Ətrafdakı tələbələrin çoxu onun nəvəsi yaşındadır. Ancaq bu, onu öz yolundan çəkindirmir. 68 yaşlı Qətibə İsayeva peşə öyrənmək üçün parta arxasında oturmaq qərarına gəlib.

AZƏRTAC-ın bölgə müxbiri xəbər verir ki, İsmayıllı Dövlət Peşə Təhsil Mərkəzinin “Qənnadıçı-şirniyyatçı” ixtisasına qəbul olan Qətibə xanım 1956-cı ildə Bakıda anadan olsa da, ailə həyatı qurduqdan sonra İsmayıllı rayonunda yaşayıb. Hazırda evdar xanımdır, eyni zamanda, təqaüdçüdür. Oxumaqdan, bilik və bacarıqlarını artırmaqdan yorulmayan müsahibimiz övladları, doğmaları üçün tez-tez bir-birindən dadlı şirniyyatlar da bişirir. Qənnadıçılığı bacarsa da, bu peşənin sirlərini daha da dərindən öyrənmək istəyib və ona görə də Peşə Təhsil Mərkəzində yeni biliklərə yiyələnir.

“Müasir gənclər oxumağa, ali təhsil almağa çalışırlar. Amma peşə təhsilinə də önəm vermək lazımdır. Hər yaşda peşəyə yiyələnmək yaxşıdır, xüsusən də qadınlar üçün. Ola bilər ki, hansısa səbəbdən oxuya bilməyiblər, özlərini göstərə bilməyiblər, amma həvəsləri var. Qoy gəlsinlər, peşə məktəbində təhsil alsınlar, öz bilgilərini artırsınlar. Hələ öyrənəsi çox şey var”, – deyə o, fikirlərini bizimlə bölüşüb.

Qətibə xanım deyir ki, Bakı şəhərində 239 nömrəli tam orta məktəbi bitirdikdən sonra universitetə daxil olmaq üçün imtahan versə də, qəbul ola bilməyib. Həyatın çətinlikləri səbəbindən təhsil almaq imkanından məhrum olan müsahibimiz, gənclik illərində ailəsinə dəstək olmaq üçün müxtəlif işlərdə çalışsa da, təhsil almaq arzusu həmişə ürəyində qalmışdı. Hər yeni başlanğıcda olduğu kimi, bu yolda da çətinlikləri az olmayıb. Texnoloji biliklərinin zəif olması, fiziki yorğunluq və digər amillər ilk günlərdə ona çətinlik törətsə də, Qətibə İsayeva heç vaxt geri çəkilməyib: “Ən çətin anlarda belə geri çəkilməmək lazımdır. Hər dəfə bir az irəliləyiş gördükcə, özümə daha çox güvənirəm. Hər bir azərbaycanlı qadını kimi şirniyyat bişirməyə böyük həvəsim var, xüsusən də milli şirniyyatları bişirməyə. Amma gördüm ki, hər sahədə olduğu kimi, burada da yeniliklər var və mən onlardan xəbərdar deyiləm. Müəyyən təcrübəm olsa da, düşündüm ki, bu sahəni daha yaxşı öyrənməliyəm”.

İstehsalat təlim ustası Kəmalə Qurbanova bildirir ki, 68 yaşlı Qətibə İsmayılovanın məktəbə gəlişini böyük maraq və heyranlıqla qarşılayıb: “Onun yaşı və öyrənmək həvəsi müəllimlər və tələbələrin diqqətini çəkib. Qətibə xanımın enerjisi və öyrənmək həvəsi həqiqətən alqışalayiqdir. O, hər bir tapşırığa diqqətlə yanaşır”.

Tələbə yoldaşları isə onunla dərs keçməyin fərqli və maraqlı olduğunu deyirlər.

Onun bu yaşda təhsil almaq qərarı, yalnız özünü inkişaf etdirmək məqsədi daşımır, həm də gənclərə həvəs verir, öyrənməyi sevdirərək yeni yanaşmalar ortaya qoyur. Bu amil həm məktəbin mühitini zənginləşdirir, həm də öyrənməyin heç vaxt gec olmadığını sübut edir.

İsmayıllı Dövlət Peşə Təhsil Mərkəzinin direktoru Cəlil Bağırovun sözlərinə görə, mərkəzdə tədris olunan ixtisaslar regionda fəaliyyət göstərən şirkətlərin və ya müəssisələrin tələb və sorğuları əsasında tədris olunur. Bu, həm də tələb-təklif əsasında formalaşır.

Xatırladaq ki, hazırda İsmayıllı Dövlət Peşə Təhsil Mərkəzində arıçı, xalçaçı, qrafik dizayner, kompüter təmiri, dərzi, bərbər, geyim üzrə dizayner, qaynaqçı, qənnadıçı-şirniyyatçı, aşpazlıq, kənd təsərrüfatı ixtisaslarında 523 tələbə təhsil alır. Tələbələrə xüsusi proqramla praktiki və nəzəri qaydada peşənin mənimsənilməsi üçün dərslər keçilir, eyni zamanda, onlara müasir avadanlıqlarla səmərəli işləmək qaydası öyrədilir. Qrup üçün lazımi texniki və əyani vəsaitlərlə təchiz olunmuş xüsusi sinif otaqları təşkil edilib. Peşəkar mütəxəssislər tərəfindən iştirakçılara nəzəri biliklərlə yanaşı, istehsalat təcrübəsi zamanı praktiki bilik və bacarıqlar da tədris olunur.

Bir sözlə, 68 yaşlı Qətibə İsayevanın həyat hekayəsi sübut edir ki, oxumaq və öyrənmək heç vaxt gec deyil. Qətibə xanımın əzmi və qətiyyəti gənc nəsillərə və təhsildən kənarda qalan hər kəsə nümunədir.