Bakı metrosunun nəqliyyat xəritəsində əsaslı keyfiyyət dəyişikliyinə və sərnişin sıxlığının köklü həllinə hədəflənən mühüm layihənin icrasına start verildi. Azərbaycan Respublikası Prezidentinin Sərəncamı ilə təsdiqlənmiş “Bakı şəhərində və ətraf ərazilərdə infrastrukturun bərpasına dair 2025-2030-cu illər üçün Dövlət Proqramı”na uyğun olaraq, avqustun 15-dən etibarən Qırmızı və Yaşıl xətlərin ayrılması layihəsinin əsas tikinti mərhələsi başladı. Təxminən 10-11 ay davam edəcək inşaat prosesi çərçivəsində “28 May” və “Nizami” stansiyaları arasında qatarların hərəkəti müvəqqəti olaraq dayandırıldı.
Yenidənqurmanın əsas məqsədi Qırmızı və Yaşıl xətlər arasındakı texniki asılılığı aradan qaldırmaq, platformalardakı sıxlığı azaltmaq və hərəkətin dayanıqlılığını təmin etməkdir. Hazırda “28 May” stansiyasının platforması hər iki xəttin qatarları tərəfindən birgə istifadə olunduğundan, pik saatlarda normadan artıq yüklənmə yaradır.
Tikinti yekunlaşdıqdan sonra Yaşıl xətt (“Dərnəgül”-“Xətai”) “Cəfər Cabbarlı” stansiyası vasitəsilə tam müstəqil infrastrukturla fəaliyyət göstərəcək və bu xətt üzrə interval 3 dəqiqə 30 saniyəyə endirilərək “Cəfər Cabbarlı-Xətai” mənzilindəki 8 dəqiqəlik gözləmə müddəti tarixə qovuşacaq. Paralel olaraq, “Dərnəgül” elektrik deposunun ikinci mərhələsi tamamlanmaq üzrədir və “Cəfər Cabbarlı-Nizami” mənzilini birləşdirəcək 200 metrlik yeni tunellərin inşasına başlanılır.
Gələcəkdə Y-15 stansiyasına qədər infrastrukturun tamamlanması və “İçərişəhər” dönmə kamerasının 2028-ci ilin ikinci yarısında istifadəyə verilməsi ilə hər iki xətt üzrə qatarlararası intervalın 2 dəqiqəyə qədər azaldılması planlaşdırılır.
Bu gündən etibarən Bakı metrosunda hərəkət sxemi aşağıdakı rejimdə tənzimlənəcək:
* Qırmızı xətt: Qatarlar “İçərişəhər-Əhmədli” marşrutu üzrə 2 dəqiqə 30 saniyəlik intervalla hərəkət edəcək (“Əhmədli-Həzi Aslanov” mənzilində təmir başa çatanadək müstəqil hərəkət intervalı saxlanılacaq).
* Yaşıl xətt: Qatarlar “Dərnəgül-Nizami” marşrutu üzrə 3 dəqiqə 30 saniyəlik intervalla işləyəcək.
* “Cəfər Cabbarlı-Xətai” mənzili: Müstəqil hərəkət rejimi dəyişməz qalacaq (interval 7 dəqiqə).
* Bənövşəyi xətt: “Xocəsən-8 Noyabr” marşrutu üzrə qatarlar 8 dəqiqəlik intervalla hərəkət edəcək.
Metroda yaranacaq əlavə sərnişin yükünü kompensasiya etmək məqsədilə Azərbaycan Yerüstü Nəqliyyat Agentliyi (AYNA) və “Bakı Metropoliteni” QSC tərəfindən genişmiqyaslı alternativ plan icra olunur. Metro bağlanmazdan bir gün əvvəl - avqustun 14-dən etibarən 6 yeni xüsusi ekspres avtobus marşrutu fəaliyyətə başlayıb:
* M1: “Elmlər Akademiyası” – “28 May”
* M2: “İnşaatçılar” – “Nizami” – “28 May”
* M3: “20 Yanvar” – “Nizami” – “28 May”
* M4: “20 Yanvar” – “Koroğlu”
* M5: “20 Yanvar” – “Gənclik”
* M6: “Elmlər Akademiyası” – “Gənclik”
Bununla yanaşı, sərnişin sıxlığını qarşılamaq üçün 2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165, 199 və 202 nömrəli 20 müntəzəm avtobus marşrutunda nəqliyyat vasitələrinin sayı artırılıb.
Həmçinin avqustun 13-dən etibarən “28 May” Nəqliyyat Mübadilə Mərkəzinə daxil olan bəzi marşrutların son dayanacaq məntəqələri Səməd Vurğun bağının ətrafına keçirilib: 32 və 49 nömrəli avtobusların son dayanacağı Dilarə Əliyeva küçəsində, 120E və 125 nömrəli marşrutların son dayanacağı isə Puşkin küçəsində müəyyən edilib.
Səhər və axşam pik saatlarında gözlənilən sıxlığı nəzərə alaraq, sərnişinlərə səfərlərini əvvəlcədən planlaşdırmaq və təşkil olunmuş yerüstü alternativlərdən istifadə etmək tövsiyə olunur. Mühəndis-tikinti işlərinin rahat və təhlükəsiz aparılması üçün yaradılan bu müvəqqəti narahatlıq, yaxın gələcəkdə daha sürətli, rahat və müasir metro şəbəkəsinin fəaliyyətinə zəmin yaradacaq.
Təhminə VERDİYEVA,
“Azərbaycan”
677jpg_1790033437.jpg)
