Azərbaycan və Ermənistan arasında sülhün təmin olunması yalnız iki ölkə arasında münasibətlərin normallaşması baxımından deyil, bütövlükdə Cənubi Qafqazda uzunmüddətli sabitlik, təhlükəsizlik və iqtisadi inkişaf üçün mühüm əhəmiyyət daşıyır.
Bu fikirləri AZƏRTAC-a açıqlamasında türk siyasi ekspert Mehmet Seven bildirib.
Onun sözlərinə görə, Azərbaycan postmünaqişə dövründə beynəlxalq hüququn norma və prinsiplərinə əsaslanan davamlı sülhün bərqərar olması istiqamətində ardıcıl siyasət həyata keçirir. Ekspert qeyd edib ki, sülh sazişinin imzalanması qarşılıqlı etimadın möhkəmlənməsinə, dövlətlər arasında normal münasibətlərin qurulmasına və regionun yeni əməkdaşlıq platformasına çevrilməsinə şərait yaradacaq.
“Uzun illər davam edən qarşıdurmanın aradan qalxması iqtisadi əməkdaşlıq üçün geniş imkanlar açacaq. Nəqliyyat və logistika marşrutlarının inkişafı, ticarət dövriyyəsinin artması, yeni investisiya layihələrinin həyata keçirilməsi və regional kommunikasiyaların genişlənməsi həm Azərbaycan, həm Ermənistan, həm də qonşu ölkələr üçün mühüm iqtisadi dividendlər vəd edir. Sülhün bərqərar olması Cənubi Qafqazı qarşıdurma məkanından əməkdaşlıq və tərəfdaşlıq məkanına çevirə bilər. Bu proses regionun beynəlxalq nəqliyyat dəhlizlərində rolunu daha da artıracaq, Avropa ilə Asiyanı birləşdirən marşrutların təhlükəsizliyini və səmərəliliyini gücləndirəcək”, – deyə ekspert vurğulayıb.
Onun fikrincə, sülh mühiti xarici investorların regiona marağını artıracaq, enerji, sənaye, kənd təsərrüfatı, turizm və xidmət sektorlarında yeni layihələrin reallaşdırılmasına təkan verəcək. Bu isə məşğulluğun artmasına, insanların rifahının yüksəlməsinə və region ölkələrinin iqtisadi inteqrasiyasının dərinləşməsinə xidmət edəcək.
M.Seven qeyd edib ki, sabitliyin möhkəmlənməsi humanitar əlaqələrin genişlənməsinə də müsbət təsir göstərəcək: “Xalqlar arasında dialoqun inkişafı, mədəni və akademik əməkdaşlığın genişlənməsi, qarşılıqlı etimadın formalaşması uzunmüddətli sülhün ən vacib təminatlarından biridir. Türkiyə Cənubi Qafqazda davamlı sülhün və əməkdaşlığın tərəfdarı olaraq regionda iqtisadi inteqrasiya, nəqliyyat bağlantıları və çoxtərəfli tərəfdaşlığın inkişafını dəstəkləyir. Azərbaycan və Ermənistan arasında sülh sazişinin imzalanması yalnız iki ölkənin deyil, bütövlükdə regionun gələcək inkişafına, təhlükəsizliyinə və beynəlxalq nüfuzunun artmasına mühüm töhfə verəcək”.
