Ankara terror təşkilatlarının artıq fəaliyyət göstərməyəcəyi Suriyanın tərəfdarıdır. Terror təhlükəsinin aradan qaldırılması bütün regionun, o cümlədən Türkiyənin maraqlarına uyğundur.
AZƏRTAC xəbər verir ki, bu barədə Ankarada bazar ertəsi ölkə parlamentinin plenar iclasını açan Böyük Millət Məclisinin sədri Numan Kurtulmuş bildirib.
Kurtulmuş qeyd edib ki, Suriya xalqı öz haqları uğrunda mübarizəni davam etdirərək uzun onilliklər ərzində “Baas” rejiminin diktaturasından zülm çəkib.
Parlament sədri vurğulayıb ki, Türkiyə Suriyadakı prosesləri öz milli maraqları prizmasından qəbul edir, qonşu ölkədə azad və demokratik bir cəmiyyət qurulacağına ümid edir.
“Ankara bu prosesə hər cür dəstəyi verməyə hazırdır”, - deyən Kurtulmuş Suriyanın ərazi bütövlüyünü Türkiyənin “prioritetlərindən biri” adlandırıb. Onun sözlərinə görə, Yaxın Şərq regionu parçalanma deyil, əməkdaşlıq, inteqrasiya və qüvvələrin birliyi mərkəzinə çevrilməlidir.
“Qonşu Suriyanın suverenliyinin və bütövlüyünün qorunub saxlanılması həm Suriya xalqının, həm də Türkiyənin maraqlarına uyğundur. Biz, həmçinin Suriya ərazisinin terrorçulardan tam təmizlənməsinin tərəfdarıyıq”, - deyən Türkiyə parlamentinin sədri terror təşkilatlarını regionda sabitliyi pozmağa çalışan qüvvələrin əlində “alət” adlandırıb.
Kurtulmuş Türkiyənin Suriyada yeni hökumətlə yaxından əməkdaşlığa, eləcə də Türkiyə, Livan və İordaniyadan olan qaçqınların onlara layiq və təhlükəsiz şəkildə qayıtması üçün şəraitin yaradılmasına töhfə verməyə hazır olduğunu vurğulayıb.
