Azərbaycan alimləri Qırğızıstanın İssık-Kul bölgəsində keçiriləcək VI Ümumdünya Köçəri Oyunlarına həsr olunmuş beynəlxalq elmi konfransda iştirak edəcəklər.
AZƏRTAC “Kabar” agentliyinə istinadla xəbər verir ki, sentyabrın 3-də açılışı olacaq konfransda Azərbaycan təmsilçiləri ilə yanaşı, həmçinin Qazaxıstan, Rusiya, Çin, Türkiyə, ABŞ, Avstriya, Özbəkistan, Cənubi Koreya, Birləşmiş Krallıq, Hindistan, Belçika, Fransa, Yeni Zelandiya, Yaponiya, Səudiyyə Ərəbistanı, Macarıstan, Qana, Almaniya, İtaliya, Monqolustan, Hollandiya, Pakistan, Polşa, Sloveniya, İsveç, Şri-Lanka və İran da daxil olmaqla 30 ölkədən alimlər, tədqiqatçılar, mütəxəssislər, beynəlxalq təşkilatların, ali təhsil müəssisələrinin və tədqiqat mərkəzlərinin nümayəndələri iştirak edəcəklər.
Qırğızıstan Elm, Ali Təhsil və İnnovasiya Nazirliyinin məlumatına görə, konfrans Ümumdünya Köçəri Oyunlarının əsas intellektual tədbirlərindən biridir və köçəri sivilizasiyaların tarixi irsinin, fəlsəfəsinin, mədəniyyətinin, adət-ənənələrinin və inkişafının müasir aspektlərinin hərtərəfli öyrənilməsi üçün elmi ictimaiyyəti birləşdirməyi hədəfləyir.
Genişmiqyaslı elmi forum açıq akademik dialoq, qabaqcıl elmi biliklərin mübadiləsi və müxtəlif ölkələrin tədqiqat mərkəzləri arasında əməkdaşlığın gücləndirilməsi üçün beynəlxalq platformaya çevriləcək.
Konfransda beynəlxalq elmi əməkdaşlığın genişləndirilməsinə, birgə tədqiqat layihələrinin hazırlanmasına, akademik mübadiləyə, müxtəlif ölkələrdən olan tədqiqatçılar və tədqiqat mərkəzləri arasında yeni elmi əlaqələrin qurulmasına xüsusi diqqət yetiriləcək.
Tədbirin açılış mərasimi İssık-Kul bölgəsinin Ornok qəsəbəsində yerləşən Köçəri Sivilizasiya Mərkəzində keçiriləcək.
677jpg_1790033437.jpg)
