Gənclik ömrün bahar çağıdır. Odur ki, fəsillər, o cümlədən bahar əbədi olmadığı kimi, gənclik də ötəridir, göz qırpımında uçub gedir, xatirələrə, nostalji hisslərə çevrilir. 
Keçmiş ittifaqın silahlı qüvvələrində - Rusiyanın Rostov şəhərindəki hərbi xidmətimdən 35 il ötür. Oradan avtobusla ətraf qəsəbə Belaya Kalitvaya gedərkən ayağa qalxıb qoca rus qadına yer verdim, çox sevindi. "Otkuda, sınok?" sorğusuna "İz Azerbaydjana" cavabımdan gülümsədi, uca səslə "Vot Aliyev vospitıval" söylədi... Xeyli fərəhləndim, elə bil dünyanı bağışladılar mənə, təkcə camaatın, kütlənin yanında tərifləndiyimə görə yox, həm də o səbəbdən ki, mənsub olduğum millətimin, onun nümayəndəsi Heydər Əliyevin adı xoş məramla çəkilirdi.
Sonrakı dönəmlərdə bu söz həyatım, davranışım üçün bir kredoya, mayaka döndü. Axı Ulu Öndər də "Mən həmişə fəxr etmişəm, bu gün də fəxr edirəm, mən azərbaycanlıyam" deyə böyük fəxarətlə söyləmişdir. Tarixi şəxsiyyət azərbaycançılığı cəmiyyətin mənəvi kamilliyinin başlıca şərti sayır, bu istiqamətdə gənc nəslin əsas söz, mövqe sahibliyini, onların üzərinə böyük məsuliyyət düşdüyünü vurğulayırdı. Müasir Azərbaycanın banisi və memarının təməlini qoyduğu gənclər siyasəti gənclərin siyasi proseslərə inteqrasiyasıdır, qabiliyyətli, istedadlı, vətənsevər insanların biliyinin, bacarığının, qabiliyyətinin cəmiyyətin inkişafı sahələrinə tətbiqini təmin edən tədbirlər sistemidir. Ümummilli Lider deyirdi: "Hər bir Azərbaycan gənci hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir".
Təsadüfi deyil ki, gənclər siyasəti dövlətin daxili siyasətinin başlıca istiqamətlərindəndir. Azərbaycan Prezidentinin 26 iyul 1994-cü il tarixli fərmanı ilə Gənclər və İdman Nazirliyinin yaradılması dövlət idarəçiliyində gənclərin daha fəal iştirakının təminində hüquqi sənəd olaraq dövlət siyasətinin təminatçısına çevrilmişdir. 
Ənənəvi mübahisələr - nəsillər arasında qınaq və müqayisələr həmişə olub, var və innən belə də davam edəcək. Hətta eramızdan əvvəlki Mesopotamiyaya aid gil lövhəcikdə yaşlıların gənclərdən narazı qaldıqları və onların hədlərini aşdıqları barədə şikayətlərinə rast gəlinib. Nə gizlədək, 30 illik işğal dövründə Qərb institutlarının bizə sırımağa çalışdıqları milli-mənəvi dəyərlərə zidd elementləri, ailə strukturunun dağıdılmasına cəhdləri, mental xüsusiyyətlərimizə yabançı şouları görəndə bəzən cavanlardan narazı qalırdıq. Ən başlıcası, qanayan yaramız olan işğaldakı vətən torpaqlarını unutdurmaq siyasəti, əsrarəngiz Qarabağa və digər ərazilərə biganəlik kampaniyasından narahat olur, cavanların Vətənin müdafiəsindən uzaq düşəcəklərindən qorxurduq. Ancaq şükürlər olsun ki, həmin şübhələrdə yanıldıq, bədgümanlığımız çəkilib getdi. Bu da xalqımızın canında, qanında mərdlik, təslimçiliklə barışmazlıq, müqəddəs dəyərlərə sahib çıxmaq genlərinin mövcudluğu ilə yanaşı, dövlətin, şəxsən Prezident İlham Əliyevin rəhbərliyi ilə ölkəmizin sosial-iqtisadi tərəqqisi, hərbi-sənaye kompleksinin yenilənməsi, müasir, hazırlıqlı, təcrübəli ordu quruculuğuna paralel olaraq, gənclərin hərbi vətənpərvərlik ruhunda tərbiyə olunmasından qaynaqlanırdı. Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondu isə şəhid ailələrinə qayğı, qazilərimizin xaricdə müalicəsi, ümumiyyətlə, gənclərimizin siyasi-elmi-mədəni inkişafı yönündə möhtəşəm layihələrə imza atır. 
Ali Baş Komandanın Vətən müharibəsində qürurla dediyi "Dünyada heç bir qüvvə bizi haqq yolundan döndərə bilməz. Dünyada heç bir ölkə bizim iradəmizə təsir edə bilməz. Biz haqq yolundayıq. Biz qalib gəlirik. Biz zəfər çalırıq və biz öz torpaqlarımızı geri alacağıq, ərazi bütövlüyümüzü bərpa edəcəyik" sözləri döyüşçülərin qələbə ruhunun manifestinə döndü. Prezident İlham Əliyev Şuşada hərbçilərlə görüşəndə bu qələbənin tarixi əhəmiyyətini belə vurğulamışdır: "Bütün nəsillərdən olan vətəndaşlarımızın bu qələbədə böyük zəhməti var. Ancaq onu da bildirməliyəm ki, əsas yükü, əsas vəzifəni gənc nəsil yerinə yetirdi". Sərkərdənin döyüşçüyə, Ali Baş Komandanın əsgərə inamının bu səmimilikdə ifadəsi şəxsi heyətin mənəvi-psixoloji hazırlığını kamil səviyyədə tamamladı, eyni zamanda bütün Azərbaycan gəncliyinə möhtəşəm mesaj verdi. 

Qurban MƏMMƏDOV