Xəzərin sahilini özünə məkan seçmiş Sumqayıt bu gün tarixinin yeni səhifələrini yazır. Şəhər salınanda, onun sonrakı inkişaf mərhələlərində heç kimin ağlına gəlməzdi ki, bir zaman keçmiş SSRİ-nin ekoloji cəhətdən ən çirkli şəhəri hesab edilən Sumqayıt vaxt gələcək təkcə Azərbaycanın yox, regionun ən təmiz, ən abad sənaye mərkəzlərindən olacaq.
Buna əmin olmaq üçün Sumqayıt bulvarını gəzmək bəs edir. 2016-cı ildə yaradılan və onun açılışını edən Prezident İlham Əliyev buranı bir möcüzə kimi dəyərləndirmişdir. Həmin zamandan etibarən Sumqayıt bulvarı yerli sakinlərin və qonaqların sevimli məkanına çevrilib.
Sumqayıt bulvarının uzunluğu 5 kilometrə yaxındır. Dəniz səviyyəsindən 2,5 metr yüksəklikdə yerləşən bulvarda 55 hektar yaşıllıq zolağı salınıb. 160 mindən çox ağac və dekorativ kol, 2 milyondan artıq gül və çiçək əkilib. Həmçinin 76 hektar ərazidə kommunikasiya xətləri çəkilib, müxtəlif ölçülü 1500 işıq dirəyi və işıqlandırma sistemləri quraşdırılıb, sakinlərin rahat istirahəti üçün 600-dən artıq oturacaq qoyulub. Bulvarın ərazisində müxtəlif yerlərdə 50 kölgəlik yaradılıb, 5 rəngli fontan inşa edilib, velosipedçilər üçün xüsusi hərəkət zolağı və piyada yolu salınıb, 5 kilometr yola asfalt döşənib, 30 hektar əraziyə daş döşənib.
Bunlardan əlavə, ərazidə Bayraq meydanı, sahildə gəzinti gəmilərinin yan alması üçün dənizin içərisinə doğru 500 metr uzunluğunda tərsanə tikilib. Bulvardakı Bayraq muzeyi və Muğam evi də gəzintiyə gələnlərin ən çox təşrif buyurduqları məkanlardır.
Bulvarda kiçik ölçülü gəzinti avtobusları üçün avtomobil yolu da salınıb. Elektriklə işləyən bu nəqliyyat vasitələrində gəzmək xüsusi zövq verir. Həmçinin kafe-çay evləri, istirahət obyektləri, attraksionlar, kinoteatr, tennis kortu, futbol meydançaları, yay musiqi səhnəsi, ticarət və uşaqlar üçün əyləncə mərkəzləri yaradılıb. Hazırda Sumqayıt bulvarının genişləndirilməsi və orada yaşıllaşdırma işləri davam etdirilir və yaxın gələcəkdə bulvarın ərazisinin bir neçə hektar genişləndiriləcəyi nəzərdə tutulur.
Bu gün isə bulvarın yaxınlığında pansionatlar, hotellər və istirahət mərkəzləri tikilir. Bütün bunlar yaxın gələcəkdə şəhər turizminin inkişaf edəcəyinə hesablanıb. Şəhərin beynəlxalq əlaqələrinin genişlənməsi isə bu prosesə əlavə güc verəcək. Sumqayıtın hazırda dünyanın onlarca şəhəri ilə qarşılıqlı ticarət əlaqələri var. Ümumiyyətlə, son 10 ildə Sumqayıtın beynəlxalq əlaqələri xeyli genişlənib. Almaniya, Bolqarıstan, Rumıniya, İtaliya, Rusiya, Belarus və digər ölkələrdə Sumqayıt yaxşı tanınır. Yeri gəlmişkən qeyd edək ki, Sumqayıt bulvarı Avropada keçirilən onlarca yarışmada uğura imza atıb və o, xüsusi zonalar siyahısına salınıb.
Sumqayıtda turizmin inkişafına təkan verən cəhətlərdən biri də şəhərin sənaye potensialının yenilənməsidir. Bu gün Sumqayıtda sovet dönəmində olduğu kimi, zavodların bacalarından müxtəlif rəngli zəhərli tüstü çıxmır. Artıq Sumqayıt ölkəmizin təmiz havaya malik olan şəhərlərindən sayılır, tullantısız sənaye mərkəzi hesab olunur.
Akif ƏLİYEV,
“Azərbaycan”
