2016-cı il 3-4 iyun tarixi dünya azərbaycanlıları üçün əlamətdardır. Həmin günlər Dünya Azərbaycanlılarının IV Qurultayı keçirilib. İki gün davam edən qurultaya 49 ölkədən 500-dən çox diaspor nümayəndəsi və qonaq qatılıb.
Xarici ölkələrin Azərbaycana dost münasibəti ilə tanınan nüfuzlu siyasətçiləri, ictimai xadimləri, elm adamları, eləcə də yüksəkvəzifəli şəxsləri və parlament üzvləri də qonaqlar arasında olub. Həmçinin respublikamızın müxtəlif dövlət və hakimiyyət strukturları, qeyri-hökumət təşkilatları, elm, təhsil, mədəniyyət və digər yaradıcı qurumların, siyasi partiyaların təmsilçilərindən ibarət 360 nəfərlik nümayəndə heyətinin qatıldığı qurultayda Azərbaycan həqiqətlərinin dünya ictimaiyyətinə çatdırılması sahəsində qarşıda duran vəzifələr, təbliğat işində müasir informasiya texnologiyalarının tətbiqi, soydaşlarımızın hüquq və azadlıqlarının qorunması istiqamətində mövcud olan problemlər, onların həlli yolları və digər prioritet məsələlər diqqət mərkəzində saxlanılıb.
Xatırladaq ki, Dünya Azərbaycanlılarının I Qurultayı 2001-ci il noyabrın 9-10-da Prezident Heydər Əliyevin təşəbbüsü ilə Bakıda keçirilib. Dünya Azərbaycanlılarının II Qurultayı 5 il sonra Prezident İlham Əliyevin 8 fevral 2006-cı il tarixli sərəncamına əsasən, həmin il martın 16-da baş tutub. Xaricdə yaşayan soydaşlarımız III Qurultaya isə 2011-ci il iyulun 5-6-da toplaşıblar.
Dünya Azərbaycanlılarının IV Qurultayının iyunun 3-də Heydər Əliyev Mərkəzində keçirilən rəsmi açılış mərasimində çıxış edən Prezident İlham Əliyev demişdir: "Bildiyiniz kimi, I Qurultay Ulu Öndər, müstəqil Azərbaycanın qurucusu Heydər Əliyevin təşəbbüsü ilə 2001-ci ildə keçirilmişdir. O vaxtdan bu günə qədər Azərbaycanda böyük işlər görülmüşdür, Azərbaycan daha da güclənmişdir, bizim imkanlarımız artmışdır". Dövlətimizin başçısı 2001-ci ilin Azərbaycan diaspor təşkilatlarının formalaşdırılması işində çox önəmli il olduğunu, məhz həmin ildə keçirilən I Qurultaydan sonra 2002-ci ildə Heydər Əliyevin sərəncamı ilə Xaricdə Yaşayan Azərbaycanlılarla İş üzrə Dövlət Komitəsi yaradıldığını xatırladıb: "Hazırda onun adı Diasporla İş üzrə Dövlət Komitəsidir. Diaspor təşkilatlarının təşkilatlanma, formalaşma prosesi daha da geniş vüsət almışdır". Prezident İlham Əliyev bildirib ki, Azərbaycan diaspor təşkilatları həm kəmiyyət, həm keyfiyyət baxımından böyük yol keçmiş, güclənmişlər. Bu gün dünya miqyasında azərbaycanlılar və onların təmsil etdikləri təşkilatlar önəmli rol oynayırlar.
Dövlətimizin başçısı bir məqamı da vurğulayıb. Qeyd edib ki, diaspor təşkilatlarının fəaliyyəti daim diqqət mərkəzindədir: "İlk növbədə əlbəttə, biz istəyirik ki, dünyada yaşayan azərbaycanlılar öz tarixi vətənləri ilə əlaqələri heç vaxt kəsməsinlər. Daim əlaqədə olsunlar, Azərbaycan ilə bağlı olsunlar. Beləliklə, onlar özlərini daha da rahat hiss edəcəklər. Belə olan halda Azərbaycan dövləti onlara daha da böyük dəstək verə biləcək".
Xatırladaq ki, Dünya Azərbaycanlılarının IV Qurultayı keçiriləndə Azərbaycanın Qarabağ və Şərqi Zəngəzur əraziləri hələ də Ermənistanın işğalı altında idi. Belə bir zamanda yalnız dövlətimizin, Azərbaycan vətəndaşlarının deyil, eyni zamanda dünyanın müxtəlif ölkələrində yaşayan həmyerlilərimizin üzərinə ölkəmizin həqiqətlərini dünya ictimaiyyətinə çatdırmaq kimi böyük və məsuliyyətli vəzifə düşürdü. Dövlətimizin başçısı İlham Əliyevin bildirdiyi kimi: "Azərbaycan həqiqətləri haqqında əlbəttə ki, dünya ictimaiyyətinə geniş informasiya verilməlidir. Biz dövlət olaraq bunu etməyə çalışırıq. Ancaq diaspor təşkilatlarından da çox şey asılıdır. Xüsusilə biz bunu Ermənistan-Azərbaycan Dağlıq Qarabağ münaqişəsinin həlli ilə bağlı informasiya təminatında görürük. Müstəqilliyimizin ilk illərində zəif olmağımızdan istifadə edən erməni diasporu uzun illərdir ki, dünyada bizə qarşı çox çirkin kampaniya aparır. Bu kampaniyanın tərkib hissəsi o idi ki, Azərbaycanı qaralasınlar, Azərbaycanı antidemokratik, Ermənistanı isə yazıq, "blokada" şəraitində olan ölkə kimi təqdim etsinlər, Dağlıq Qarabağın tarixi ilə bağlı yalan, uydurma məlumatları sızdırsınlar və onlar buna müəyyən dərəcədə nail ola biliblər".
