BMT-nin son məlumatlarına görə, dünyada su qıtlığı sürətlə artır və milyardlarla insan təhlükəsiz içməli suya görə ciddi problemlərlə üzləşir.
Çexiyanın “Seznam Pravi” portalının məlumatına görə, dünya əhalisinin təxminən 26 faizi ildə ən azı bir ay təmiz su əldə edə bilmir, 46 faizi isə təhlükəsiz sanitariya xidmətlərindən məhrumdur.
Mütəxəssislər bildirirlər ki, su qıtlığının əsas səbəblərindən biri iqlim dəyişikliyidir. Artan temperatur buxarlanmanı sürətləndirir, yağış rejimini dəyişir və yeraltı su ehtiyatlarını azaldır. Xüsusilə, Afrika Buynuzu, Yaxın Şərq, Hindistanın bəzi bölgələri və Mərkəzi Asiya ciddi quraqlıqdan əziyyət çəkir.
İçməli su çatışmazlığından başqa digər su problemləri də yaranır. Belə ki, dünyada yüz milyonlarla insan sanitar şəraitdən məhrumdur, bu isə xəstəliklərin yayılma riskini artırır. Eyni zamanda, bəzi bölgələrdə güclü yağışlar və daşqınlar böyük fəsadlar yaradır. Məsələn, Pakistanda son illərdə baş verən daşqınlar milyonlarla insanı evsiz qoyub.
BMT bildirir ki, qlobal su istehlakı artır və suyun böyük hissəsi (təxminən 70 faizi) kənd təsərrüfatında istifadə olunur. Lakin bir çox ölkələrdə su resurslarının düzgün idarə olunmaması problemi daha da ağırlaşdırır. Ekspertlərin fikrincə, dünya daha çox nəticələrlə mübarizə aparır, amma su böhranının əsas səbəbləri, iqlim dəyişiklikləri, zəif idarəetmə və planlaşdırma kifayət qədər həll edilmir.
Proqnozlara görə, tədbirlər görülməzsə, 2030-cu ilə qədər yüz milyonlarla insan daha çox su çatışmazlığı ilə üzləşəcək və bu, miqrasiya və sosial gərginlik kimi qlobal problemləri artıra bilər.
Təhminə VERDİYEVA,
“Azərbaycan”
jpg_1779686993.jpg)
