Avropalı astronomlar saatda 25 min kilometri aşan küləyin sürətini ölçüblər.
AZƏRTAC xəbər verir ki, tədqiqatçılar Günəş sisteminin xaricində misli görünməmiş dərəcədə güclü küləklərin əsdiyi planetlər kəşf ediblər. Bu güclü küləklər, ehtimal ki, planetlərin maqnit sahələrinin təsirinin nəticəsidir.
Tədqiqatçılar Yupiterə bənzər yeddi ekzoplaneti araşdırıblar: onlar böyük və əsasən qazdan ibarətdir. “Nu.nl” yazır ki, planetlər ana ulduzlarının ətrafında sinxron şəkildə fırlanır, yəni planetin bir tərəfi həmişə ulduza baxır.
Güclü teleskoplardan istifadə edərək küləyin sürəti saatda 7200 kilometrdən azı 25 min kilometrə qədər diapozonda ölçülüb. Müqayisə üçün, Yer kürəsində indiyə qədər ölçülən ən yüksək külək sürəti saatda 408 kilometrdir. Yupiterdə saatda 1500 kilometrə qədər olan küləyin sürəti qeydə alınıb.
Təəccüblü olan odur ki, alimlər isti planetlərdə küləklərin daha yavaş əsdiyini aşkar ediblər. Buna görə də, küləyə, ehtimal ki, planetlərin maqnit sahələri təsir göstərir.
Güclü maqnit sahəsi küləyə yavaşladıcı təsir göstərir. Nəticədə tədqiqatçılar maqnit sahəsinin gücünü küləyin sürətinə əsasən hesablaya biliblər.
Alimlərin sözlərinə görə, bu, Günəş sistemimiz xaricindəki planetlərdə maqnit sahələrinin ilk etibarlı ölçülməsidir.
“Ehtimal edirəm ki, bu dünyaların bəzilərində səma təkcə ulduzlarla deyil, həm də planetin üzərində rəqs edən, yarısı əbədi gün işığı, yarısı isə sonsuz gecə ilə örtülmüş nəhəng çoxrəngli işıq pərdələri ilə örtülüb”, - deyə tədqiqatın həmmüəllifi Bibiana Prinot bildirib.
jpg_1782558876.jpg)
