Azərbaycan qlobal arenada mürəkkəb geosiyasi proseslərin getdiyi bir dövrdə sabitliyini və təhlükəsizliyini qoruyub saxlayan dövlətlərdəndir. Ölkəmizin yerləşdiyi coğrafiya müxtəlif maraqların toqquşduğu bir məkandır. Yaxın coğrafiyadakı müharibələr, qarşıdurmalar və siyasi gərginliklər fonunda Azərbaycanın daxili sabitliyini təmin etməsi düşünülmüş və məqsədyönlü siyasətin nəticəsidir.
Azərbaycan nümunəvi ölkədir
Hazırda dünyada baş verən hərbi qarşıdurmalar, siyasi gərginliklər, etnik və dini münaqişələr getdikcə vəziyyəti çətinləşdirir. Müxtəlif regionlarda baş verən bu proseslər insanların həyatına, ölkələrin iqtisadiyyatına və milli inkişafına ağır təsir edərək bəzən illərlə aradan qaldırıla bilməyən fəsadlar doğurur. Müharibələr və müxtəlif böhranlar xalqların və günahsız insanların ağır məhrumiyyətlərə məruz qalması ilə nəticələnir.
Belə bir şəraitdə Azərbaycan regional və qlobal baxımdan sabitliyin əsas nümunəsini ortaya qoyur. Müxtəlif coğrafi və siyasi təzyiqlərin, qonşu ölkələrdə davam edən mürəkkəb hadisələrin fonunda respublikamızın əmin-amanlıq şəraitində inkişaf etməsi diqqətəlayiqdir. Dövlətimizin uğurlu idarəçiliyi və xalqımızın milli həmrəyliyi Azərbaycanın möhkəm və davamlı stabilliyini təmin edən əsas amillər sırasındadır.
Tarixə nəzər salsaq görərik ki, Azərbaycanın sabitliyi asan əldə olunmayıb. 1990-cı illərin əvvəllərində respublikamızda yaranan xaotik vəziyyət, dövlət idarəçiliyindəki boşluqlar və separatçı meyillər ölkəmizin əsas inkişaf hədəflərinə ciddi təhlükə törətmişdi. O dövrdə yaşanan qarşıdurmalar, hərbi qarşılaşmalar və siyasi çəkişmələr cəmiyyət üçün ağır sınaqlar yaradaraq dövlətimizin gələcəyini sual altında qoymuşdu.
Yalnız 1993-cü ildə Ulu Öndər Heydər Əliyevin siyasi hakimiyyətə qayıdışından sonra ölkəmizdə siyasi və ictimai stabillik təmin edilmişdi. Bu stabil şərait dövlətimizin strateji hədəflərini həyata keçirməsi üçün əhəmiyyətli zəmin yaratmışdı. Qanunsuz silahlı birləşmələrə qarşı görülən tədbirlər, milli təhlükəsizlik sahəsində atılan addımlar Azərbaycanın inkişaf yolunda önəmli dönüş nöqtəsi olmuşdu.
Bu gün Prezident İlham Əliyevin rəhbərliyi altında respublikamızın nailiyyətləri həm də sabitliyin bariz göstəricisidir. Azərbaycan dünyada təhlükəsizliyi və əmin-amanlığı ilə seçilən ölkələr sırasındadır. Cinayətkarlığın aşağı səviyyəsi, beynəlxalq tədbirlərin keçirilməsi mərkəzinə çevrilməsi, turizmin inkişafı və xarici sərmayələrin artması sabitliyin real nəticələridir.
44 günlük Vətən müharibəsində torpaqlarımızın işğaldan azad olunması və Qarabağda erməni separatçılığının darmadağın edilməsi regiondakı təhlükəsizliyi gücləndirdi. Azərbaycan bütövlükdə Cənubi Qafqaz regionunda sabitliyin qorunmasında həlledici rol oynadı.
Prezident İlham Əliyev respublikamızdakı sabitliklə bağlı deyib: "Ölkəmizdə sabitlik hökm sürür. Azərbaycan xalqı təhlükəsizlik şəraitində yaşamışdır. Bu gün dünyada baş verən hadisələr hamımızın gözünün qarşısındadır. Yeni müharibələr, qarşıdurmalar, münaqişələr alovlanır. Dünyanın müxtəlif bölgələrində qanlı toqquşmalar davam edir. Azərbaycan isə sülh, əmin-amanlıq, təhlükəsizlik və sabitlik şəraitində yaşayır. Əminəm ki, bundan sonra sabitlik və əmin-amanlıq əbədi olacaqdır".
"Sabitlik inkişafın və təhlükəsizliyin əsasıdır"
Azərbaycanın dayanıqlı inkişafı sabitliyə əsaslanır. O cümlədən ölkəmizdə müxtəlif etnik və dini qruplar arasında qarşılıqlı hörmət və dostluq şəraiti qorunub saxlanılır, milli və mədəni fərqliliklər normal şəkildə yaşanır.
Beləliklə, sabitlik ölkəmizin həm daxili, həm də xarici siyasətinin uğurlu nəticələrini təmin edir. İqtisadi inkişaf, beynəlxalq nüfuz, xarici sərmayə və turizm sahəsində əldə olunan uğurların təməlində məhz sabitlik dayanır.
Azərbaycan dünyaya stabil, təhlükəsiz və inkişaf edən bir dövlət nümunəsi təqdim edir. Xalqın milli həmrəyliyi, uğurlu idarəçilik və strateji məqsədlər sabitliyin qorunmasında əsas faktorlardır. Respublikamız həm də regionda və dünyada əmin-amanlığın və təhlükəsizliyin simvolu olaraq önə çıxır.
Azərbaycanın təcrübəsi göstərir ki, sabitlik heç bir halda asanlıqla əldə edilmir, amma qorunması və möhkəmləndirilməsi dövlətin gücü və xalqın birliyi ilə mümkündür. Dünyada mürəkkəb hadisələr baş verdiyi bir zamanda respublikamızın nailiyyətləri sabitliyin əhəmiyyətini bir daha ortaya qoyur. Bu da ölkəmizin həm regionda, həm də qlobal siyasətdə mövqeyini gücləndirir və onu bir çox beynəlxalq proseslərdə etibarlı tərəfdaşa çevirir.
Bu gün ölkəmiz elə bir qüdrətə sahibdir ki, heç bir qüvvə onun yaratdığı reallığı, sabitlik şəraitini dəyişə bilməz.
Təhminə VERDİYEVA,
"Azərbaycan"
