Dekabrın 5-də Çuntsində (ÇXR) Çin-Avropa Dəmiryolu Ekspresinin (Çendu-Çuntsin) “Səlislik və açıq mübadilə” mövzusunda ikinci qlobal tərəfdaşlıq konfransı keçirilib.
AZƏRTAC “Trans-Xəzər Beynəlxalq Nəqliyyat Marşrutu” (TBNM) Beynəlxalq Assosiasiyasına istinadla xəbər verir ki, tədbir Çinin nazirlik və komissiyalarının, beynəlxalq nəqliyyat təşkilatlarının, sənaye parklarının, səfirlik və konsulluqlarının nümayəndələri, eləcə də dünyanın aparıcı logistika şirkətləri və tanınmış ekspertləri də daxil olmaqla, yüzlərlə iştirakçını bir araya gətirib. Konfransın əsas məqsədi “Çin-Avropa” dəmiryolu ekspresinin keyfiyyəti, səmərəliliyi və təhlükəsizliyinin artırılması yollarının müzakirə edilməsi olub.
Tədbir çərçivəsində “Trans-Xəzər Beynəlxalq Nəqliyyat Marşrutu” Beynəlxalq Assosiasiyası və Çinin “Chengdu International Railway Port Investment & Development (Group) Co., Ltd.” və “Yuxinou (Chongqing) Supply Chain Management Co., Ltd.” logistik platformaları arasında strateji əməkdaşlıq haqqında Çərçivə Sazişi imzalanıb.
Həmin sənəd “Çin-Avropa” (Çendu-Çuntsin) dəmir yolu dəhlizinin əsas rolundan və nəqliyyat qovşağı kimi Mərkəzi Asiya və Cənubi Qafqazın strateji üstünlüklərindən istifadə etməklə TBNM marşrutunun fəal şəkildə təşviqinə və hərtərəfli inkişafına yönəlib.
Saziş Çindən Avropaya və əks istiqamətdə tranzit və xarici ticarət yüklərinin cəlb edilməsi üzrə işlərin birgə əlaqələndirilməsini nəzərdə tutur. O, həmçinin daşımaların səmərəliliyinin artırılmasına və TBNM marşrutu üzrə Çindən Azərbaycan, Gürcüstan, Türkiyə və digər Avropa ölkələrinə konteyner daşımaları üçün əlverişli şəraitin yaradılmasına yönəlib.
jpg_1735107944.jpg)
