Artıq ilin elə vaxtına gəlib çatmışıq ki, hər kəs ötən aylar görülmüş işlərə bir daha nəzər salır, nəyə nail olduğunun və olmadığının səbəblərini təhlil edir, yeni ildə görəcəyi işləri planlaşdırır. Bu baxımdan şabranlı bağbanlar da istisna deyil.

Şabran ölkəmizin şimal bölgəsində iqtisadi inkişafı ilə seçilən rayonlardan biridir. Dövlətin qeyri-neft-qaz sektorunu inkişaf etdirmək və iqtisadiyyatın neftdən asılılığını aradan qaldırmaq sahəsində qarşıya qoyduğu mühüm vəzifə burada da prioritet sayılır. Ötən illər həyata keçirilən iqtisadi siyasət nəticəsində bu istiqamətdə bir sıra nailiyyətlər də əldə olunub. Şabranlılar ölkədə qeyri-neft-qaz sektorunun şaxələndirilməsinə və bu sahədə daha çox məhsul istehsalına öz töhfələrini veriblər. 

Hazırda rayonun ərazisində meyvə yığımı yekunlaşmaq üzrədir. Builki payız xüsusi bar-bərəkəti ilə seçilir. Bunu toplanan məhsulun həcmini göstərən rəqəmlər də təsdiqləyir: rayon üzrə 143,9 hektar xurma bağından 601,6 ton, 135,9 hektar nar bağından 311 ton, 205,9 hektar heyva bağından 1096,6 ton məhsul yığılıb. Şabranın xurma və narı dərilən kimi sahibkarlar tərəfindən öncədən bağlanmış müqavilələr əsasında satışa çıxarılıb. Bu da təbiidir - Şabranın ləziz dadı və əmtəə görkəmi ilə seçilən bu meyvələri bazarda müştəri sarıdan korluq çəkmir. Bağlardan həmçinin 1567 ton alma, 1232,8 ton armud, 311,4 ton ərik dərilib. Bu meyvələrin bir hissəsi emal müəssisələrinə təhvil verilib. Onu da qeyd edək ki, Şabran əriyi də yarmarka və bazarlarda ən çox alınan meyvələrdəndir. Bu meyvələrin üzərinə bağlardan toplanan 1207,5 ton şaftalını, 280,4 ton gavalını da gəlsək, onda Şabran torpağının nə qədər barlı-bəhərli olmasına şübhə yeri qalmaz. 

Amma bunlar da hələ hamısı deyil. Hazırda rayonda badam yetişdirilməsinə də  maraq çoxdur. Bu, Şabranda demək olar ki, yeni sahədir. Çünki cəmi iki il əvvəl badama rayonda o qədər də maraq yox idi. Bu gün isə vəziyyət tamam dəyişib - cari  mövsüm rayon üzrə 150 hektara yaxın sahədən 50 tondan artıq badam yığılıb. Bir neçə  müəssisə məhsulu almaq üçün bağbanlarla müqavilə bağlayıb. Ona görə də növbəti təsərrüfat ilində badam bağlarının sahəsinin genişləndiriləcəyinin nəzərdə tutulması təbiidir.

Bu il fındıq bağları da yaxşı bar verib. 516 tona yaxın məhsul toplanıb. Hazırda Şabranda 1171 hektar fındıq bağı var. Yazda yeni sahələrdə də fındıq tingləri əkiləcək. Yaxın illər fındıq satışının bu rayonun iqtisadiyyatına sanballı töhfə verəcəyi gözlənilir. Fındıqla bərabər qoza da təlabat artıb. Mövsümdə 70 hektar bağdan 113,3 ton qoz yığılıb ki, bu da əvvəlki ildə olduğundan xeyli çoxdur.

Şabranda 405,9 hektar üzüm bağı da var. Onun 273,4 hektarı süfrə və 132,5 hektarı şərab üzümü sahələridir. Şabranın üzümü şirinliyi ilə seçilir. Odur ki, qonaqlar Şabrandan üzümsüz dönməzlər. Bolluğa da söz ola bilməz. Təkcə cari mövsüm plantasiyalardan 3049,3 ton məhsul götürülmüşdür. Məhsuldarlıq 75,1 sentner olmuşdur. Yığılan meyvələrin böyük hissəsi ölkədaxili bazar və yarmarkalarda satılır. Yeri gəlmişkən, deyək ki, ayrı-ayrı bitkilər üzrə ixtisaslaşmanın, müxtəlif təsərrüfatların formalaşmasının da nəticəsi müsbətdir. 

Əvvəlki illərə nisbətən bu il əldə edilən gəlir çox olduğundan növbəti mövsümdə rayonda yeni meyvə bağlarının salınması planlaşdırılır. Bu həm də ona görə yaxşıdır ki, meyvəçilik, bağçılıq əməktutumlu sahədir. 

Akif ƏLİYEV,

"Azərbaycan"