32-yə endirib.
“MedicalXpress” portalının məlumatına görə, gündəlik sağlamlıq göstəricilərinin zamanla necə dəyişdiyini öyrənmək istəyən professor 2024-cü ilin avqust ayından etibarən öz həyat tərzində kəskin dəyişikliklər edib və orqanizminin buna reaksiyasını real vaxt rejimində izləyib.
Professor tətbiq etdiyi həyat tərzi rejiminə hər gün təxminən 20 saatlıq oruc və müəyyən aralıqlarla 48 saatlıq tam aclıq dövrləri daxil edib. O, hər səhər 90 dəqiqəlik güc və ya kardioməşqlər edib, qidalanmasında isə tərəvəzlər, tumlar, zeytun yağı və yağsız zülalla zəngin pəhrizə üstünlük verib. Qəbul etdiyi mayelər yalnız su, mineral tərkibli su, şəkərsiz, südsüz qara qəhvə və çay ilə məhdudlaşıb. Bədən göstəricilərini anbaan izləmək üçün isə o, eyni vaxtda üç fərqli ağıllı qolbaqdan (“Whoop”, “Garmin” və “Apple Watch”) istifadə edib.
Eksperiment nəticəsində professorun bədəninin qənd yandırmaqdan yağ yandırmağa keçid müddəti 24 saatdan 16,5 saata düşüb ki, bu da onun yaşındakı şəxslər üçün normal sayılan 36-72 saatlıq göstəricidən qat-qat sürətlidir. Onun istirahət halındakı ürək döyüntüsü dəqiqədə 65-dən 46-ya enib. Bu isə ürəyin daha effektiv işlədiyini və bərpa olunduğunu göstərir. Yuxu rejimi də əhəmiyyətli dərəcədə yaxşılaşaraq gecə yarısından axşam saat 21:00-a çəkilib, ümumi yuxu müddəti 5 saatdan 8 saata qədər artıb və dərin yuxu keyfiyyəti yüksəlib. Nəticədə, tədqiqatçılar tərəfindən hazırlanan xüsusi süni intellekt modeli Ho-nun bioloji yaşını real yaşından 15 il kiçik - 32 yaş olaraq qiymətləndirib.
“PLOS One”da dərc edilən həmin araşdırma rəqəmsal təbabət və fərdiləşdirilmiş qocalma əleyhinə tədqiqatlar sahəsində yeni bir mərhələ hesab olunur.
Təhminə VERDİYEVA,
“Azərbaycan”
677jpg_1790033437.jpg)
