BP şirkəti "Azəri-Çıraq-Günəşli" (AÇG) yataqlarının işlənməsi layihəsinin operatoru kimi məmnuniyyətlə bildirir ki, "Qərbi Azəri" platformasından ilk neft hasilatının 20 ili tamam olur. Bu, nəhəng AÇG yataqlarının işlənməsində əlamətdar hadisədir.
"Qərbi Azəri"dən ilk hasilat 2005-ci il dekabrın 30-da əldə olunmuş və bununla da AÇG-nin tammiqyaslı işlənməsinin ikinci fazası başlanmışdı. İlk neft əvvəlcədən qazılmış üç öncə qazma quyusunun birincisindən hasil olunaraq sualtı boru kəməri vasitəsilə 2006-cı il yanvarın 4-də Səngəçal terminalına çatmışdı.
O vaxtdan bəri "Qərbi Azəri" AÇG-nin hasilat salnaməsinin aparıcılarından biridir. İndiyədək platformadan 1 milyard bareldən (142 milyon ton) çox neft hasil edilib. Bu göstərici ilə "Qərbi Azəri" AÇG platformaları arasında "Mərkəzi Azəri"dən sonra ikinci yerdədir. Bununla da "Qərbi Azəri" 1997-ci ilin noyabrında hasilata başlamış AÇG-dən 4,5 milyard barel ümumi neft hasilatına əhəmiyyətli töhfə verib.
"Qərbi Azəri" hazırda da təhlükəsiz və etibarlı şəkildə öz fəaliyyətini davam etdirir. 2025-ci ilin üçüncü rübünün sonuna platformadan gündəlik orta hasilat 76 min barel təşkil edib.
"Qərbi Azəri" obyektlərinə 48 quyu gövdəsi olan bir hasilat, qazma və yaşayış platforması və qurudakı Səngəçal terminalına birləşdirilmiş 30 düymlük sualtı boru kəməri daxildir. İndiyədək platformadan ümumilikdə 40 quyu və çox sayda yan lülə qazılıb. İstismarda olan 32 quyudan 24-ü hasilat quyusu, 8-i isə suvurma quyusudur.
Hazırda "Qərbi Azəri"də təxminən 170 nəfər çalışır və onların əksəriyyəti, o cümlədən platformanın hər iki meneceri azərbaycanlı mütəxəssislərdir.
"Qərbi Azəri" platformasının meneceri Emin İbrahimov deyir: "Qərbi Azəri" ailəsi olaraq, AÇG-nin ən yüksək göstəricilərə malik qurğularından birini idarə etməkdən qürur duyuruq. Geriyə nəzər salsaq, xatırlayarıq ki, 2005-ci ildə işə salınmış birinci quyularımızdan olan C-06 quyusu ilk dövrlərdə gündəlik 35 min barel neft verib və dünyanın ən məhsuldar quyularından biri olub. İndiyədək bu quyudan ümumilikdə 80 milyon barel neft əldə olunub və bu, istənilən neft quyusu üçün müstəsna bir nailiyyətdir. Bu tarixi ildönümü münasibətilə bütün "Qərbi Azəri" komandasını ürəkdən təbrik edirəm və bir daha vurğulamaq istəyirəm ki, "Qərbi Azəri" dünya səviyyəli platforma olaraq hələ gələcək onilliklər ərzində də AÇG-nin uğur hekayəsinə, eləcə də Azərbaycanın neft sənayesinə mühüm töhfələr verməkdə davam edəcək".
"Azərbaycan"
