Səhiyyə Nazirliyində Azərbaycanda işgüzar səfərdə olan Latviyanın səhiyyə naziri Hossam Abu Meri ilə görüş keçirilib.
Nazirliyin mətbuat xidmətindən AZƏRTAC-a verilən məlumata görə, görüşdə Latviyanın ölkəmizdəki fövqəladə və səlahiyyətli səfiri Edqars Skuya da iştirak edib.
Konstruktiv və qarşılıqlı anlaşma şəraitində keçən görüş zamanı səhiyyə, tibb elmi sahəsində Azərbaycan-Latviya əməkdaşlığının mövcud vəziyyəti, həmçinin potensial inkişaf imkanları müzakirə olunub.
Qonaqları salamlayan səhiyyə naziri Teymur Musayev Azərbaycanla Latviya arasında bir çox sahələrdə, o cümlədən səhiyyə və tibb elmi sahəsində məhsuldar əməkdaşlıq əlaqələrinin mövcudluğunu vurğulayıb: “Ölkələrimizin səhiyyəsinin səmərəliliyini artırmaq məqsədilə tibb təhsili sahəsində qarşılıqlı fəaliyyət üçün bütün zəruri vasitələr mövcuddur. Bundan əlavə, ali tibb mütəxəssislərinin davamlı peşə təhsili sahəsində müasir metodiki və elmi-praktik təcrübə mübadiləsi üçün optimal şərait var”.
Səhiyyə sisteminin rəqəmsallaşdırılmasını Səhiyyə Nazirliyinin qarşısına qoyulan prioritet məsələlərdən biri olduğunu vurğulayan Teymur Musayev Latviyada rəqəmsal səhiyyənin inkişafında mühüm irəliləyişlərin əldə olunduğunu qeyd edib: “Bu sahədə Latviya təcrübəsi öyrənilməsi bizim üçün faydalı ola bilər”.
Azərbaycanın səhiyyə naziri, həmçinin müalicəvi turizm sahəsində də əməkdaşlıq potensialının mövcudluğunu diqqətə çatdırıb. Onun sözlərinə görə, mineral su mənbələri və digər kurort-rekreasiya resursları Azərbaycana və Latviyaya çoxlu turist cəlb edir: “Bunu nəzərə alaraq, ölkələrimizin vətəndaşlarının sağlamlığının bərpası və reabilitasiyası məqsədilə sanator-kurort xidmətlərinin təkmilləşdirilməsi olduqca vacib məsələdir”.
Səmimi qəbula görə təşəkkürünü bildirən Hossam Abu Meri bu cür görüşlərin Latviya-Azərbaycan arasında səhiyyə sahəsində əməkdaşlığın daha da inkişafı, eyni zamanda, təcrübə və bilik mübadiləsi baxımından olduqca vacib olduğunu vurğulayıb.
Çıxışının sonunda latviyalı nazir ölkələrimizin səhiyyə nazirlikləri arasında əməkdaşlığın bundan sonra da yeni müstəvidə uğurla davam etdiriləcəyinə ümidvar olduğunu bildirib.
Görüşdə, həmçinin qarşılıqlı maraq doğuran digər məsələlər müzakirə edilib.
677jpg_1790033437.jpg)
