Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) dünya dövlətlərinin ciddi marağına səbəb olub. COP29 məkanında dünyanın müxtəlif regionlarından olan nümayəndələr xarici pavilyonlarla yanaşı, milli pavilyonlara da xüsusi maraq göstərirlər.
COP29 sədrliyi iqlim dəyişmələri, münaqişə və humanitar ehtiyaclar kimi aktual problemlərin həllinə yönəlmiş mühüm təşəbbüs - Sülh, Yardım və Bərpa üçün İqlim Fəaliyyətinə dair Bakı Çağırışına (BCCAP) start verib.
İqlim dəyişməsinin su qıtlığı, ərzaq məhsullarının çatışmazlığı, torpaqların deqradasiyası və insanların yer dəyişməsi kimi mənfi təsirlərin, xüsusilə iqlim dəyişməsinə ən həssas olan regionlarda münaqişə və qeyri-sabitlik üçün katalizator rolunu oynadığı getdikcə daha çox aydın olur.
Sözügedən çağırış Azərbaycan Respublikasının xarici işlər naziri Ceyhun Bayramov tərəfindən COP29-un Sülh, Yardım və Bərpa Gününün açılışı münasibətilə keçirilən "İqlim və Sülh: Hər kəsin iştirakını təmin etmək üçün birgə fəaliyyətə təkan vermək" adlı yüksəksəviyyəli panel sessiyasında elan edilib. Tədbir iqlim dəyişməsi nəticəsində yaranan münaqişələrin qarşısının alınmasına, həm iqlim təsirlərinə, həm də münaqişələrə həssas olan ölkələrə, xüsusən də mühüm humanitar ehtiyacları olanlara dəstəyin artırılmasına yönəlmiş strategiyanı formalaşdırmaq üçün dünya miqyasında Şimal və Cənub ölkələrindən nazirlər və hökumət nümayəndələrini bir araya gətirib. Qəzetimizin əməkdaşları dünən COP29-un sədrliyi tərəfindən təşkil və idarə olunan "yaşıl zona"da konfrans iştirakçılarının fikirlərini öyrənib.
Ailə, Qadın və Uşaq Problemləri üzrə Dövlət Komitəsi yanında İctimai Şuranın üzvü, Gənclərin Antinarkomaniya İctimai Birliyinin sədri Billur Məmmədova deyir ki, COP29-un Azərbaycan paytaxtında keçirilməsi, hökumət və vətəndaş cəmiyyətləri nümayəndələrinin, elm adamlarının və ekspertlərin Bakıda toplaşaraq iqlim böhranının həlli yollarını müzakirə etməsi həm ölkəmiz, həm region, həm də ümumilikdə bəşəriyyət üçün əhəmiyyətli nəticələr vəd edir.
Konfrans zamanı ölkəmizə qarşı obyektiv münasibəti ilə seçilən QHT nümayəndələri, dünyaca məşhur ekofəallar ilə intensiv görüşlərimizi davam etdiririk. Hesab edirəm ki, COP29 QHT-lərin beynəlxalq əməkdaşlıqlarını genişləndirmək üçün də çox gözəl bir fürsət oldu. Yeni QHT nümayəndələri ilə tanışlıq əməkdaşlıq inkişafı üçün faydalı olacaq.
COP29-un ölkəmizin iqtisadi inkişafına müsbət təsirləri olacaq. COP29-un müsbət nəticəsindən danışarkən, ilk növbədə onun turizm sektorunun canlanacağına təsirini xüsusi vurğulamaq istəyirəm. Tədbir yeni investisiyaların və texnologiyaların cəlb olunmasına şərait yaradacaq, "yaşıl enerji"nin inkişafını təşviq edəcək. Digər tərəfdən, ölkəmizin beynəlxalq əlaqələri daha da möhkəmlənəcək. COP29 işğaldan azad edilən ərazilərdəki ekoloji problemlərin həlli üçün də olduqca vacib bir platformadır.
