ABŞ Prezidenti Donald Trampın dəvəti ilə Ağ Evdə keçirilən tarixi görüş həm Azərbaycan-ABŞ strateji münasibətlərində, həm də Azərbaycan-Ermənistan sülh prosesində yeni bir mərhələ açıb. Azərbaycan və ABŞ liderlərinin regional bağlantılar, qabaqcıl texnologiyalara və süni intellektə iqtisadi investisiyalar, enerji, ticarət və təhlükəsizlik sahələrində əməkdaşlığı dərinləşdirmək məqsədilə Strateji Tərəfdaşlığın yaradılması üzrə Anlaşma Memorandumu imzalaması iqtisadi inkişafın gücləndirilməsi üçün çox mühüm addımdır.
AZƏRTAC xəbər verir ki, bu fikirləri Milli Məclisin deputatı Pərvanə Vəliyeva deyib.
O qeyd edib ki, Prezident Trampın ABŞ hökumətinin Azərbaycana birbaşa yardımına uzun illər mane olan Azadlığa Dəstək Aktının 907-ci düzəlişinin tətbiqinin dayandırılması barədə qərarı dövlətimizin başçısına, Azərbaycan xalqına qarşı böyük jestdir: “Donald Trampın iştirakı ilə Azərbaycan Prezidenti İlham Əliyevin və Ermənistanın Baş naziri Nikol Paşinyanın imzaladığı Birgə Bəyannamə Azərbaycanın əsas hissəsi ilə Naxçıvan arasında maneəsiz quru əlaqəsini təmin edərək Zəngəzur dəhlizinin reallaşmasını nəzərdə tutur. Həmçinin görüş nəticəsində ATƏT-in Minsk Qrupunun ləğvi üçün birgə məktub ünvanlanıb və nəhayət, 2026-cı ildə keçiriləcək referendumla Ermənistan Konstitusiyasına dəyişiklik edilərək Azərbaycana qarşı ərazi iddialarının çıxarılması planlaşdırılır. Bununla da, tərəflərin sülh müqaviləsini imzalamasına heç bir maneə qalmayacaq”.
Onun sözlərinə görə, Azərbaycan və Ermənistan xarici işlər nazirləri tərəfindən sülh sazişinin mətninin paraflanması, mətnin özünün artıq tam razılaşdırıldığını təsdiqləyir. Paraflama yekun saziş olmasa da, sülhə doğru atılan mühüm addımdır. Azərbaycan və Ermənistan de-fakto sülh içində olmaqla, yekun və dayanıqlı sazişin son mərhələsindədir. “ABŞ-ın Zəngəzur dəhlizinin fəaliyyətində zəmanət rolu Cənubi Qafqazda yeni bir mərhələnin başlanğıcı deməkdir. Trampın şəxsən bu rolu öz üzərinə götürməsi, Vaşinqtonun təhlükəsiz və açıq nəqliyyat əlaqələrini dəstəkləməyə hazır olması, regionun sabitləşməsinə, yeni geosiyasi və geoiqtisadi reallıqların gəlməsinin bariz nümunəsidir. Bu dəhliz regional iqtisadi potensialın yüksəlməsi, sərhədlərin açılması və təkcə regional ölkələr üçün deyil, həm də Avropa, Mərkəzi Asiya və Çin üçün yeni nəqliyyat dəhlizlərinin yaranması baxımından mühüm əhəmiyyət daşıyır. Bu, Birgə Bəyannamənin hər üç tərəfi üçün yeni dividentlər qazandıracaq. Amerikalılar bu layihədə təhlükəsizliyi təmin etməklə logistika və əməliyyat şirkətlərinin cəlb olunması ilə iştirakı təklif edirlər. ABŞ-ın iştirakı bu layihəni daha da gücləndirəcək”,- deyə deputat diqqətə çatdırıb.
