Kabinetdə 26 nazir və 4 dövlət katibi var
Seneqalın yeni təyin olunmuş Baş naziri Əhmədu El Aminu Lo 26 nazir və 4 dövlət katibindən ibarət hökumət qurub. Prezident Aparatından verilən məlumatına görə, əvvəlki hökumətin bəzi üzvləri yeni kabinetdəki vəzifələrini qoruyublar. Yeni hökumətə keçmiş Prezident Maki Sallenin dövründə xidmət etmiş bir neçə şəxs, eləcə də çox sayda texnokrat daxildir.
Yeni kabinetdə keçmiş quru və hava nəqliyyatı naziri Yankhoba Diyeme silahlı qüvvələr naziri təyin edilib. Sabiq maliyyə və büdcə naziri Şeyx Diba isə iqtisadiyyat, maliyyə və planlaşdırma naziri olub. Maki Sallenin dövründə energetika və neft naziri vəzifəsini tutan Muhamadou Maxtar Sisse yeni kabinetə daxili işlər və ictimai təhlükəsizlik naziri kimi qoşulub. Şeyx Nianq xarici işlər naziri vəzifəsini saxlayıb. Vəkil Musa Sarr ədliyyə naziri, Mari-Anjelik Mame Selbe Diuf isə ailə, sosial fəaliyyət və həmrəylik naziri təyin ediliblər. Ətraf mühit naziri vəzifəsində çalışmış Əbdürrəhman Diuf isə energetika və neft naziri postunu tutub. Vəzifələrini qoruyanlar arasında sənaye və ticarət naziri Serin Qay Diop, hidrotexnika və kanalizasiya naziri Şeyx Tidian Dye və milli təhsil naziri Mustafa Mamba Girassi da var. Onlardan əlavə, Bakari Sarr kommunikasiya və institusional əlaqələr naziri, eləcə də Hökumət sözçüsü təyin olunub.
2024-cü ilin aprelində bu posta təyin olunmuş Baş nazir Osman Sonko mayın 22-də vəzifəsindən azad edilib. Ötən ayın 25-də onun yerinə texnokrat, 60 yaşlı iqtisadçı Əhmədu Əl Aminu Lo təyin olunub. Lo makroiqtisadiyyat, bank tənzimlənməsi, maliyyə bazarları və islam maliyyəsi üzrə mütəxəssisdir. O, 2024-cü ilin aprelindən hökumət üzvüdür və yeni idarəetmə sisteminin təşəbbüskarlarından biridir. Sonkonun istefasından sonra Milli Assambleyanın sədri El Malik Ndiaye də istefa verib. Mayın 26-da keçirilmiş səsvermə zamanı Osman Sonko ölkə parlamentinin Sədri seçilib.
Qeyd edək ki, yeni baş nazir həm Osman Sonkoya, həm də Seneqal Prezidentinə yaxın adam hesab olunur ki, bu da ölkədə gələcək siyasi inkişaflarda əhəmiyyətli rol oynaya bilər.
Rizvan CƏFƏROV,
“Azərbaycan”
jpeg_1780486949.jpeg)
