Yaponiyanın “Obayashi” şirkəti 2050-ci ilə kimi kosmik lift inşa etməyi planlaşdırır. O, kosmik lift Yer kürəsinin geosinxron orbitinə yüklərin daşınması üçün istifadə ediləcək. Unikal yenilik həyata keçirilsə, kosmosa daşınılan hər kiloqram yükün daşınma xərcini 120 dollara endirəcək. Bu isə hazırda “SpaceX”in “Falcon 9” raketi vasitəsilə kosmosa yükü daşıması xərcindən 20 dəfə daha ucuzdur. Məlumata əsasən, “Obayashi” hazırda kosmik liftin inşa planlamasını aparır və bu layihə üçün partnyorların axtarışındadır. Şirkətin fikrincə, kosmik liftin istifadəyə verilmə müddəti qismində ən real görünən zaman məhz 2050-ci ildir.

Şirkət hələ kosmik liftin inşa edilməsi planını 2012-ci ildə elan etmişdi. O zaman şirkət “Tokyo Skytree” televiziya qülləsini istifadəyə vermişdi. Sözügedən televiziya qülləsininin hündürlüyü 634 metr təşkil edir. Bəzi mütəxəssislər kosmik lift layihəsinə skeptik yanaşsalar da, bəziləri bu cür layihənin reallaşdırılmasını istəyirlər. Kosmik lift layihəsinin təxmini dəyəri 100 milyard dollar təşkil edir. Daha öncə “Obayashi” sözügedən layihənin inşasına 2025-ci ildə start verməyi və 2050-ci ildə istifadəyə verməyi planlaşdırırdı. Lakin kosmik liftin hazırkı texnologiyaların və mövcud materialların istifadəsi ilə inşası üçün nəzərdə tutulmuş miqdarda polad material sadəcə Yer kürəsində yoxdur. Buna görə də şirkət polad konstruksiyaya daha dözümlü alternativ kimi karbon nanoborularını görür. Lakin uzadılmış karbon nanoboruların hazırlanması və istehsalı texnologiyaları hələ mövcud deyil. Digər tərəfdən bu cür lift vasitəsilə yüklərin kosmosa çatdırılması prosesi daha təmiz ola bilər. Belə ki, tonlarla yanacağın yandırılması əvəzinə xüsusi qaldırıcılar kosmosdan əldə edilən mikrodalğa və ya Günəş enerjisi sayəsində yükləri kosmosa çatdıra bilərlər. Bu cür xüsusi qaldırıcıların gözlənilən sürətləri saatda 200 km təşkil edir.

Ülkər XASPOLADOVA,

“Azərbaycan”