Avropa ölkələri artıq Aİ xaricində miqrasiya mərkəzləri tikəcəklər
Avropa ölkələri miqrasiya nəzarəti və qanunsuz miqrantların deportasiyasının asanlaşdırılması ilə bağlı bir neçə qanun layihəsi üzərində razılığa gəliblər. Xüsusilə, Aİ ölkələri ikitərəfli müqavilələr əsasında Avropa xaricində miqrasiya mərkəzləri tikə və miqrantları üçüncü ölkələrə qaytara biləcəklər. Brüssel həmçinin miqrantların tez bir zamanda qəbul edilə biləcəyi "təhlükəsiz ölkələrin" siyahısını təsdiqləyib.
Danimarkanın immiqrasiya və inteqrasiya naziri Rasmus Stoklund bununla bağlı deyib: "İndi Aİ ölkələrinə üçüncü ölkələrlə əməkdaşlıq çərçivəsində qəbul mərkəzləri və digər oxşar həllər yaratmağa imkan verən hüquqi çərçivəmiz var. Bu, mövcud sığınacaq sisteminin əsas qüsurlarını aradan qaldırmaq üçün çox vacibdir. Biz illərdir deyirik ki, bu, işləmir, ehtiyacı olmayan insanlara yardım edirik və həqiqətən ehtiyacı olanlara kömək etmirik və Avropaya miqrasiyanı idarə edə bilmirik. Beləliklə, bu gün irəliyə doğru mühüm bir addım atdıq."
Aİ üzv dövlətləri həmçinin gələn il üçün "miqrant həmrəylik birliyi" arlandırılan fondun həcmi barədə razılığa gəliblər – bu, miqrant yükünün blok daxilində yenidən bölüşdürülməsi mexanizmidir.
Beləliklə, ən ağır vəziyyətə malik ölkələrdən - Yunanıstan, İspaniya, İtaliya və Kiprdən 21.000 miqrant köçürülə bilər ki, bunun üçün 420 milyon avro ayrılacaq.
Bu, əvvəlcə gözləniləndən azdır: Avropa Komissiyası ildə ən azı 30.000 köçürülmə və 600 milyon avroya ehtiyac olduğunu təxmin edib. Lakin mexanizm yalnız yayda işləyəcəyi üçün ilin ancaq yarısını əhatə edəcək.
Aİ ölkələri “həmrəylik birliyi“nə köçürülmə, maliyyə yardımları və ya öz personalını təmin etmək, yaxud qəbul mərkəzlərinin tikintisinə kömək etmək kimi "alternativ tədbirlər" vasitəsilə töhfə verə bilərlər.
Hər bir ölkəyə əhalisinə və ÜDM-ə əsasən kvota ayrılır və hansı tədbirlərin görüləcəyinə özü qərar verə bilər.
Dörd ölkə - Avstriya, Polşa, Xorvatiya və Çexiya - "çox çətin miqrasiya vəziyyəti ilə üzləşdikləri" üçün həmrəylik fonduna köçürülmə haqlarından və maliyyə yardımlarından tamamilə azad edilib.
Hər bir ölkənin konkret öhdəlikləri dekabrın 16-na planlaşdırılan həmrəylik fondunun yekun təsdiqinə qədər açıqlanmır. Aİ mənbələrinə görə, əksər ölkələr maliyyə yardımlarını seçiblər.
Rizvan CƏFƏROV,
“Azərbaycan”
jpg_1767211798.jpg)
