Payız - rənglərin dəyişdiyi, təbiətin səssizcə özünü yenilədiyi mövsümdür. Rəssamlar bu gözəl fəsli öz fırçaları ilə əks etdirir, yarpaqların saralması, Günəşin isti tonları və son baharın rəngini daşıyan ağacları kətan üzərində canlandırır.
Qardaş ölkədən olan, Azərbaycanı doğma diyar, Bakını özünə doğma şəhər bilən türkiyəli rəssam Zəkiyə İnan bu mövsümün sehrini öz füsunkar yaradıcılıq dili ilə noyabrın 28-də “Bakı” Rəsm Qalereyasında tamaşaçılara təqdim edib.
Sənətçinin “Payız yarpaqları” adlı fərdi sərgisində 80-ə yaxın yağlı boya, sulu boya və xəttatlıq nümunələri nümayiş etdirilib.
Sərgi “İçərişəhər” Dövlət Tarix-Memarlıq Qoruq İdarəsi və Azərbaycan Rəssamlar İttifaqının təşkilati dəstəyi ilə gerçəkləşib.
Tədbirdə “Bakı” Rəsm Qalereyasının rəhbəri, rəssam Eldəniz Babayev çıxış edərək Zəkiyə İnanın yaradıcılığının İçərişəhərin qədim ab-havası ilə vəhdət təşkil etdiyini vurğulayıb. O bildirib ki, belə sərgilər İçərişəhərin mədəni həyatına yeni nəfəs gətirir və sənətin üfüqlərini genişləndirir.
"İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud sərginin tarixi məkanlarda müasir sənətin təbliği baxımından böyük əhəmiyyət daşıdığını qeyd edib. O vurğulayıb ki, bu kimi tədbirlər İçərişəhərin zəngin irsini müasir yaradıcılıqla birləşdirərək, məkanı canlı bir mədəni platformaya çevirir.
Bakı Şəhər Mədəniyyət Baş İdarəsinin rəisi İbrahim Əliyev çıxışında Azərbaycan–Türkiyə mədəni əlaqələrinin sənət vasitəsilə daha da möhkəmləndiyini vurğulayıb, belə sərgilərin gənc istedadların tanınmasına və ölkələrarası mədəni dialoqun genişlənməsinə xidmət etdiyini əlavə edib.
Rəssam Zəkiyə İnan bildirib ki, onun məqsədi sərgidə payızın gözəlliyini və duyğularını tamaşaçılara çatdırmaq, həmçinin Azərbaycan ilə Türkiyə arasında mədəni və sənət əlaqələrini gücləndirməkdir.
Digər çıxış edənlər də rəssamın əsərlərində payızın duyğulu qatlarını, təbiətə zərif yanaşmasını və iki ölkə arasında qurulan sənət körpüsünün əhəmiyyətini vurğulayıblar.
Sərgi dekabrın 1-dək davam edəcək.
Zəkiyə İnan 1962-ci ildə Türkiyənin İsparta şəhərində anadan olub. O, Antalya Akdeniz Universitetinin İnşaat mühəndisləri fakültəsini bitirib.
Gənclik dövründə təsviri sənətə olan həvəsi sayəsində 1999-2004-cü illərdə İstanbulun “Ulduz” sarayında hüsnxət, “Taksim Pera” sənət məktəbində isə rəssamlıq sənətinin sirlərini öyrənib. 2000-ci ildə rəssamın əsərləri İstanbulda “Camal Rəşid Rəy” sərgi salonunda nümayiş etdirilib.
2004-cü ildən Zəkiyə xanım Bakıya gələrək Azərbaycanın Xalq rəssamı, professor Arif Əzizovdan sənət dərsləri alıb. 2009-cu ildə “Bakı” Rəsm Qalereyasında ilk fərdi sərgisi açılıb.
AZƏRTAC
