Ermənistanı növbəti revanşa təhrik edənlər bunu anlamalıdırlar
"Artıq uzun müddətdir ki, Ermənistana havadarlıq edən bir sıra güclər bu ölkəni növbəti dəfə revanşist addımlar atmağa təhrik edirlər. Fransa, Hindistan və digər ölkələrin hərbi sənayesi Ermənistana silah-sursat göndərməkdə, işğalçı dövləti silahlandırmaqdadır".
Bu sözləri "Azərbaycan" qəzetinə Milli Məclisin İnsan hüquqları komitəsinin sədr müavini Arzuxan Əlizadə deyib. Deputat bildirib ki, bir çox halda həmin silahların kreditlər hesabına alındığını və sonradan həmin borcların silindiyini, bəzən isə dəyəri ödənilmədən Ermənistana silahlar verilməsi ilə bağlı məsələlərin gündəmdə olduğunu görürük. Bu fonda Ermənistanın Azərbaycanla şərti sərhəd xəttində səngərlər qazması da müşahidə olunmaqdadır. Eyni zamanda 44 günlük Vətən müharibəsindən sonra işğaldan azad olunmuş ərazilərdə sülhməramlı missiya adı altında fəaliyyət göstərən Rusiya hərbi kontingenti müdafiə zonası adı ilə səngərlər qazan ermənilərə sipər rolu oynayırdı. İndi də analoji funksiyanı "müşahidə" missiyası adlandırılan Avropa İttifaqının, əslində, kəşfiyyat və digər məqsədlərə xidmət edən missiyası yerinə yetirməkdədir. "Bu missiya ilə bağlı 2022-ci ilin oktyabrında Azərbaycanla razılaşma əldə olunmuşdu ki, iki ay müddətinə Ermənistan tərəfindən şərti sərhəddə müşahidə aparacaqlar. O zaman missiyanın tərkibinin cəmi 40 nəfərdən ibarət olması razılaşdırılmışdı. Amma razılaşmaya baxmayaraq, 50 nəfərlik missiya göndərdilər. Ondan sonra artıq ikinci dəfədir ki, "müşahidə" missiyasının mandatı iki il müddətinə uzadıldı. Onların say tərkibi əvvəl 138 nəfərə, ikinci dəfə isə 209 nəfərə çatdırıldı. Hətta sayın bir qədər artırıldığı barədə də informasiyalar var. Onlar zaman-zaman Azərbaycanla Ermənistan şərti sərhəd zolağına gəlib, oradan binoklla Azərbaycan ərazisini müşahidə edirlər. İstədikləri formada hesabatlar hazırlayır, beynəlxalq ictimaiyyətin fikrində belə fikir formalaşdırmağa çalışırlar ki, Azərbaycan guya Ermənistana hücum etməyə hazırlaşır, sərhəd xəttini pozmaq istəyir", - deyə o əlavə edib.
Deputat qeyd edib ki, bu cür yalan təbliğat üzərində kampaniya qurulub və orada Avropa İttifaqının dislokasiya olunmuş "müşahidə" missiyasının üzvləri də guya Azərbaycan tərəfindən hər hansı təhdidin qarşısını almaq üçün fəaliyyət göstərirlər. Əslində, Qərb iki ölkə arasında yarana biləcək normal münasibətlərə öz fəaliyyəti və mövcudluğu ilə ciddi zərbə vurur. Onların sərhəd zolağında fəaliyyəti heç bir halda sülhə və sabitliyə xidmət etmir, əksinə, regionda sülhün dayanıqlı olmasına ciddi təhdiddir. Həmin missiyanın 2027-ci ilin fevral ayına qədər Ermənistanda fəaliyyət göstərməsi hədəflənib.
A.Əlizadə bildirib ki, Ermənistandakı həm rəsmi, həm də ictimai-siyasi proseslərdə müəyyən formada aktivliyi olan "siyasətçi"lər tərəfindən revanşist addımların atıla biləcəyi, əvvəlki mövqelərə qayıdılması, hətta Qarabağın növbəti dəfə Ermənistanın nəzarətinə keçirilməsi ilə bağlı çağırışlar edilir. Bu cür çağırışlar fonunda mövcud missiya, eyni zamanda Aİ-nin bir sıra gücləri Azərbaycana qarşı böhtan və qarayaxma kampaniyalarını davam etdirirlər. Onlar Ermənistan üzərindən regiona yerləşməklə bölgədə bu və ya digər formada hərbi, siyasi, iqtisadi maraqlarını təmin etmək üçün Azərbaycanı hədəf götürüblər. Amma fərqində olmalıdırlar ki, Azərbaycan bu regionun söz və güc sahibidir, xüsusilə sülhün, sabitliyin dayanıqlı olmasının qarantıdır. Kənar qüvvələri regiona gətirməklə nəyəsə nail olmaq mümkün deyil. İlk növbədə Ermənistan tərəfi bunun fərqində olmalıdır. Bölgədə sülh və sabitlik, iqtisadiyyatının dirçəlməsini, kommunikasiyaların açılmasını, Azərbaycan, eləcə də Türkiyə ilə münasibətlərin normallaşmasını istəyirsə, həmin qüvvələrin xidmətindən imtina etməlidir. Yalnız bunun fonunda kommunikasiya xətləri açıla və Ermənistan iqtisadiyyatına ciddi dividendlər gətirə bilər. Əks halda yekunda ən çox zərər görən Ermənistan özü olacaq. Əgər Ermənistan revanşist addımlar atmağa qalxacaqsa, təbii ki, böyük faciələrlə qarşılaşacaq. Nəticədə bu qondarma dövlətin, ümumiyyətlə, bu arealda mövcudluğu sual altına düşəcək.
Əsmər QARDAŞXANOVA,
"Azərbaycan"
jpeg_1768541890.jpeg)
