Dəb və mədəniyyətin qovuşduğu Parisdə “Oriental Fashion Show” moda həftəsi çərçivəsində silsilə defilelər təşkil olunub. Məşhur “Guimet” muzeyində “İrs kimi zəriflik” mövzusu altında keçirilən defiledə Azərbaycan, Özbəkistan, Qazaxıstan, Tacikistan, Türkmənistan və Türkmənistan–Fransa moda evləri 2026-cı ilin yaz/yay kolleksiyalarını nümayiş etdiriblər.
AZƏRTAC xəbər verir ki, dünyanın müxtəlif ölkələrindən olan istedadların tanıdılması məqsədilə keçirilən beynəlxalq “Oriental Fashion Show” moda həftəsində Azərbaycan “Anara Zakirli” brendi ilə təmsil olunub.
2018-ci ildə yaradılan və Azərbaycan xalça ornamentlərini müasir dəbə daşıyan “Anara Zakirli” brendinin əsas məqsədi milli ornamentlərin zəngin mənasını çağdaş moda dili vasitəsilə dünyaya tanıtmaqdır. Bu ideya əsasında ərsəyə gələn kolleksiyalar klassik irslə müasir dizayn arasında incə harmoniya yaradır.
Brend üçün xüsusi hazırlanmış unikal parçalar milli naxışları Odlar Yurdunun parlaq və çoxrəngli çalarları ilə birləşdirir. Bu toxumalar Azərbaycan mədəni irsinin dərin və valehedici nüanslarını zərif şəkildə ön plana çıxararaq geyimləri təkcə estetik deyil, həm də mədəni dəyər daşıyan sənət nümunələrinə çevirir.
Yarandığı gündən etibarən brendin yaradıcı direktoru Anara Zakirli “Əjdaha”, “Qoca”, “Zərəfşan”, “Təbriz” və “Bağçada güllər” adlı kolleksiyalar təqdim edib. Onun əsas missiyası Şərq və Qərb arasında harmoniya yaradaraq Azərbaycanın zəngin mədəniyyətini müasir dəbin mərkəzinə çıxarmaqdır.
Dizaynlarda Şuşada toxunan “Qoca” xalçalarının incə detalları, Qarabağ tipli Şuşa qrupuna aid “Flowers in the Garden” xalçaları, eləcə də XVII əsrə aid əjdaha motivli Qafqaz “Dragon” xalçalarının elementləri bir araya gətirilib. Bu tarixi istinadlar od, su, hava və torpaq ünsürlərinin rəngləri ilə ahəngdar şəkildə sintez olunub.
Brendin hər bir dizaynı əsrlərdən gələn hekayələri, mifləri və zərif sənətkarlıq ənənələrini əks etdirərək onu təkcə moda markası deyil, mədəni irsin müasir ifadəsi kimi təqdim edir. Son altı il ərzində brend həm Azərbaycanda, həm də beynəlxalq platformalarda böyük maraq və rəğbət qazanıb.
Qeyd edək ki, Parisin nüfuzlu məkanlarında təşkil olunan “Oriental Fashion Show” çərçivəsində dünyanın müxtəlif ölkələrində fəaliyyət göstərən moda evləri bir araya gələrək yüksəksəviyyəli sənətkarlığı və müasir zərifliyi nümayiş etdirirlər. “Guimet” muzeyində keçirilən defile irs və yaradıcılıq arasında bir səyahət kimi təqdim olunub, burada 2026-cı ilin yaz/yay kolleksiyaları mədəni hekayələrlə müasir ifadə formalarını birləşdirib.
