Prezident İlham Əliyevin ötən ilin avqust ayında ABŞ-a işgüzar səfəri Azərbaycan-ABŞ münasibətlərində yeni mərhələnin başlanğıcı olub. Səfər çərçivəsində aparılan müzakirələr, imzalanan sənədlər, Prezident Donald Trampın iştirakı ilə üçtərəfli Zirvə Görüşünün keçirilməsi, Ermənistanla Azərbaycan arasında sülh sazişinin paraflanması və Birgə Bəyannamənin imzalanması münasibətlərdə yeni səhifə açıb. Vaşinqton Zirvə Görüşündən sonrakı dövr tərəfdaşlıq və uzunmüddətli sülhə doğru irəliləyiş mərhələsi kimi xarakterizə edilir.
Bu gün Azərbaycan-ABŞ münasibətləri strateji xarakter daşıyır. Prezident İlham Əliyevin ABŞ-a səfəri zamanı Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması haqqında anlaşma memorandumu imzalanıb. ABŞ-ın Vitse-prezidenti Cey. Di. Vensin fevralın 10-da ölkəmizə səfəri zamanı isə “Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası” imzalanıb.
Sənədi Prezident İlham Əliyev və ABŞ-ın Vitse-prezidenti Cey. Di. Vens imzaladılar. Dövlətimizin başçısı mətbuata bəyanatında bildirib ki, Xartiyanın imzalanması altı ay ərzində görülən gərgin işin nəticəsidir. Vaşinqtonda Prezident Donald Trampla keçirilən tarixi görüş və İşçi Qrupunun yaradılması ikitərəfli əməkdaşlıq üçün yeni imkanlar açdı. ABŞ kimi qüdrətli dövlətlə strateji tərəfdaşlıq böyük əhəmiyyət daşıyır.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib. Deputat qeyd edib ki, qarşılıqlı inam və etimada əsaslanan tərəfdaşlığın inkişafı üçün hər iki tərəf səy göstərir. Azərbaycan və ABŞ milli təhlükəsizlik maraqları əsasında qlobal çağırışlara və beynəlxalq terrorizmə qarşı mübarizədə daim sıx əməkdaşlıq edib.
Malik Həsənov vurğulayıb ki, Vitse-prezident Cey. Di. Vensin ölkəmizə səfəri əməkdaşlıq gündəliyinin zənginliyini bir daha nümayiş etdirdi. Prezident İlham Əliyevin Vens ilə məhdud və geniş tərkibdə görüşlərində müxtəlif sahələr üzrə əməkdaşlıq imkanları müzakirə olundu. Fəaliyyətin həcmi və komandalar arasında əlaqələr yüksəksəviyyəli tərəfdaşlıq ruhunu göstərir.
Görüşlərdə TRIPP nəqliyyat dəhlizinin inkişafı, siyasət, iqtisadiyyat, ticarət, yüksək texnologiyalar, süni intellekt və data mərkəzlərinin yaradılması məsələləri müzakirə edilib. Prezident İlham Əliyev qeyd edib ki, TRIPP marşrutu Azərbaycanın iki hissəsini birləşdirməklə yanaşı, Asiya ilə Avropanı birləşdirən etibarlı və böyükmiqyaslı dəhliz olacaq. Layihə regionda sülhün möhkəmlənməsinə töhfə verəcək. Müdafiə məhsullarının satışı sahəsində də yeni mərhələ başlayır. Süni intellekt mərkəzlərinin yaradılması istiqamətində ABŞ-ın aparıcı şirkətləri ilə əməkdaşlıq qurulub və ilkin nəticələr əldə edilib. Dövlətimizin başçısı ABŞ-ın Vitse-prezidentinin səfərini imzalanmış Xartiya və danışıqların mahiyyəti baxımından tarixi adlandırıb.
Deputat qeyd edib ki, Vitse-prezidentin səfəri ərəfəsində ABŞ-ın aparıcı şirkətlərinin nümayəndələrinin ölkəmizə gəlişi rəsmi Vaşinqtonun əməkdaşlığa verdiyi önəmi göstərir. Prezident İlham Əliyev ABŞ Ticarət Palatasının nümayəndə heyətini qəbul edərək bildirib ki, ikitərəfli əlaqələr fəal və ümidverici yeni mərhələyə qədəm qoyur.
Görüşdə biznes, sərmayə və ticarət münasibətlərinin genişləndirilməsi məsələləri müzakirə olunub. Belə bir əminlik ifadə edilib ki, səfərin nəticəsində müxtəlif istiqamətlərdə daha fəal təmaslar olacaq.
Malik Həsənov bildirib ki, zaman-zaman müxtəlif mərhələlərdən keçən Azərbaycan-ABŞ münasibətləri bu gün strateji tərəfdaşlıq səviyyəsinə yüksəlib. Strateji Tərəfdaşlıq Xartiyası əməkdaşlığın bütün sahələrdə inkişafına xidmət edir və əlaqələrin gələcək yol xəritəsini müəyyənləşdirir.
jpg_1770904791.jpg)
jpeg_1772961927.jpeg)
