Biz birlikdə elə bir dövrün astanasındayıq ki, bu dövr yenidən açıq şəkildə güc və ən çox da böyük güc siyasəti ilə xarakterizə olunur.
AZƏRTAC xəbər verir ki, bu fikri Almaniya Kansleri Fridrix Merts Münxen Təhlükəsizlik Konfransının açılış mərasimində çıxışında deyib.
Kansler dünyada gərginliklərin artdığı bir şəraitdə Avropanın öz dəyərlərini qoruyub saxlamasının, azadlığını müdafiə etməsinin və gücünü artırmasının vacibliyini vurğulayıb. Bildirib ki, güclü qlobal tərəfdaşlıq şəbəkəsi gələcək beynəlxalq əməkdaşlıq üçün həyati əhəmiyyət daşıyır.
“Bu gün avropalılar kimi ilk vəzifəmiz bu reallığı qəbul etmək və yeni dövr üçün tədbirlər görməkdir”, - deyə F.Merts qeyd edib. Almaniyanın xarici və təhlükəsizlik siyasətinin həmişə Avropa kontekstində formalaşdırıldığını qeyd edən Merts deyib: “Azadlığımızı qonşularımızla birlikdə qoruyuruq”.
Kansler artıq əvvəlki kimi hüquq və qaydalara əsaslanan beynəlxalq nizamın artıq mövcud olmadığını, Rusiya-Ukrayna müharibəsi ilə açıq müharibələr və konfliktlərin yeni mərhələsinin başladığını diqqətə çatdırıb.
Trans-Atlantik münasibətlərə də toxunan Kansler ABŞ-ın liderlik iddiasının şübhə altında olduğunu qeyd edib: “Bəzi mövzularda Avropa ilə Vaşinqton fərqli qiymətləndirmələrə malikdir. Buna baxmayaraq, tərəfdaşlıqda bütün çətinliklərə rəğmən potensial qalmaqdadır. NATO həm Avropa, həm də ABŞ üçün ortaq rəqabət üstünlüyüdür”.
Kansler Avropanın öz maraqlarını və dəyərlərini qoruyub saxlamalı və öz gücünə güvənməli olduğunu qeyd edərək bildirib: “Üstünlük Avropanın azadlığıdır, bu azadlıq isə yalnız təhlükəsizlik və iqtisadi güc vasitəsilə mümkündür”.
jpg_1771009486.jpg)