Diqqəti tarixi faktlara çəkən Prezident əsl həqiqətlər barədə Azərbaycanda kifayət qədər materialların, xəritələrin, kitabların, tarixi sənədlərin olduğunu qeyd etmiş, diaspor təşkilatları qarşısında əhəmiyyətli vəzifələr qoymuşdur: "Bizim alimlərimiz çox böyük işlər görürlər. "İrəvan xanlığı" adlı böyük bir elmi əsər yaradılıbdır. Çünki dünyada bir çoxları bilmir ki, bu, bizim tarixi torpağımızdır. Ancaq biz bunu sənədlər əsasında sübut edirik, xarici dillərə tərcümə edirik". Dövlətimizin başçısı demişdir ki, ona görə bu istiqamət diaspor təşkilatları üçün əsas olmalıdır.
Rəsmi açılışdan sonra qurultay öz işini "Müasir dövrdə informasiya müharibəsi - müdafiədən hücuma: şərtlər, siyasi reallıqlar və yeni fəaliyyət mexanizmləri", "Keçmişin təcrübəsi və müasir düşüncə - Azərbaycan diaspor hərəkatında gənclər: yeni baxış və yeni strategiya", "Lobbi quruculuğu: dəyişən geosiyasi reallıqlar yeni qlobal iqtisadi tendensiyalar kontekstində", "Cəmiyyətə inteqrasiya və siyasi həyatda iştirak" mövzularında panel iclaslarla davam etdirib. Diaspor rəhbərləri iclaslarda müasir dövrdə informasiya müharibəsi, bu sahədə yeni fəaliyyət mexanizmlərinin tətbiqi, Azərbaycan diaspor hərəkatında gənclərlə bağlı yeni strategiyanın hazırlanması, yeni qlobal iqtisadi tendensiyalar fonunda lobbi quruculuğu, cəmiyyətə inteqrasiya, siyasi həyatda iştirak və başqa mühüm mövzularda fikir mübadiləsi aparıb, rəy və təkliflərini irəli sürüblər.
İştirakçılar qurultayın qətnaməsini, qurultay nümayəndələri adından Prezident İlham Əliyevə, dünya azərbaycanlılarına, Ermənistan-Azərbaycan Dağlıq Qarabağ münaqişəsi ilə əlaqədar dünya ictimaiyyətinə, beynəlxalq təşkilatlara, xarici ölkələrin hökumət başçılarına və parlamentlərinə Ermənistanda yerləşən "Metsamor" Atom Elektrik Stansiyasının fəaliyyəti ilə bağlı BMT-nin Beynəlxalq Atom Enerjisi Agentliyinə, Avropa İttifaqına və dünya ictimaiyyətinə müraciətlərini yekdilliklə qəbul ediblər.
Qurultayın yekununda Dünya Azərbaycanlılarının Əlaqələndirmə Şurasının yeni tərkibi təsdiqlənib. Qurultay iştirakçıları növbəti dəfə Prezident İlham Əliyevi yekdilliklə Dünya Azərbaycanlılarının Əlaqələndirmə Şurasına Sədr seçiblər.
Son 10 ildə dünya azərbaycanlılarının həmrəyliyinin daha da möhkəmlənməsi, diaspor təşkilatlarının fəaliyyətinin genişlənməsi və beynəlxalq müstəvidə Azərbaycanın mövqelərinin güclənməsi IV Qurultayda müəyyənləşdirilən strateji hədəflərin uğurla həyata keçirildiyini göstərir. Xüsusilə 2020-ci ildə Vətən müharibəsində qazanılan tarixi Zəfərlə Azərbaycanın ərazi bütövlüyünün bərpası dünyanın müxtəlif ölkələrində yaşayan soydaşlarımızın milli maraqlar ətrafında daha sıx birləşməsinə, informasiya və diplomatik mübarizədə fəal iştirakına səbəb oldu.
Bu gün Azərbaycan diasporu qarşısında duran əsas vəzifələrdən biri ölkəmizin qazandığı uğurların, həyata keçirilən quruculuq və bərpa işlərinin, eləcə də regionda formalaşan yeni reallıqların beynəlxalq ictimaiyyətə obyektiv şəkildə çatdırılmasıdır. Dünya Azərbaycanlılarının IV Qurultayında səsləndirilən çağırışlar və müəyyən edilən prioritetlər xaricdə yaşayan soydaşlarımızın Azərbaycan dövlətçiliyinin möhkəmləndirilməsi, milli-mənəvi dəyərlərimizin təbliği və xalqımızın maraqlarının müdafiəsi istiqamətində fəaliyyətinə bu gün də istiqamət verir.
Zöhrə FƏRƏCOVA,
"Azərbaycan"
jpeg_1780484142.jpeg)