COP29 çərçivəsində əldə olunan əməkdaşlıq və təcrübə mübadiləsi Azərbaycana iqlim siyasətində daha böyük addımlar atmasına imkan verəcək. Bu tədbir ölkənin iqlim siyasətini, o cümlədən bu sahədə beynəlxalq əməkdaşlıqları gücləndirəcək, qlobal və regional miqyasda iqlim dəyişikliyi ilə mübarizənin səmərəliliyinin artırılması üçün ciddi təsir göstərəcək. Hesab edirəm ki, ölkəmizin qazandığı bütün uğurlar xalqımızın xoşbəxt və firavan gələcəyi üçün edilir. Bu münasibətlə bütün xalqımızı təbrik edirəm, Azərbaycan COP29 tədbiri ilə dünyada çox möhtəşəm bir uğura imza atdı.
Söhbətimizi ingiltərəli nümayəndə Paul Jaskamanla davam etdiririk. Paul deyir ki, fərəhlənə bilərsiniz ki, bu gün ölkəniz dünyanın mərkəzinə çevrilib. COP29-da iştirak edən və etməyən, hətta COP29 əleyhinə təbliğat aparan dövlətlərin də diqqəti hazırda Azərbaycana yönəlib. Belə bir mötəbər tədbirə evsahibliyi etməklə Azərbaycan dünyanın siyasi-iqtisadi xəritəsindəki nüfuzunu bir daha təsdiq etdi.
"Bakının dünyanın enerji təhlükəsizliyindəki rolu inkaredilməzdir. Tezliklə "yaşıl enerji" ixracatçısı kimi də respublikanızın öz sözünü deyəcəyi şübhə doğurmur. Bildiyim qədəri ilə "yaşıl enerji"nin ixracı istiqamətində də tədbirlər sürətli şəkildə davam edir. "Xəzər-Qara dəniz-Avropa", "Azərbaycan-Mərkəzi Asiya-Avropa", "Azərbaycan-Türkiyə-Avropa" enerji dəhlizləri üzərindən ötürüləcək "yaşıl elektrik enerjisi" Avropanın enerji təhlükəsizliyinə sanballı töhfə verəcək. Bizə təqdim edilən layihədə "Xəzər-Qara dəniz-Avropa "yaşıl enerji" dəhlizi" layihəsi 2030-cu ilə qədər yaradılacaq. 7 GVt gücün 4 GVt-ı Qara dəniz vasitəsilə "Xəzər-Qara dəniz-Avropa "yaşıl enerji" dəhlizi" ilə ixrac üçün nəzərdə tutulub. Bu da "yaşıl enerji" sahəsində çox uğurlu bir nəticə deməkdir. Ölkələrimiz arasında qarşılıqlı əməkdaşlığın və dostluq münasibətlərinin tarixi çox qədimdir. Dost ölkə olan Azərbaycanın bütün uğurları bizi məmnun edir".
Digər britaniyalı həmsöhbətimiz isə Neil Jervon oldu. Neil deyir ki, COP29 konfransı istər yaxşı təşkil olunması, istərsə də işgüzarlığı ilə yaddaşımda qalacaq. İlk növbədə COP29-un belə mütəşəkkil və möhtəşəm keçirilməsində əməyi olan təşkilatçılara minnətdaram. Azərbaycanda özümüzü doğma evimizdəki kimi hiss edirik. İnsanların bizə göstərdiyi xoş münasibət, ən başlıcası, doğmalıq və mehribanlıq məni məmnun edir. Bakının harasında olduqsa, bizi doğma insanlar kimi qarşıladılar. Londona döndükdən sonra burada gördüyüm gözəl xalq barədə dostlarıma da məlumat verəcəyəm.
Zambiyalı Petronella Chinqina deyir ki, COP29 yeni iqtisadi əlaqələrin qurulması üçün iştirakçı dövlətlərə verilmiş bir fürsətdir. İngiltərəli Neillə burada tanış olmuşuq. Dostluğumuz yeni iqtisadi əlaqələrin qurulması üçün çox möhkəm körpü olacaq. Bu fürsəti bizə yaratdığı üçün ömrümüz boyu Azərbaycana minnətdar olacağıq.
Elşən QƏNİYEV,
"Azərbaycan"
