Azərbaycan ilə Ukrayna arasında diplomatik münasibətlər müstəqillik illərindən etibarən davamlı inkişaf yolu keçərək bu gün çoxşaxəli əməkdaşlıq xarakteri daşıyır. İki ölkə arasında siyasi dialoqla yanaşı, iqtisadi, enerji, nəqliyyat, humanitar və digər sahələrdə əməkdaşlıq da intensiv şəkildə davam edir. Bu münasibətlərin möhkəm hüquqi bazasını ikitərəfli müqavilələr, müxtəlif sahələr üzrə imzalanmış sənədlər və qarşılıqlı maraqlara əsaslanan əməkdaşlıq mexanizmləri təşkil edir.
Milli Məclisin deputatı Vüqar RƏHİMZADƏ qəzetimizə açıqlamasında deyib ki, Azərbaycan-Ukrayna münasibətləri yalnız siyasi dialoq və humanitar əməkdaşlıqla məhdudlaşmır, eyni zamanda, iqtisadi və energetika sahələrində də yeni məzmun və dinamika qazanır. Bu baxımdan Ukrayna Prezidenti Volodimir Zelenskinin 2026-cı ilin aprelində Azərbaycana rəsmi səfəri zamanı imzalanan sənədlər münasibətlərin hüquqi və institusional bazasının daha da genişləndirilməsi baxımından mühüm əhəmiyyət kəsb edir. Xarici işlər naziri Ceyhun Bayramovun bu ay Ukraynaya səfəri isə yüksəksəviyyəli siyasi dialoqun və qarşılıqlı təmasların ardıcıl xarakter daşıdığını göstərir. "Azərbaycan-Ukrayna münasibətlərinin mühüm istiqamətlərindən biri humanitar əməkdaşlıqdır. Xüsusilə Ukraynada müharibənin yaratdığı ağır nəticələr fonunda Azərbaycanın göstərdiyi humanitar dəstək iki ölkə arasında münasibətlərin yalnız siyasi və iqtisadi maraqlarla məhdudlaşmadığını, eyni zamanda həmrəylik və qarşılıqlı dəstək prinsiplərinə söykəndiyini nümayiş etdirir. Azərbaycanın Ukraynaya göstərdiyi humanitar yardım bu münasibətlərin ən önəmli aspektlərindən biridir. Azərbaycan Ukraynaya çoxsaylı generatorlar, transformatorlar, elektrik kabelləri və digər enerji avadanlıqları göndərərək, müharibə nəticəsində zərər görmüş infrastrukturun bərpasına yardım edir. Yardımların davamlı və geniş spektrli olması iki ölkə arasında etimadın və əməkdaşlığın daha da möhkəmlənməsinə səbəb olur. Eyni zamanda ölkəmizin Ukraynanın bərpa və yenidənqurma prosesinə verdiyi töhfələr humanitar siyasətin praktik nümunəsi kimi qiymətləndirilə bilər", - deyə o əlavə edib.
Deputat qeyd edib ki, Azərbaycan-Ukrayna münasibətləri uzun illər ərzində qarşılıqlı hörmət, dostluq və əməkdaşlıq prinsipləri əsasında inkişaf edib. Prezident İlham Əliyevə "İrpen şəhərinin fəxri vətəndaşı" vəsiqəsinin təqdim olunması da bunun göstəricisidir. Bu, Azərbaycanın Ukraynaya göstərdiyi humanitar dəstəyin və çətin günlərdə Ukrayna xalqının yanında olmasının yüksək qiymətləndirilməsinin ifadəsidir. İrpen şəhərinin bu məsələdə xüsusi simvolik əhəmiyyəti var. İrpen müharibədən ciddi zərər görmüş Ukrayna şəhərlərindən biridir. Azərbaycanın İrpenə göstərdiyi dəstək və şəhərin bərpasında iştirak etməsi iki ölkə arasında münasibətlərin konkret nəticələrə çevrilən humanitar əməkdaşlığının göstəricisidir.
V.Rəhimzadə bildirib ki, Azərbaycan dövlətinin yardımı və dəstəyi nəticəsində akademik Zərifə Əliyeva adına 12 saylı İrpen Humanitar "Linqvist" liseyi bərpa edilib: "Azərbaycan hökumətinin yardımı ilə İrpendə hərbi əməliyyatlar zamanı ciddi ziyan dəymiş şəhər poliklinikasının bərpası tez bir zamanda başa çatdırılaraq, Ukrayna dövlətinə təhvil verilib. Bu tibb müəssisəsi Azərbaycan hökumətinin və Ukraynanın enerji sektorunda aparıcı Azərbaycan brendi olan "SOCAR Ukraine" şirkətinin maliyyə dəstəyi ilə təmir edilib. Eyni zamanda obyektin zirzəmisində yeni sığınacaq tikilib. Prezident İlham Əliyevə "İrpen şəhərinin fəxri vətəndaşı" statusunun verilməsi Azərbaycanın Ukraynanın ağır günlərində göstərdiyi dəstəyə verilən yüksək dəyərdir. Azərbaycan öz xarici siyasətində hər zaman sülhün, sabitliyin və humanitar dəyərlərin önəmini vurğulayır. Ukrayna ilə bağlı yanaşmada da bu xətt özünü aydın göstərir".
Əsmər QARDAŞXANOVA,
"Azərbaycan"
jpeg_1787209831.jpeg)
