"Şanxay Əməkdaşlıq Təşkilatının (ŞƏT) 26-cı Zirvə toplantısı Bişkekdə keçirildi. Bu Zirvə toplantısı təşkilatın 25 illiyinə təsadüf etdi. Qeyd etmək lazımdır ki, ŞƏT-ə üzv dövlətlər dünya əhalisinin 40 faizindən çoxunu, qlobal ÜDM-in isə təxminən dörddəbirini təşkil edir".
Bu fikirləri "Azərbaycan" qəzetinə açıqlamasında Milli Məclisin deputatı Pərvanə VƏLİYEVA bildirib. "ŞƏT Plus" görüşlərinə diqqətçəkən deputat bu formatın əhəmiyyətini vurğulayıb: "Bu format təşkilatın yalnız üzv dövlətləri çərçivəsində deyil, daha geniş Avrasiya platforması kimi fəaliyyət göstərməsinə imkan verir. Azərbaycan da bu formatda iştirak edir. Azərbaycan üçün bu məsələ yalnız hər hansı bir siyasi blokun daxilində yer almaq deyil. Əsas məsələ müxtəlif platformalarla əməkdaşlıq edərək ölkənin milli maraqlarına uyğun imkanları genişləndirməkdir. Bu, Azərbaycanın xarici siyasətinin çevikliyini göstərən mühüm məqamdır".
Qeyd edək ki, ŞƏT tədbirlərində iştirak etmək üçün avqustun 31-də Qırğız Respublikasına işgüzar səfər edən Prezident İlham Əliyevin Bişkekdə bir sıra ikitərəfli görüşləri olub. "Ermənistan Baş naziri Nikol Paşinyanla görüşdə sülh gündəliyi, TRIPP və regional bağlantılar müzakirə edilib. Tərəflər davamlı sülhün möhkəmləndirilməsi və əlaqələrin normallaşdırılması istiqamətində birbaşa təmasları davam etdirmək barədə razılaşıblar. İran Prezidenti Məsud Pezeşkianla, Qazaxıstan Prezidenti Kasım-Æomart Tokayevlə, həmçinin Türkiyənin Prezidenti Rəcəb Tayyib Ərdoğanla görüşlər keçirilib. Bu görüşlər göstərir ki, Bakı üçün ŞƏT yalnız təşkilatın öz çərçivəsində əməkdaşlıq platforması deyil, Çin, Hindistan, Rusiya, Mərkəzi Asiya, İran və digər aktorlarla eyni diplomatik məkanda təmas imkanını genişləndirən formatdır", - deyə Pərvanə Vəliyeva bildirib.
ŞƏT-in gündəliyində nəqliyyat, logistika, enerji və rəqəmsal bağlantı getdikcə daha böyük yer tutur. Bu barədə danışan Pərvanə Vəliyeva deyib: "Bütün bu məsələlər Azərbaycanın geoiqtisadi mövqeyini ön plana çıxarır. Bişkek sammitinin ən maraqlı tərəfi budur ki, ŞƏT getdikcə təhlükəsizlik təşkilatından daha geniş Avrasiya əməkdaşlıq platformasına çevrilir. Burada təhlükəsizliklə yanaşı, nəqliyyat dəhlizləri, enerji, ticarət, investisiya, rəqəmsal transformasiya və regional bağlantılar ön plana çıxır. Azərbaycanın bu platformadakı iştirakı ölkənin Şərq-Qərb və Şimal-Cənub bağlan-tılarının kəsişməsində yerləşən tranzit və enerji mərkəzi kimi rolunu gücləndirmək üçün əlavə diplomatik imkan yaradır.
Azərbaycan bir tərəfdən, Avropa ilə enerji və nəqliyyat əməkdaşlığını inkişaf etdirir, digər tərəfdən, Mərkəzi Asiya ilə əlaqələrini dərinləşdirir, Türk Dövlətləri Təşkilatında inteqrasiya proseslərinə töhfə verir, islam dünyası ilə münasibətləri genişləndirir və eyni zamanda ŞƏT kimi Avrasiya miqyaslı platformalarla əməkdaşlığını gücləndirir".
Prezident İlham Əliyevin Qırğız Respublikasına işgüzar səfəri Azərbaycanın bu ölkə ilə əlaqələri baxımından da mühüm siyasi əhəmiyyət kəsb edir. "Qırğızıstanın Azərbaycanın xarici siyasətində əhəmiyyəti son illərdə nəzərəçarpacaq dərəcədə artıb. Bunun səbəbi yalnız iki ölkənin dostluq münasibətləri və türk dünyasına mənsubiyyəti deyil. Mərkəzi Asiyanın beynəlxalq siyasətdə və qlobal iqtisadiyyatda artan çəkisi Azərbaycan üçün Qırğızıstanı daha əhəmiyyətli tərəfdaşa çevirir. Azərbaycanın Mərkəzi Asiyaya münasibəti artıq klassik diplomatik əlaqələr çərçivəsindən çıxıb. Burada nəqliyyat marşrutları, enerji əməkdaşlığı, investisiyalar, ticarət, logistika, rəqəmsal bağlantılar və humanitar əlaqələr bir-birini tamamlayan istiqa-mətlər kimi çıxış edir", - deyə Pərvanə Vəliyeva bildirib.
Beləliklə, Prezident İlham Əliyevin Bişkekdəki təmasları Azərbaycanın Avrasiyanın müxtəlif güc mərkəzləri arasında balanslaşdırılmış və çoxvektorlu diplomatiyasının praktik nümunəsidir.
Rəşad CƏFƏRLİ,
"Azərbaycan"
677jpg_1790033437.jpg)
